Netanyahu fai caso omiso das críticas e redobra as súas ameazas contra Palestina

As familias israelís das persoas que continúan como reféns de Hamás na Faixa de Gaza denunciaron esta terza feira o "terrorismo psicolóxico" do primeiro ministro de Israel, Benjamin Netanyahu, ao que acusaron de "xogar cos seus sentimentos" en relación a un acordo para a súa liberación co grupo palestino. As organizacións que agrupan as familias afectadas solicitaron, ademais, pór fin á ofensiva na faixa e chegar canto antes a un pacto con Hamás para lograr o regreso a Israel destas persoas. Unha petición á que se suman, mentres tamén medra a presión internacional, as familias das 41 reféns que morreron no territorio palestino, que alertaron das "graves consecuencias que pode implicar o aumento dos enfrontamentos na zona" e o "perigo significativo" que supón para as persoas que seguen prisioneiras. Israel pide evacuar o sur de Gaza ante un inminente "ataque sen precedentes" Susana Mangana, experta en mundo árabe e colaboradora do Instituto Galego de Análise e Documentación Internacional (Igadi), en conversa con Nós Diario, considera que "neste conflito quedou moi claro desde o principio que o obxectivo non era nin traer de volta os reféns con vida nin negociar moito con Hamás". Para ela, a intención de Netanyahu "foi e segue sendo desprazar os palestinos de Gaza e poder ocupar eses territorios". Susana Mangana, experta en mundo árabe: "A combinación de presións internacionais e críticas internas coloca Netanyahu nunha posición complexa" Alén das protestas destas familias, di, "Netanyahu ten presión da xustiza polas súas leas xudiciais anteriores ao ataque de Hamás do 7 de outubro". Ao respecto, engade, "utilizou toda esta cortina de fume para seguir evadindo e eludindo a xustiza". Ademais, destaca a experta, máis que por parte de quen se opón á agresión, "sobre todo ten presións dos grupos de extrema dereita e ministros mesiánicos que queren colonizar de novo Gaza e se é posíbel Cisxordania". Un argumento do que coincide o analista internacional e director de Descifrando la Guerra, Alejandro López, que en declaracións a Nós Diario, sinala que "si que hai presión interna en Israel, mais non no sentido que poida parecer". Alejandro López, analista internacional: "Os partidos da oposición priorizan as relacións con occidente e queren evitar que Israel sexa un estado paria" A este respecto, explica o experto en conflitos, "practicamente todos os partidos do arco parlamentario, tanto no Goberno como na oposición, mostraron a súa conformidade con operacións en Palestina para eliminar as capacidades de Hamás, mais que na práctica poderían implicar ir máis alá, incorrendo na limpeza étnica, xa sexa a través dun exterminio ou a través dunha expulsión que eles cualifican de migración voluntaria". "Tamén vimos a nivel social moitas sondaxes que nos indican que existe un amplo apoio en Israel a unha limpeza étnica", engade López. "O problema é con respecto á operación, hai moito desgaste entre as forzas armadas e entre os partidos da oposición, posto que aínda que hai sectores moito máis belicistas que o de Netanyahu (como a extrema dereita dentro do Goberno), hai outros partidos que non o son tanto e priorizan as relacións con occidente", sinala. Presión interna relativa "Son sectores máis liberais e de dereita secular ou incluso os demócratas de herdanza laborista, que ao final están priorizando unhas relacións con occidente e evitar que Israel se converta nun estado paria", acrecenta. "Incluso entre a poboación hai unha crítica a esta operación, especialmente entre as familias dos reféns", destaca o experto. Porén, di, "o tema dos reféns xa pasou a ser o último dos obxectivos na nova operación 'Carros de Xideón', na que se dá prioridade á destrución das capacidades de Hamás ou incluso ao cambio do statu quo na Faixa de Gaza". 80 Estados exixen protexer os civís ante a dramática situación en Gaza "Aí vese como hai un amplo rexeitamento á operación de ocupación da Faixa de Gaza polo que supón manter a guerra a todos os niveis (político, diplomático e económico), mais si que se apoia esa consecuencia que podería ser o fin da Gaza palestina", afirma. "Ese é o matiz, hai presión interna mais non realmente con respecto aos obxectivos senón respecto ao medio. O que buscan algúns sectores opositores é un acordo de cesamento do fogo, que se liberen os reféns, que a guerra pare e que se promova dalgunha outra maneira a colonización ou o cambio do statu quo na Faixa de Gaza", conclúe. O papel dos Estados Unidos na negociación "Aquí quen ten a chave para presionar Netanyahu son os Estados Unidos", afirma Susana Mangana. Na súa opinión, Steven Witkoff, "o negociador para case todo (no só en Oriente Medio) de Donald Trump [o presidente dos Estados Unidos] é o que ten que