Negro panorama en Palestina

Hai xa moitas décadas, demasiadas, que o pobo palestino sofre as consecuencias das políticas coloniais do estado de Israel, sendo os milleiros de mortos e os millóns de desprazados as grandes cifras baixo as que se agocha unha historia de opresión continuada. En Israel residen 1,8 millóns de palestinos, cidadáns de segunda que constitúen o 20% da poboación, e os 5,2 millóns que viven en Xerusalén leste, Cisxordania e Gaza, territorios nos que supostamente Palestina constituiría o seu estado, sofren a diaria humillación e arbitrariedade do colonialismo israelí. A discriminación e o maltrato é tal que Amnistía Internacional acusou Israel de impoñer un sistema de apartheid contra a poboación palestina. A expansión dos asentamentos ilegais, o desaloxo de familias palestinas, a confiscación de terras, o roubo de gando e propiedades, a impunidade dos ataques dos colonos, a demolición de casas de familiares de sospeitosos de executar ataques contra Israel, o bloqueo de Gaza, os postos de control... son exemplos dunha política que se prolonga no tempo sen que á comunidade internacional pareza importarlle o máis mínimo o sufrimento do pobo palestino. En Israel viven 1,8 millóns de palestinas e palestinos, 20% da poboación Incapacidade da Autoridade Palestina A poboación palestina, especialmente unha mocidade condenada á frustración e á desesperanza, está farta non só da ocupación israelí, senón tamén da manifesta incapacidade da Autoridade Palestina, con limitados poderes e cada vez máis impopular, para dar resposta ás súas xustas demandas. Con este pano de fondo pódese explicar o aumento dos ataques palestinos contra israelís a comezos de 2022 e o xurdimento de novos grupos armados nos últimos meses en Cisxordania, principalmente en Xinín e Nablús. Moitos destes grupos, que aspiran a rematar coa ocupación israelí, teñen afiliacións coas faccións tradicionais palestinas, mais non están operando baixo o seu control directo. En marzo de 2022 iníciase unha escalada da violencia cando o goberno israelí lanza a brutal campaña militar “Romper a onda” en Cisxordania, co foco en Xinín e Nablús. As frecuentes incursións israelís nos territorios ocupados e o ataque á franxa de Gaza no mes de agosto causaron a morte de 224 palestinos, convertendo 2022 no ano máis mortífero para os palestinos desde 2004, segundo datos da ONU. Pola súa banda 30 persoas faleceron en Israel por ataques palestinos o pasado ano. Mais as cousas non fixeron senón empeorar tras a toma de posesión o pasado mes de decembro do novo goberno de coalición israelí liderado por Benjamin Netanyahu, o máis ultradereitista, racista e relixioso da historia de Israel, que impulsou unha axenda extremista con medidas como armar a poboación israelí, expandir os asentamentos ilegais en Cisxordania, acelerar a demolición de casas palestinas en Xerusalén leste, facilitar a revocación da cidadanía e residencia de palestinos en Israel e Xerusalén leste, impoñer medidas de castigo contra os presos palestinos, prohibir bandeiras palestinas…, mentres voces no seo do goberno apostan abertamente por anexionar Cisxordania e ampliar a pena de morte para os palestinos que ataquen israelís. Amais, o novo goberno israelí, dominado por ultranacionalistas que se opoñen á independencia palestina, intensificou as incursións militares nos territorios ocupados, particularmente no norte de Cisxordania (Xinín e Nablús), co obxectivo de esmagar a limitada, mais crecente, resistencia armada palestina. Por outra banda, envalentonados co novo goberno, a violencia dos colonos, que viña en aumento nos últimos anos, acadou a súa máxima expresión cando varios centos arrasaron Huwara, matando un palestino e incendiando ducias de casas, tendas e coches. Perspectivas 2023 vai camiño de converterse nun dos peores anos de violencia nos territorios palestinos en moito tempo. Polo menos 92 palestinos xa foron asasinados polos israelís até o día de hoxe, o que supón o maior número de mortos nos primeiros meses do ano deste século. Pola súa banda, 14 persoas morreron en ataques palestinos no mesmo período, sendo o que matou 7 persoas preto dunha sinagoga en xaneiro o máis mortífero en Israel desde 2008. É tal a dinámica que numerosos aliados de Israel veñen amosando a súa preocupación e expresando críticas, incluídas as inusuais dos EEUU, en relación á política do novo goberno israelí en materia de asentamentos, pola actuación dos colonos, por declaracións incendiarias de membros do goberno e por unha reforma xudicial que está a dividir o país. Mais a realidade é que, como de costume, non se toma ningunha medida para deter os crimes de Israel.