"Non sabes se mañá tomarán unha decisión que poida prexudicarte sen sequera avisarte": Trump farta os seus propios aliados da OTAN

Donald Trump, o presidente dos Estados Unidos, afirmou nunha entrevista con The Telegraph que o seu Goberno está "máis que considerando" a saída dos EUA da OTAN, afondando nas críticas aos aliados por non secundar Washington na guerra no Irán. Deste modo, preguntado esta cuarta feira sobre se considera abandonar a alianza militar unha vez acabe o conflito no Irán, respondeu que "si", que é algo que vai "máis alá da consideración". "Nunca me convenceu a OTAN. Sempre souben que era un tigre de papel", dixo engadindo que o presidente de Rusia, Vladimir Putin, "tamén o sabe, por certo". Trump puxo de manifesto que a OTAN non apoiou Washington na súa agresión conxunta con Israel contra Irán, nin na reapertura do estreito de Ormuz. "Máis aló de non estar alí, a verdade é que custaba crelo. E non insistín moito. Simplemente dixen: 'Oian'. Xa saben, non insistín demasiado. Simplemente creo que debería ser automático", aseverou o presidente dos EUA. "Sempre estivemos aí, mesmo con Ucraína. Ucraína non era o noso problema. Foi unha proba, e estivemos aí para eles, e sempre estariamos aí para eles. Eles non estiveron aí para nós", sinalou antes de cargar directamente contra o primeiro ministro do Reino Unido, Keir Starmer. Trump ameaza os aliados da OTAN nun novo intento de forzalos a intervir en Ormuz: "Os Estados Unidos xa non estarán aí para axudalos" "Nin sequera tedes unha armada. Sodes demasiado vellos e tiñades portaavións que non funcionaban", afirmou Trump referíndose ao estado da frota de buques de guerra británica, nunha retórica militarista que xa iniciara as fracturas no seo da OTAN, ao querer impor os Estados Unidos 5% do PIB destinado a gasto militar en todos os aliados da alianza transatlántica. Precisamente, cuestionado sobre se o primeiro ministro do Reino Unido debería aumentar o gasto militar, Trump engadiu non lle ía "dicir que facer". "Pode facer o que queira. Non importa. O único que quere Starmer son custosos muíños de vento que están a disparar os prezos da enerxía", acrecentou o presidente dos Estados Unidos. Posteriormente, The Wall Street Journal informou de que Trump expuxo na Casa Branca a cuestión da retirada da OTAN. Segundo o xornal, fixo comentarios en privado co secretario de Estado, Marco Rubio, e outras persoas, ao respecto, mais o presidente non tomou unha decisión definitiva. Contestación aliada Tras as declaracións de Trump, Starmer reafirmou o seu apoio á OTAN, describíndoa como "a alianza militar máis eficaz que o mundo vise xamais". Porén, o primeiro ministro deu a entender que buscaría unha relación máis estreita cos aliados europeos en resposta á deterioración das relacións cos EUA e afirmou que, "a pesar das críticas", actuaría en interese británico. "Esta non é a nosa guerra, e non imos deixarnos arrastrar a ela", dixo sobre o conflito no Irán para anunciar a continuación que porá en marcha unha cimeira a finais desta semana con aliados para estudar "medidas diplomáticas e políticas" que contribúan á reapertura da navegación no estreito de Ormuz. Pola súa parte, a Unión Europea tamén reafirmou esta cuarta feira o seu compromiso coa alianza militar. "Non falamos como tal en nome da OTAN, mais si falamos en nome da UE no que respecta á nosa seguridade e defensa. E, por suposto, estamos comprometidos cun forte vínculo transatlántico, que segue sendo crucial para a nosa seguridade", remarcou a portavoz comunitaria de Exteriores, Anitta Hipper. Irán denuncia ataques de falsa bandeira e advirte os EUA de que camiñan cara a outro Vietnam Pola súa parte, o presidente francés, Emmanuel Macron, defendeu na súa visita oficial no Xapón