Nova coalición electoral: Sumar, Comuns, IU e Más Madrid presentarán o 21 de febreiro a súa proposta para as eleccións estatais

Movemento Sumar, Comuns, Izquierda Unida (IU) e Más Madrid mostrarán a súa vontade de confluír xuntos e sentar as bases para unha nova coalición para as vindeiras eleccións estatais nun acto que terá lugar o próximo 21 de febreiro en Madrid, segundo indicaron fontes coñecedoras da decisión.

As catro formacións que forman parte do Goberno de coalición pola cota do socio minoritario estreitaron lazos de colaboración durante os últimos meses e traballaron de forma discreta para mostrar á cidadanía durante o primeiro trimestre de 2026 a súa intención de relanzar o espazo á esquerda do PSOE.

Só quedaba por definir a data exacta para lanzar este novo proxecto político e os catro partidos xa acordaron que sexa o día 21, no Círculo de Belas Artes de Madrid. Con todo, hai aspectos pendentes de concretar, como os dirixentes que tomarán a palabra no devandito evento, expoñen as mesmas fontes.

Aliás, subliñan que Sumar, Más Madrid, IU e Comuns coinciden en que o espazo da esquerda alternativa debe basearse “en parámetros de horizontalidade e cooperación fraterna entre os distintos partidos”, blindando á súa vez a autonomía de cada organización.

Armar un espazo “sólido” e fortalecer “alianzas”

Fontes das catro organizacións detallaron que o día 21 principia a saída para construír unha alianza “común, compartida e aberta”, para as próximas estatais mediante un espazo que sexa "sólido e confiábel ao longo do tempo". De feito, a súa idea é que transcenda o plano electoral e activar unha mobilización social progresista. "A nosa vontade é fortalecer a alianza que xa desenvolvemos nestes anos de Goberno. Aprender dos erros e potenciar os acertos", apuntan Sumar, Comuns, IU e Más Madrid, que queren abrir este proxecto ao conxunto de forzas políticas e sociais que están "hoxe preocupadas polo futuro" do país.

Neste senso, expoñen que o día 21 será unha "posta de longo e unha invitación" para armar un novo proxecto, desde a "apertura", a "xenerosidade", a "pluralidade", do "acordo" e da "forza compartida". "É o principio, é o primeiro paso. Imos ir moito máis alá", sentencian.

As catro formacións apuntaron durante estas semanas que primeiro queren marcar as pautas programáticas e a vontade política de reeditar o espazo que se iniciou coa coalición Sumar e abrilo a máis integrantes, para deixar para outra fase posterior a cuestión da marca e os liderados.

Por exemplo, o coordinador federal de IU, Antonio Maíllo, xa apuntou no seu último informe político que a confluencia tiña que ter un novo nome e que fose distinto ao dos partidos que o integren. Mentres, a coordinadora de Movemento Sumar, Lara Hernández, expuxo que para a futura coalición a cuestión de nomes e das persoas referentes do espazo estaba a debate.

Neste senso, a coordinadora dos Comuns, Candela López, dixo que era "imprescindíbel" esta reformulación da coalición "para facer que a unidade sexa efectiva" mentres Maíllo expuxo que había que actualizar ao espazo.