O Polisario reclama presión internacional contra Marrocos pola espionaxe no Estado español

A sentenza da Audiencia Nacional española que revelou a existencia no Estado dunha rede de espionaxe de Marrocos desde 2010 orientada á Fronte Polisario e á comunidade marroquí, feita pública a segunda feira, “pode sorprender calquera menos ao pobo saharauí ou á Fronte Polisario”, recalcou a terza feira en declaracións a Nós Diario Abdulah Arabi, representante da organización no Estado español. Arabi incidiu en que para Rabat a loita pola liberación do territorio saharauí é unha “preocupación de primeira orde”, polo que “non escatima ningún esforzo para seguir e perseguir o noso traballo para intentar neutralizalo”. Asemade, ao respecto das cifras de militantes da Fronte Polisario espiados, subliñou que “non é cuestión de datos, só de saber que calquera funcionario ou militante está baixo ese paraugas da espionaxe”. Nese sentido, apunta que “sempre traballamos mantendo as precaucións necesarias”, polo que esta nova información “non vai influír en nada, ao revés, imos redobrar o noso esforzo para acelerar a descolonización do territorio ocupado do Sáhara Occidental e tratar de que retornen as refuxiadas e refuxiados”. Polo de agora, a formación que preside a República Árabe Saharauí Democrática non presentou denuncias relacionadas coa espionaxe, o que Arabi explica pola impunidade de Marrocos, facendo fincapé en que Rabat espiou até xefes de Estado de Europa “e non se levou ningunha acción para non incomodalo”, salientando que “os países que operan fóra da legalidade internacional deben ser denunciados masivamente por todos os que respectan os valores da democracia, da non inxerencia e do respecto mutuo”, ratificando que o traballo da Fronte Polisario “axústase á legalidade e ao dereito internacional”. O veredicto A resolución da Xustiza española denegou a nacionalidade a un home procedente de Marrocos por un informe do Centro Nacional de Intelixencia (CNI) que desvelou que desde 2010 colaboraba cos servizos de Intelixencia de Marrocos, “cando mantivo contacto co xefe deles”, recolle a sentenza. Por iso, o CNI recomendou que se lle negase o pasaporte “por motivos de orde pública ou interese nacional”. Medios estatais sosteñen que no mínimo cinco peticións de cidadáns marroquís para obter a nacionalidade española foron rexeitadas pola Xustiza nos últimos 11 anos por informes semellantes por parte do CNI. No verán de 2021, meses antes de que o presidente español, Pedro Sánchez, mudara a posición estatal sobre o Sáhara Occidental asumindo a proposta de autonomía de Marrocos para manter o territorio ocupado, un informe reservado do CNI destacou que o país africano dedicaba “bastantes recursos” para “premer o Goberno español para conseguir unha posición favorábel a Marrocos no contencioso do Sáhara Occidental”, ademais de debullar a estratexia xudicial e mediática que lanzou Rabat contra Brahim Ghali. Ghali, líder da Fronte Polisario e presidente da República Árabe Saharauí Democrática, foi ingresado por Covid-19 nun hospital de Logroño en abril de 2021, un mes despois, no medio da crise diplomática entre Madrid e Rabat, máis de 8.000 persoas entraron en Ceuta ao abandonar a Policía marroquí as súas posicións na fronteira. Porén, o Executivo español negouse a culpar Marrocos pola situación. En xullo de 2021, Sánchez destituíu a titular de Exteriores, Arancha González Laya, após exixilo Marrocos como unha condición para recuperar os lazos bilaterais. Aliás, a comisión da Unión Europea que investigou o uso de programas espías considerou que Rabat é o autor “máis plausíbel” da espionaxe a Sánchez, Laya e outros ministros por medio de Pegasus, unha aplicación instalada nos seus teléfonos. Chantaxe e manipulación Arredor desa cuestión, Arabi pon o foco en que “todas as posicións adoptadas por países democráticos que son contrarias ao dereito internacional e favorecen as pretensións expansionistas de Marrocos sempre están baseadas na chantaxe e na manipulación”, non só pola espionaxe, engade, “senón tamén co uso dos fluxos migratorios ou da presión dos acordos económicos”. Amais, afirma que Marrocos non mudará o seu modus operandi até que “a comunidade internacional non prema nese sentido” e “faga entender a Marrocos que ten que moverse na escena internacional dentro dos parámetros convencionais das relacións internacionais que caracterizan o mundo actual”. As ONG alertan da situación dos refuxiados en Tindouf Unhas 173.000 refuxiadas e refuxiados saharauís nos campamentos de Tindouf, en Alxeria, están nunha situación “alarmante”, trasladaron onte máis dunha decena de organizacións non gobernamentais que operan na zona coincidindo co Día Mundial das Persoas Refuxiadas, sinalando que o aumento da inflación “impacta sobre recursos xa extremadamente limitados para unha poboación que subsiste case exclusivamente da axuda humanitaria”. Máis da metade das crianzas menores de cinco anos padecen anemia e o “acceso á auga” é “insuficiente”. O representante do Polisario confirma esta situación límite, acrecentando o efecto da redución de doazóns internacionais e facendo un chamamento ás institucións do Estado español para aumentar a cooperación e manter a axuda de forma permanente. Aínda así, lembrou que a crise humanitaria responde á falta dunha solución política para acabar coa ocupación marroquí dos territorios do Sáhara Occidental. Represión marroquí Arabi tamén denunciou as "atroces violacións de dereitos humanos que sofren as e os activistas na parte ocupada por parte das forzas marroquís", "sobre todo paramilitares", ese “é o pan de cada día na parte ocupada do Sáhara Occidental”, resolveu.