Jordi Sánchez aposta no diálogo “sen imposicións nin restricións”
Primeira rolda de imprensa de Jordi Sánchez desde que entrou no cárcere hai 549 días. O candidato de Junts per Catalunya compareceu, obrigado polo director de Soto del Real, diante dunha bandeira española e dunha foto do rei.
Diante dunha bandeira española e dunha foto do rei, como estabeleceu o director do cárcere madrileño de Soto del Real, comparecía na mañá da quinta feira o que fora líder da ANC e agora candidato de JxCat ao Congreso, Jordi Sánchez.
Foi a primeira rolda de imprensa de Sánchez desde o 16 de outubro de 2017, data en que o encarceraron. Na intervención, apelou ao diálogo, “imos a Madrid coas credenciais claras. É indispensábel que se alguén quere o apoio de JxCat teña vontade de asumir que o referendo forma parte da solución”.
“Xa teremos tempo de falar de cómo e cando. Non estamos a esixir un referendo a cambio de investir Sánchez. Somos responsábeis e sabemos as dificultades”, sinalou.
A respecto do xuízo que enfrontan as presas e presos políticos cataláns, Sánchez subliñou que “nada do que se está a ver” no procedemento “pode xustificar a prisión” e puxo de manifesto que a candidatura que encabeza “non ten liñas vermellas á hora de abordar o diálogo” co futuro Goberno central.
Jordi Sánchez asegurou que JxCat ten vontade de “traballar nunha solución desde a máxima transparencia e lealdade”. “Quen pretenda que os problemas se solucionen fóra das urnas, fóra do referendo, equivócase”, advertiu.