Compras de armas financiadas pola UE, así pagaría Ucraína as garantías de seguridade dos EUA

As garantías de seguridade a Ucraína ofrecidas polos Estados Unidos non son de balde, confirmou o presidente ucraíno, Volodimir Zelenski, que sinalou que propuxo pagalas coa compra de 77.000 millóns de euros en armamento estadounidense, nunhas adquisicións que serían financiadas polos membros europeos da Organización do Tratado do Atlántico Norte (OTAN), a meirande parte integrados tamén na Unión Europea (UE), recolleron a terza feira medios internacionais. A proposta estaría sobre a mesa, enfatizou, adiantando que podería formalizarse un acordo neste sentido na vindeira semana ou en dez días, e que tamén abranguería a produción de drones. As declaracións realizounas logo da cimeira con Donald Trump, presidente estadounidense, tras a que se uniron ao encontro as e os líderes do Reino Unido, Keir Starmer; Francia, Emmanuel Macron; Italia, Giorgia Meloni; Alemaña, Friedrich Merz; Finlandia, Alexander Stubb; a Comisión Europea, Ursula von der Leyen, e a OTAN, Mark Rutte. O documento co plan foi revelado pouco despois polo Financial Times, que indicou que a oferta ucraína é superior á mencionada por Zelenski: até 85.000 millóns de euros en compras de armas “financiadas por Europa”, cun pacto de 43.000 millóns de euros para facer drones con empresas ucraínas. No texto, unha listaxe de puntos para tratar cos líderes que o acompañaron a Washington, Kíiv segue a promover un cesamento do fogo como paso previo a abordar un acordo de paz, algo impulsado por Bruxelas e que Trump descartou, a pesar do que países como Alemaña insistiron sen éxito nesta vía. Ademais, Ucraína rexeitaría a maioría das condicións enumeradas polo presidente ruso Vladimir Putin para avanzar nas negociacións e finalizar coas hostilidades, asegurando que non aceptará intercambios territoriais, retirar as súas tropas da área de Donetsk que aínda controlan ou conxelar as liñas da fronte en Khersón e Zaporijia. En paralelo, asevera que Moscova debe compensar o Estado ucraíno polos danos da guerra. “Non estamos a dar nada, estamos a vender armas”, insistiu Trump. O seu secretario de Estado, Marco Rubio, reiterou que “xa non damos armas a Ucraína, agora vendémosllas, e os países europeos páganas a través da OTAN”. Xa a mediados de xullo, abrindo a porta a un entendemento similar, Trump anunciara que enviaría sistemas de defensa aérea Patriot a Ucraína, “mais a UE está a pagar por iso”. Garantías de seguridade Na cimeira, da que non se trasladou aínda ningún acordo en firme, abordouse o repartimento de responsabilidades cos membros europeos da OTAN, explicou Trump, que aseverou que, “nun paso moi significativo, o presidente Putin mostrouse de acordo en que Rusia acepte garantías de seguridade para Ucraína”, ratificando que “axudaremos, involucrarémonos” nelas. Situación da fronte de guerra no territorio ucraíno o 19 de agosto de 2025. (Imaxe: Nós Diario) A terza feira, o liderado dos estados membros da UE reuniuse para analizar o acontecido, nunha xuntanza na que o presidente do Consello Europeo, António Costa, porfiou en que o proceso de paz debería comezar cunha tregua. Asemade, Macron e Starmer moderaron unha xuntanza da coalición dos dispostos, na que se integran países que trasladaron a súa intención de enviar tropas a territorio ucraíno para garantir o cumprimento dun hipotético pacto de paz, ao respecto da que Polonia proclamou que “a dinámica se acelerou”. A iniciativa dos membros europeos da OTAN foi apoiada por Trump, que sentenciou que non enviará soldados estadounidenses neste contexto mais coordinarán a operación. Maria Zakharova, voceira do Ministerio de Asuntos