Unha nova flotilla navega rumbo a Gaza coa intención de desafiar o bloqueo israelí e entregar axuda humanitaria

Unha nova flotilla conformada por unha decena de barcos navega rumbo á Faixa de Gaza para tratar de romper o bloqueo imposto por Israel e entregar axuda humanitaria, días despois de que os máis de 40 buques da Global Sumud Flotilla foran interceptados en alta mar polas forzas israelís.

Perto de 150 persoas viaxan agora a bordo de nove veleiros que partiron o 27 de setembro desde Catania e do 'Conscience', que partiu a pasada terza feira desde o porto desde Otranto. O 'Conscience' xa foi atacado a principios de maio por drones en augas internacionais fronte ás costas de Malta.

Esta nova Flotilla da Liberdade atópase ao sur da illa grega de Creta, sen que polo de agora estea claro cando chegarán á zona de exclusión declarada ilegalmente por Israel nas augas que rodean a Faixa de Gaza e na que se produciu a interceptación dos barcos da Global Sumud Flotilla.

As autoridades israelís xa advertiron de que frearán calquera intento de entrar nunha "zona de combate activo" e deterán todos e todas as tripulantes dos barcos que aspiren a chegar á Faixa. Actualmente, ten baixo arresto máis de 400 activistas que previsibelmente serán deportados a Europa nos próximos días.

Secuestrado o último barco da Global Sumud Flotilla

O Exército de Israel interceptou esta sexta feira o último barco da Global Sumud Flotilla que aínda navegaba cara á Faixa de Gaza, tras abordar ilegalmente esta semana outras 41 embarcacións que levaban axuda humanitaria en augas sobre as que non ten ningún tipo de soberanía, secuestrando perto de 470 activistas que ían a bordo da iniciativa humanitaria.

#BREAKING 🚨

Israeli soldiers have boarded the Marinette of the #GlobalSumudFlotilla and taken the activists captive.

The livestream ended abruptly after a soldier smashed the camera upon boarding. 🚢🇵🇸 pic.twitter.com/mQia5ZklY4

— Global Sumud Flotilla (@GlobalSumud) October 3, 2025

Desta maneira, o 'Marinette', que sufriu problemas técnicos durante o percorrido e ía por detrás do resto de embarcacións da flotilla, foi abordado á primeira hora desta sexta feira por un grupo de militares israelís armados, segundo mostra a retransmisión en directo desde a embarcación, que se corta pouco despois da interceptación despois de que un dos soldados agarre a cámara.