O pobo peruano preme o Congreso para votar en 2023

Milleiros de persoas ateigaron a terza feira Lima, a capital do Perú, nunha nova marcha de carácter nacional que tamén se replicou noutras partes do país para exixir o mesmo que veñen reclamando desde a destitución do ex presidente Pedro Castillo o 7 de decembro de 2022, a súa liberación, a renuncia da mandataria actual, Dina Boluarte, a convocatoria de eleccións inmediatas e o inicio dun proceso constituínte. En paralelo, as e os manifestantes manteñen 69 cortes de estrada en oito rexións a pesar da decisión do Executivo de Boluarte de enviar a acabar cos bloqueos a Policía e o Exército, executores dunha vaga de represión no país que provocou máis de 60 mortes nas que hai que incluír o falecemento de oito menores de idade, a meirande parte dos óbitos foron asasinatos por disparos das forzas de seguridade. A presión medra cada día máis na capital coa chegada de múltiples caravanas procedentes das zonas máis desfavorecidas do país, que resolveron acudir a Lima coa esperanza de que na cidade si sexan escoitadas as súas demandas, e que están a sufrir tamén o incremento de ataques de grupos de extrema dereita, relata IDL-Reporteros. O Congreso peruano rexeita adiantar as eleccións a este ano Debate no Congreso Así e todo, a urxencia da situación non se reflicte no Congreso dominado polos conservadores, onde se volveu debater un adianto electoral para que os comicios decorran en outubro deste ano e non en 2024, como aprobaran co apoio da extrema dereita coa esperanza de impulsar modificacións legais que lles faciliten a vitoria nas urnas, así como outras propostas de corte neoliberal ou vinculadas ás normas referentes aos congresistas como a prohibición de reelixirse, un extremo que aspiran a mudar nesta marxe de tempo. Á hora de feche desta edición o Congreso estudaba a iniciativa, nun debate no que a esquerda incide en que o adianto electoral ten que ir da man dun referendo para que a poboación poida optar por desenvolver unha asemblea constituínte, unha proposta negada desde a extrema dereita, que non aceptou a posibilidade de que as eleccións decorreran este ano até que Forza Popular a avalou agardando capitalizar a súa fortaleza organizativa nos comicios, apuntan diversos medios do Perú. Boluarte desata unha represión indiscriminada na capital do Perú No que atinxe ao primeiro asasinato en Lima pola represión, probas audiovisuais publicadas a pasada madrugada por La República confirman que Victor Santisteban, un peruano de 55 anos, morreu tras recibir o impacto na cabeza dunha bomba lacrimóxena disparada pola Policía o 28 de xaneiro en Lima. A vítima non participaba nas protestas, senón que se atopaba na urbe por motivos laborais. As evidencias contradín o Executivo de Boluarte, que deixara entrever que o falecemento se producira polo impacto dunha pedra lanzada polos propios manifestantes. "Posíbeis crimes de dereito internacional" Este nivel de represión, da que a Coordinadora peruana de Dereitos Humanos destacou os efectos do racismo entre as elites do país ao producirse boa parte dos asasinatos de manifestantes en zonas con poboación indíxena e desfavorecidas economicamente, levou a Amnistía Internacional a facer pública a chegada ao país dun equipo especializado “que só se desprega en situacións de extrema gravidade cando existen indicios de posíbeis crimes de dereito internacional”, explicou, co obxectivo de investigar as violacións dos dereitos humanos. Marina Navarro, directora executiva da entidade no país, solicitou a Boluarte que “deteña a violenta represión das manifestacións por parte das forzas de seguridade” e aplique “cambios substanciais e estruturais para que todas as persoas no Perú poidan gozar os seus dereitos humanos e vivir con dignidade”. Manifestación masiva en Lima para exixir a renuncia de Dina Boluarte A OEA pide eleccións Con respecto á convocatoria electoral, a Organización dos Estados Americanos fixo un chamamento a “eleccións xerais xustas, libres e transparentes con observación electoral internacional” para asegurar “a institucionalidade e gobernabilidade democrática”, pedindo tamén rendición de contas polos crimes contra a poboación. Aínda que a Fiscalía está a investigar as mortes, tanto o control das elites conservadoras das institucións xudiciais usadas para perseguir a Castillo -e que posteriormente se aliaron con Boluarte e as Forzas Armadas para manter a mandataria no poder-, como a impunidade histórica dos militares nas execucións extraxudiciais de manifestantes, fai difícil que este proceso implique que os culpábeis sexan perseguidos pola Xustiza do país americano. Á vez, a presidenta defende que a actuación das forzas de seguridade está a ser “inmaculada” e desvincula as protestas de reivindicacións políticas, incidindo en que se trata dunha cuestión de seguridade máis relacionada co terrorismo, o que reforza a tese das organizacións en defensa dos dereitos humanos de que a represión é unha política de Estado e non unha decisión exclusiva das forzas de seguridade. A maioría da poboación defende as protestas Outra das mensaxes reiteradas desde o Executivo foi que as exixencias das manifestacións eran algo delimitado a determinadas zonas do país mais non compartidas pola maioría. Porén, un estudo demoscópico elaborado polo Instituto de Estudos Peruanos amosa que a realidade é diferente ao que o Goberno loita por transmitir. Até 73% da poboación considera que as eleccións xerais deberían decorrer este ano, 74% cree que Boluarte debería renunciar, 59% está identificada coas protestas e 69% pide convocar unha asemblea constituínte, uns datos con concordancia en todas as zonas do país. Unha constituínte "antixurídica" Aínda que é unha das principais peticións populares, o Tribunal Constitucional peruano deixara claro no contexto da proposta de Castillo de lanzar unha asemblea constituínte que sería “antixurídica” e “só posíbel mediante un acto contrario ao dereito”, polo que ameazou con vetar a substitución da constitución elaborada en 1993 durante a ditadura de Alberto Fujimori no caso de que non se modifique antes a carta magna para incluír esta posibilidade, na sentenza que avalou que o Congreso retirara o presidente a capacidade de convocar un referendo sobre esta cuestión.