Israel ordena a evacuación da totalidade da cidade de Gaza ante un ataque "de gran forza"

O Exército de Israel ordenou esta terza feira a evacuación da totalidade da cidade de Gaza, situada no norte de Faixa de Gaza, e recalcou que as súas forzas operarán "con gran forza" na zona, tras o anuncio do Goberno israelí sobre os seus plans para facerse co control da localidade no marco da ocupación do territorio palestino

O portavoz en árabe do Exército israelí, Avichai Adrai, emitiu na súa conta da rede social X un chamamento "a todos os residentes da cidade de Gaza" para que "evacúen inmediatamente" a cidade, no medio das denuncias internacionais sobre os desprazamentos forzosos de poboación acometidos polas autoridades israelís na Faixa.

"As Forzas de Defensa de Israel (IDF) están decididas a derrotar a Hamás e operarán na área da cidade de Gaza con gran forza, como o fixeron en toda a Faixa", manifestou, antes de incidir en que "permanecer na zona é moi perigoso".

"Pola súa integridade, evacúe inmediatamente a través da estrada Al Rashid cara a zona humanitaria en Al Mauasi", sinalou Adrai, en referencia a unha área decretada como "segura" polo Exército israelí, que non obstante lanzou decenas de ataques contra esta parte de Gaza, situada nos arredores da cidade de Khan Yunis.

Igualmente, Adrai facilitou un número de teléfono para que a poboación gazatí "informe sobre obstáculos postos por Hamás ou intentos dos seus integrantes para impedir a evacuación", ante a intensificación da cruenta ofensiva israelí contra o norte de Gaza, sumido ademais nunha fame negra que deixou xa centos de palestinos mortos.

Ataques contra a cidade

As tropas israelís lanzaron a primeira hora do día varios ataques contra a cidade de Gaza que deixaron cando menos 25 persoas desaparecidas entre os cascallos dun edificio bombardeado, segundo informou a Protección Civil gazatí a través unha mensaxe publicada na súa conta de Telegram.

A primeira mensaxe do Exército israelí chega horas despois de que o primeiro ministro Benjamin Netanyahu apelara á poboación da cidade de Gaza a abandonar a localidade e cifrara en 50 os rañaceos derrubados nos últimos días polos ataques israelís alegando que conteñen infraestrutura de Hamás, algo rexeitado polo grupo palestino.

A ofensiva israelí deixou até a data máis de 64.500 palestinos mortos e máis de 163.000 feridos, segundo as autoridades gazatís, no medio das denuncias internacionais sobre as accións do Exército israelí no enclave e a fame rexistrada en Gaza a causa das severas limitacións impostas por Israel á entrega de axuda humanitaria.