Exteriores ruso, retrucou que “reafirmamos a nosa postura de rexeitamento categórico a calquera escenario que contemple a aparición en Ucraína dun continxente militar coa participación de países da OTAN”, algo que implicaría “unha escalada descontrolada do conflito con consecuencias imprevisíbeis”. O titular do Ministerio, Sergei Lavrov, incidiu en que Trump e o seu equipo “desexan sinceramente lograr un resultado duradeiro, sostíbel e fiábel”. Trump descartou despregar tropas en Ucraína como parte das garantías de seguridade, mais si apuntou á posibilidade de participar do "apoio aéreo". E esas “garantías”, ratificou, “virán apoiadas por varios países europeos en coordinación cos Estados Unidos”. Unha vez rematada a xuntanza con Zelenski e o liderado de varios estados europeos, Trump chamou a Putin para informalo do falado, logo do que fixo fincapé en que “comecei a organizar unha reunión, nun lugar por determinar, entre o presidente Putin e o presidente Zelenski”, acrecentando que após “esta reunión teremos unha trilateral”. O mandatario ucraíno subliñou que agarda ese cumio nas próximas dúas semanas aínda que “non temos data”, e apuntou que os intercambios territoriais fican condicionados ás negociacións “entre Putin e eu”. No tocante a esta cuestión, Lavrov remarcou que a cimeira “debe prepararse minuciosamente”, nun camiño que debe dar inicio “desde o nivel de expertos e logo percorrer todas as etapas necesarias para preparar o cumio”, antes de detallar que o Kremlin “non rexeita ningún formato de traballo, nin bilateral, nin trilateral”. Putin e Trump protagonizan o primeiro cumio bilateral en cinco anos Macron propuxo que as negociacións se produzan “nun país neutral, talvez Suíza, inclínome por Xenebra, ou outro país”. Ao tempo, Trump destacou que “non creo que sexa un problema” fechar un acordo de paz, advertindo a Putin que se lle crearía unha “situación difícil” de non querer rubricalo, e a Zelenski que deberá ser “flexíbel” nas negociacións, pois Kíiv “nunca debeu pedir estar na OTAN”. Os gastos elévanse en Bruxelas, que xa entregou 141.000 millóns de euros Malia que os micrófonos captaron como, na reunión con líderes europeos, Donald Trump comunicaba a Emmanuel Macron que Vladimir Putin “quere chegar a un acordo”, isto non evitou que o presidente francés repetira pouco despois que Putin “é unha ameaza para os europeos”, así como que “teño grandes dúbidas da vontade de paz do presidente ruso”. Estas palabras producíronse despois de que, con moita probabilidade, se tratara na cimeira que, sobretodo os países da UE, terán que financiar a compra de armas estadounidenses coa que Ucraína poderá acceder a garantías de seguridade. Desde a invasión rusa, a UE entregou 141.000 millóns de euros a Ucraína, a maioría en armas e achegas financeiras, pouco menos que os Estados Unidos, cuxo presidente naquela altura, Joe Biden, azuou o proceso de integración de Kíiv na OTAN e impuxo a postura que aínda seguen, baseada en armar Ucraína, frear calquera saída negociada e sancionar Rusia, o que afectou desproporcionadamente a UE, onde Alemaña leva dous anos en recesión após perder o acceso ao gas natural ruso. Antes deste novo compromiso, os membros da OTAN xa elevaran o seu obxectivo de gasto militar a 5% do produto interior bruto (PIB) como exixiu Trump, e a UE pactou un plan de rearme de 800.000 millóns de euros e prometeu máis compras de armamento estadounidense como parte do acordo sobre aranceis. Isto ficou claro na presentación da proposta de orzamento 2028-2034 de Bruxelas, que prevé unha suba de 105.000 millóns de euros no gasto militar e unha redución de 84.000 millóns de euros nos fondos dedicados á Política Agraria Común (PAC).