presionar". "Hai unha tensión evidente con Trump, quen está dalgún modo manifestando que perde a paciencia con Netanyahu, mais tampouco perdamos de vista que non lle vai soltar a man e que os EUA van seguir sendo o maior defensor de Israel", conclúe. E neste contexto, Hamás asegurou esta terza feira ter aceptado a proposta presentada polos Estados Unidos para lograr un novo cesamento do fogo na Faixa de Gaza e afirmou que o grupo está esperando a resposta de Israel, segundo o diario palestino Filastin. Porén, Witkoff negou a Reuters ter chegado a un acordo, e cualificou a negociación de "completamente inaceptábel". Tensión internacional Ao tempo, a presidenta da Comisión Europea, Ursula von der Leyen, advertiu esta terza feira de que, o "uso desproporcionado da forza" sobre a poboación "non ten xustificación". Así, tras falar co rei Abdalá II de Xordania, cualificou de "aberrante" a expansión da ofensiva israelí e reclamou ás partes un cesamento do fogo. Alemaña recoñece un debate interno sobre un posíbel embargo de armas ao Estado israelí Pola súa parte, o chanceler de Alemaña, Friedrich Merz, afirmou que o seu Goberno está inmerso nun debate sobre o alcance da súa colaboración con Israel. Desta maneira, acrecentou que a posibilidade de suspender as vendas de armas "é obxecto de consultas internas" dentro do Executivo xermano. Posteriormente, o ministro de Exteriores de Alemaña, Johann Wadephul, rexeitou que Israel empregue as acusacións de antisemitismo para exercer presión no marco do debate que foi iniciado no Executivo xermano. Cineastas palestinos comparten as súas películas en liña e de forma gratuíta: aquí tes a lista Ademais, o Goberno irlandés aprobou un proxecto de lei para prohibir as importacións desde os territorios palestinos ocupados por Israel. "En moitos sentidos, esta é unha medida pequena, mais é imperativo que todos os países fagan todo o que se poida", dixo o ministro de Exteriores de Irlanda, Simon Harris. Netanyahu ameaza coa adhesión de máis territorio en Cisxordania ante a presión Por outra parte, o ministro de Asuntos Estratéxicos de Israel, Ron Dermer, ameazou coa anexión de territorios de Cisxordania –onde esta terza feira o Exército israelí asasinou novamente un cidadán palestino– se Francia e o Reino Unido, entre outros, recoñecen o Estado palestino. "Netanyahu está recibindo moitas presións internacionais de países que até agora estiveran nunha tesitura máis ben morna, e refírome concretamente á Unión Europea", di Susana Mangana. "A combinación de presións internacionais, críticas internas e consideracións políticas coloca Netanyahu nunha posición complexa. Se ben mantivo unha postura firme respecto á ofensiva en Gaza, os factores mencionados poderían influír nun cambio de estratexia que conduza a un cesamento do fogo e unha posíbel busca de solucións diplomáticas ao conflito", sinala a colaboradora do Igadi. Máis de 54.000 mortes Mentres tanto, o número de vítimas derivadas da ofensiva israelí non deixa de medrar, superando xa as 54.000 mortes. O Ministerio de Saúde de Gaza informou esta terza feira de que 79 persoas palestinas morreron e 163 resultaron feridas na faixa nas 24 horas previas ao comunicado. Segundo o departamento, xa serían 54.056 as falecidas e 123.129 as feridas desde o 7 de outubro de 2023. Ademais, a recrudescencia das agresións israelís sobre Gaza provocou o desprazamento forzoso de case 180.000 persoas en apenas 10 días –entre o 15 e o 25 de maio–, segundo a Organización Internacional para as Inmigracións (OIM), que non inclúe neste reconto as ordes masivas de evacuación emitidas esta segunda feira por Israel tras anunciar un inminente "ataque sen precedentes" no sur do territorio palestino. As organizacións humanitarias estiman que 80% do territorio da faixa ten ordes de evacuación ou está vetado para civís, aínda que en liñas xerais enténdese que "ningún lugar en Gaza pode considerarse seguro". Neste sentido, desde o 18 de marzo, cando Israel rompeu de forma unilateral o cesamento do fogo, máis de 260 localizacións que daban refuxio a unhas 125.000 persoas recibiron ordes de evacuación. En total, perto de 616.000 persoas víronse obrigadas a moverse de lugar na faixa en máis dunha ocasión desde o 18 de marzo, con casos que incluso chegan á decena. Pola contra, durante o cesamento do fogo, máis de medio millón de palestinas volveron aos seus fogares. Voces palestinas desde Galiza no 77º aniversario da Nakba: "Esta é peor que a de 1948" Ante este escenario, Hamás publicou un comunicado no que pide que os días entre o 30 de maio e o 1 de xuño sexan "xornadas de ira global" contra "o xenocidio e a morte por inanición". "Pedimos acción global continuada para deter inmediatamente este holocausto", sinalou o grupo. "É unha violación flagrante de todas as normas e leis internacionais", concluíu.