Portugal solicita unha auditoría das redes eléctricas á Unión Europea

Na mañá da terza feira, o Goberno de Luís Montenegro en Portugal confirmou nun comunicado que “todos os 6,4 millóns de clientes teñen servizo”, pondo fin a case un día dun apagamento eléctrico xeral no territorio continental que tamén afectou ao Estado español. Antes, Redes Energéticas Nacionais (REN) asegurara que o sistema eléctrico portugués xa estaba “perfectamente estabilizado”. As únicas sen electricidade eran 800 persoas usuarias por “unha avaría non relacionada”, ratificou o Executivo luso, que tamén anunciou que o “abastecemento de auga funciona en practicamente todo o país” e que a situación na saúde pública, canda algunhas instalacións públicas máis as únicas que, baixo mínimos, se mantiveron operativas grazas a xeradores de gasóleo e gasolina, fora “estabilizada”. En paralelo, o Gabinete salientou que “non se rexistraron perturbacións a nivel de seguridade”. Así e todo, e a pesar de incidir na comunicación en que o país “está conectado” e nunha situación de “normalidade”, o propio texto admite que aínda non era así, con “perturbacións” nalgunhas liñas do Metropolitano de Lisboa, no que se reportaron atrasos. Tamén resaltou a recuperación da operatividade dos aeroportos. Porén, no de Lisboa, o que máis padeceu as consecuencias do acontecido, foron suspendidos pola mañá 29 voos, a meirande parte programados antes do mediodía, un día despois de ter que anular centos de viaxes. Xavier Barreto, que encabeza a Associação Portuguesa de Administradores Hospitalares, ratificou á axencia Lusa que a actividade é normal nos centros hospitalarios, que tentan organizar a recuperación dos milleiros de consultas, cirurxías e outros tratamentos cancelados a segunda feira, cando servizos como o das ambulancias se viron colapsados, con chamadas que tardaron máis de 40 minutos en ser atendidas, indicou o presidente do Sindicato dos Técnicos de Emergência Pré-hospitalar, Rui Lázaro, ao luso Público. Fraxilidade do sistema de saúde Asemade, no marco da extrema vulnerabilidade das infraestruturas esenciais que amosou a interrupción da subministración eléctrica, a Federação Nacional dos Médicos transmitiu a terza feira que, de forma específica, “expuxo a fraxilidade” do sistema sanitario público, polo que insistiu na súa “profunda preocupación e indignación polas graves dificultades” que xerou no “acceso á atención sanitaria”. Á vez, Gonçalo Lobo Xavier, director xeral da Associação Portuguesa de Empresas de Distribuição, sinalou á canle RTP 3 que a maioría dos supermercados abriron a terza “con gran parte da operación reposta” ou que se prevía estivera “completamente reposta durante o día”. Sánchez anuncia unha comisión de investigación e esixirá responsabilidades aos operadores privados A prensa lusa relata que, unha vez constatada a envergadura da apagada, moitas persoas optaron por dirixirse aos supermercados (algúns deles fechados) e aos caixeiros, para contar con diñeiro en efectivo, nos que se rexistraron longas filas, mentres que co paso das horas e entre o fechamento xeneralizado do comercio foron os poucos estabelecementos de restauración cuxa cociña non dependía da electricidade os que atraeron todas as olladas. A medida que a subministración ía volvendo paulatinamente en distintos puntos do país tamén se produciron celebracións entre a poboación, nunha xornada na que entre as principais incidencias en múltiples localidades estiveron os rescates de persoas atrapadas en ascensores, 83 só na capital lusa, Lisboa. Montenegro, do conservador Partido Social Democrata (PSD), eloxiou nunha alocución durante o Conselho de Ministros a actuación da poboación e das e dos profesionais implicados, e enumerou unha serie de medidas que porán en marcha, como solicitar unha auditoría á Axencia de Cooperación dos Reguladores de Enerxía da Unión Europea (UE) “perante un problema serio que non tivo orixe en Portugal” ou crear unha comisión independente neste sentido con especialistas en enerxía ou sistemas e comunicacións. Ao tempo, adiantou que non se prolongará a declaración de crise enerxética e que se autorizará a circulación de vehículos pesados na fin de semana. En última instancia, sostivo que se impulsará unha ampliación dos sistemas de arranque de emerxencia nas centrais eléctricas, que permiten reactivalas sen axuda externa. O primeiro ministro defendeu a “rapidez” na resposta gobernamental, cuestionada polo envío dunha mensaxe de Protección Civil só cinco horas despois do apagamento, que xustificou coa súa intención de dar prioridade ao contacto coa poboación a través da radio. Sexa como for, recoñeceu o “mal funcionamento” do Sistema Integrado de Redes de Emergência e Segurança, aducindo que isto non é novo. A apagada derivou na suspensión do debate previsto na noite da segunda feira entre Montenegro e Pedro Nuno Santos, secretario xeral do Partido Socialista (PS), o último dos choques cara a cara entre as e os candidatos das forzas con representación de cara aos comicios adiantados do 18 de maio, e que será a cuarta. O socialista fixo énfase a terza en que “o máis grave é que tamén tivemos un apagamento no Goberno”, que “fallou na comunicación e, sobre todo, no deber de protexer e informar os cidadáns a tempo”. Santos tamén abundou en que “as experiencias dos últimos meses xa mostraran que incompetente é este Goberno para xestionar momentos de crise”, criticando que ante as carencias na resposta do Executivo “estivemos bastante tempo con noticias falsas e alarmantes a circular”. O certo é que, recolle unha recompilación do Diário de Notícias, as novas falsas multiplicáronse pola apagada, con supostas informacións nas que a UE acusaba “grupos rusos apoiados polo Estado” (Bruxelas reiterou que non conta con indicios de que fora un ciberataque) ou a axencia Reuters publicando que REN atribuíra o acontecido a un “fenómeno atmosférico” no Estado español antes de recuar. O pobo luso conmemora 51 anos da Revolución e 50 desde as primeiras eleccións libres Ao respecto, Montenegro asegurara que “todo apunta” a que a orixe do ocorrido está no Estado español, rexeitando descartar calquera opción como xa fixera nas primeiras horas Manuel Castro Almeida, ministro de Coesão Territorial. O Centro Nacional de Cibersegurança recalcou que non ten evidencias de que se tratara dun ataque cibernético. Interdependencia co Estado español “Hoxe, Portugal é autónomo, traballamos unicamente coa enerxía producida no noso país”, destacou a terza á canle SIC Notícias Miguel Pinto Luz, ministro das Infraestruturas, e o primeiro ministro Montenegro fixo fincapé en que a apagada non se debeu á insuficiencia na capacidade de produción e distribución eléctrica lusa, senón á interdependencia coa rede española. “Non é unha cuestión de autonomía”, subliñou. Amais, explicou que o país só conta con conexión co Estado español, que se viu axudado para restabelecer a normalidade polas ligazóns con Francia e Marrocos, e que “as limitacións de interconexión de España, especialmente con Europa, tamén afectan á capacidade de subministración” lusa, salientando a importancia de fortalecer as interconexións europeas para gañar autonomía enerxética.