a "previsibilidade" de Europa en contraste coas accións de potencias que toman decisións "sen avisar", en referencia aos EUA, que ameazan agora con saír da OTAN por non recibir axuda nun conflito no Irán que comezaron de forma unilateral e sen consulta aos aliados. "Non sabes se seguirán nesa posición pasadomañá, ou se mañá non tomarán unha decisión que poida prexudicarte sen sequera avisarte", indicou o líder galo. Irán desminte Trump E, precisamente, neste contexto, a axenda de Trump recollía unha declaración institucional á cidadanía dos Estados Unidos que tería lugar ás 21 horas de Washington (ás 3 horas desta quinta feira na Galiza, cando está edición xa estaba na imprenta). En contraposición, o presidente do Irán, Masoud Pezeshkian, emitirá unha carta cunha mensaxe importante destinada ao pobo dos Estados Unidos de América. Antes, Trump asegurou que o novo presidente do Irán (continúa Pezeshkian, polo que probabelmente se refería ao novo líder supremo, Motjaba Khamenei) solicitou un cesamento do fogo. "O novo presidente, moito menos radical e moito máis intelixente, acaba de pedir un cesamento do fogo", sinalou, algo que só considerará coa navegación en Ormuz "clara, aberta e libre". "Até entón, imos reducir Irán a cinzas ou, como din, devolvelo á Idade de Pedra", concluíu. Mais o portavoz do Ministerio de Exteriores iraniano, Esmail Baghaei, dixo que as afirmacións de Trump sobre o cesamento do fogo eran "falsas e carecen de fundamento". Pola súa parte, a Garda Revolucionaria do Irán sinalou que o estreito de Ormuz está "firmemente" baixo o seu control, e agregou que "non se abrirá aos inimigos desta nación polas ridículas demostracións do presidente dos EUA". Ademais, o ministro de Exteriores iraniano, Abbas Araqchi, afirmou que só Irán e Omán teñen o control territorial das augas do estreito, e que seguirán decidindo o futuro desta ruta cando acabe o conflito. Irán reafirma o seu apoio a Hezbolá e critica o xenocidio do pobo palestino Mojtaba Khamenei, o líder supremo do Irán, aplaudiu esta cuarta feira nunha carta ao secretario xeral de Hezbolá, Naim Qassem, o liderado da organización na "resistencia" ante Israel insistindo en que a súa política continuará sendo a de apoio ao grupo libanés. Ademais, o Goberno iraniano denunciou que a decisión do Parlamento de Israel de introducir a pena de morte para executar palestinos condenados pola morte de israelís forma parte "da política de xenocidio e erradicación do pobo de Palestina". Ao respecto, o Alto Comisionado de Nacións Unidas para os Dereitos Humanos, Volker Turk, advertiu de que a nova lei israelí constitúe un crime de guerra. "É claramente incompatíbel coas obrigacións de Israel en virtude do Dereito Internacional, incluídas as relativas ao dereito á vida. Suscita graves preocupacións sobre violacións do debido proceso, é profundamente discriminatorio e debe ser derrogado de inmediato", manifestou o representante da ONU. O Exército israelí, perto do "colapso" por sobreestimar a súa capacidade ante tantas frontes abertas Mentres tanto, Israel continúa coa súa invasión contra o Líbano. Ataques lanzados esta cuarta feira contra distintos puntos de Beirut, capital de Líbano, saldouse con polo menos sete persoas mortas e 24 feridas. En concreto, cinco persoas foron asasinadas no barrio de Jnah, nunha ofensiva con xa máis de 1.250 persoas mortas no Líbano, 3.750 feridas e máis dun millón de desprazadas. E, neste contexto, outra nova fronte está cada vez máis aberta, pois os hutís do Iemen reivindicaron a autoría do seu terceiro ataque con mísil sobre Israel desde o inicio dos EUA e o Estado sionista contra Irán, onde os ataques inimigos xa deixaron máis de 2.000 mortes. O país persa tamén atacou esta cuarta feira con forza Israel.