Israel ataca Líbano e ameaza con que "se acaba o tempo" para evitar que a guerra se estenda

A tensión entre o Estado sionista de Israel e o partido-milicia chiíta libanés Hezbolá continúa en aumento e o masacre que o Exército israelí exerce sobre Palestina ameaza con traspasar as fronteiras do Líbano. Logo de que a pasada terza feira asasinara o "número dous" de Hamás, Saleh al Arouri, nun barrio de Beirut, a capital libanesa, Hezbolá asegurou que o ataque de Israel "non ficará sen resposta nin castigo", un ataque que o secretario xeral da formación, Hasán Nasralá, cualificou de "flagrante agresión israelí" contra Líbano. Á espera de comprobar se Hezbolá cumprirá ou non a súa promesa, o Exército de Israel continúa coa súa estratexia e confirmou esta sexta feira novos bombardeos contra "infraestrutura terrorista" do partido-milicia no sur do Líbano. "Avións da Forza Aérea completaron un ataque contra a área de Eita al Shaab e Magdal Zon, en territorio de Líbano", dixo nunha mensaxe na súa páxina web, na que resaltou que "varias infraestruturas terroristas de Hezbolá foron destruídas, así como unha posición e unha instalación militar na que operaban terroristas da organización". Líbano exixe Nacións Unidas condenar os ataques israelís A respecto dos ataques israelís sobre o seu territorio, o Goberno de Líbano presentou unha demanda formal ante Nacións Unidas. O ministro de Exteriores libanés en funcións, Abdalá Bu Habib, deu orde á delegación ante as Nacións Unidas para que presente esta queixa ante o Consello de Seguridade da ONU tras o ataque no que Israel asasinou Al Arouri, que escribe como "a escalada máis perigosa desde 2006", en referencia á guerra que estalou nese ano entre Israel e Hezbolá. Así, as autoridades libanesas reclamaron ao organismo internacional que condene o ataque, prema Israel para que poña fin a este tipo de accións e adopte "accións decisivas" para impedir "novas agresións" contra Líbano, segundo recolleu a axencia estatal libanesa de noticias, NNA. Tanto Líbano, como Irán e Hamás acusan Israel do asasinato de Al Arouri. Non obstante, as autoridades israelís aínda non se pronunciaron ao respecto e a prensa local apunta a que o gabinete que dirixe Bejamin Netanyahu ordenou os seus ministros non manifestarse ao respecto, tras prometer que acabaría con todos os líderes de Hamás, "alá onde estean". Nesta liña, o ministro de Defensa de Israel, Yoav Gallant, trasladou na quinta feira a Amos Hochstein –enviado especial dos Estados Unidos de América (EUA) e asesor da Casa Branca que busca "evitar a escalada mediante conversas con ambos os bandos"– que "Israel prefería resolver o conflito militar con Hezbolá a través de mecanismos diplomáticos, pero o tempo para isto é limitado", e que o Estado sionista "non tolerará as ameazas" de Hezbolá. Pola súa parte, o primeiro ministro en funcións de Líbano, Nayib Mikati, recalcou a finais de decembro a importancia de "aplicar" as resolucións internacionais na fronteira con Israel e reclamou a "retirada" das forzas israelís dos "territorios ocupados", no marco destes combates. "Existe unha solución e é aplicar as resolucións internacionais", concluíu Mikati. Borrel visita Líbano mentres Israel continúa bombardeando o país Ademais da inxerencia estadounidense, tamén se trasladou á rexión o alto representante da Unión Europea (UE) para Política Exterior e Seguridade Común, Josep Borrell, que realiza desde onte unha visita que decorrerá nun momento de máxima tensión e cando están a piques de facerse tres meses desde que Israel intensificou os seus ataques contra o pobo palestino. A oficina de Borrell detallou nun comunicado que o xefe da diplomacia europea estará en Líbano até mañá e agregou que "a misión será unha ocasión para discutir todos os aspectos da situación arredor de Gaza, incluído o seu impacto na rexión, especialmente a situación na fronteira entre Líbano e Israel". Israel ataca o Líbano e asasina catro integrantes de Hezbolá 76.000 desprazadas O confronto entre o Exército de Israel e Hezbolá na fronteira de Líbano provocou xa o desprazamento de máis de 76.000 persoas en territorio libanés, segundo sinalou a Organización Internacional para as Migracións (OIM). Nun comunicado, o organismo sinala que até o 2 de xaneiro confirmou 76.018 persoas desprazadas no interior do país, un 2% máis que o 26 de decembro de 2023, antes de agregar que o 79% deles atópanse nas localidades de Sur, Nabatiye, Baabda, Beirut e Sidón. Noutra orde de cousas, a OIM recalcou que máis de 1,9 millóns de palestinos e palestinas fuxiron dos seus fogares a causa da ofensiva do Exército israelí contra a Franxa de Gaza, unha cifra que supón perto do 85% da poboación de Gaza. "Moitas persoas víronse forzadas a desprazarse en repetidas ocasións en busca de seguridade", explicou, ao tempo que engadiu que a cidade de Rafá, na fronteira con Exipto, é nestes momentos "a área máis densamente poboada" do enclave palestino. O balance de mortes no masacre da Franxa de Gaza a mans de Israel aumentou até 22.600, segundo informou esta sexta o Ministerio de Sanidade de Gaza, engadindo un total de 57.910 persoas feridas, unha cifra publicada no "91º día da agresión israelí". Israel mata no sur do Líbano dous xornalistas da televisión Al Mayadeen Irán detén varias persoas polos ataques en Kermán Alén da escalada do conflito na fronteira libanesa, a incerteza na rexión de Asia Occidental incrementouse, a pasada cuarta feira tamén en Irán. Un dobre atentado reivindicado por Estado Islámico –a pesar de que as autoridades iranianas sinalaron inicialmente Israel– asasinou máis de 80 persoas en Kermán cando decorría a celebración do cuarto aniversario da morte do xeneral Qasem Soleimani, asasinado en Irak polos Estados Unidos. As autoridades de Irán anunciaron esta sexta feira a detención de varias persoas pola súa presunta relación con este atentado. O ministro do Interior iraniano, Ahmad Vahidi, destacou que as forzas de seguridade atoparon "pistas útiles" sobre os responsábeis do ataque, recalcando que "todos" os implicados serán "capturados". Vahidi prometeu, ademais, accións "rápidas" contra os "terroristas". O ISIS reivindica a autoría do atentado de Kermán, en Irán "Vinganza" Horas antes, o presidente de Irán, Ebrahim Raisi, avanzaba unha "vinganza" a mans das "poderosas" Forzas Armadas iranianas aos responsábeis do dobre atentado, nun discurso fronte a milleiros de persoas concentradas para participar nos funerais das vítimas do ataque. "Os inimigos saben moi ben que Irán é poderoso", reafirmou Raisi. Un dobre atentado no cabodano de Qasem Soleimani intensifica o conflito en Oriente