Irán acusa Israel dun ataque de falsa bandeira a unha desalinizadora situada en Kuwait

As autoridades iranianas culparon esta segunda feira o Exército de Israel de estar detrás do ataque perpetrado horas antes contra unha planta desalinizadora de Kuwait, o cal provocou a morte dun cidadán de orixe india e danos nas instalacións. Jatam al Anbiya, un dos principais mandos do Exército do Irán, afirmou que a "brutal agresión do réxime israelí contra a planta de Kuwait mostra a perversidade e a falta de criterio da ocupación sionista". Así, sinalou que Israel buscaba "culpar Irán" cun ataque de falsa bandeira. Trump desvela as súas verdadeiras intencións no Irán: apoderarse do petróleo e invadir a illa de Kharg Porén, Kuwait sinalou o país persa como culpábel da agresión. Neste sentido, a portavoz do Ministerio da Electricidade, Fatima Hayat, aseverou que "un edificio de servizos dunha central eléctrica e planta desalinizadora de auga foi atacado como parte da agresión iraniana". O ataque contra plantas desalinizadoras é, probabelmente, a principal arma de disuasión que ten Irán, mais foron os Estados Unidos quen golpearon primeiro unha destas instalacións. Irán acusou os EUA o 7 de marzo de destruír unha planta desalinizadora na illa de Qeshm, deixando máis de 30 localidades sen auga. O día seguinte, Barhain denunciou que o país persa atacou cun dron unha planta desalinizadora no seu territorio. Esta acción iraniana, ademais dunha represalia, pareceu un aviso sobre as consecuencias que para os aliados dos EUA podería implicar ese camiño, posto que as monarquías do golfo Pérsico teñen un déficit enorme de auga doce. Precisamente, o presidente dos Estados Unidos, Donald Trump, ameazou esta segunda feira con destruír "todas as plantas desalinizadoras" do Irán, que "deliberadamente", afirmou, aínda non tocaron, dixo a pesar do ataque do 7 de marzo. "Posibelmente" o faremos, manifestou sobre un eventual ataque a estas infraestruturas. "Os vosos soldados serán comida para os tiburóns do golfo Pérsico": Irán ameaza Estados Unidos ante unha posíbel invasión terrestre Con todo, nunha escalada de ataques a desalinizadoras teñen máis que perder os aliados dos EUA, polo que é un factor de disuasión do Irán, como o son para os Estados Unidos e Israel son os seus arsenais atómicos. Ao respecto, o representante diplomático da organización internacional Patriotic Vision ante as Nacións Unidas, Mohamad Safa, despois de suspender todas as súas responsabilidades ante a ONU, denunciou que esta se está preparando ante "un posíbel uso de armas nucleares no Irán". "Non creo que a xente comprenda a gravidade da situación", aseverou. "Renunciei á miña carreira diplomática para filtrar esta información. Suspendín as miñas funcións para non ser partícipe nin testemuña deste crime contra a humanidade, nun intento por evitar un inverno nuclear antes de que sexa demasiado tarde", afirmou. "Actuemos agora! Difundamos esta mensaxe por todo o mundo. Saiamos ás rúas", concluíu Safa. Nova ameaza de Trump Neste contexto, Trump ameazou esta segunda feira Irán con destruír "por completo" as instalacións enerxéticas iranianas, incluída a illa de Khark –desde a cal o Goberno iraniano exporta a maior parte dos seus hidrocarburos–, se non se chega a un acordo e se o estreito de Ormuz continúa parcialmente fechado á navegación. Trump sinalou que aínda que se alcanzaron "grandes avances" no diálogo con este "novo e máis razoábel réxime" iraniano, puxo en dúbida un entendemento a curto prazo. "Se por algunha razón non se chega a un acordo pronto, o cal é probábel, e se o estreito de Ormuz non se abre inmediatamente, concluiremos a nosa querida 'estancia' no Irán destruíndo por completo todas as súas centrais eléctricas, pozos petrolíferos e a illa de Khark", segundo afirmou. A ONU pide que se faga "xustiza" co bombardeo da escola do Irán: "As diferenzas non se resolverán matando nenas nas escolas" Porén, as autoridades iranianas volveron negar que se produciran contactos directos co Goberno dos Estados Unidos e puxeron en dúbida que o presidente Trump teña un interese real en chegar a un acordo. Ao respecto, o portavoz do Ministerio de Asuntos Exteriores do Irán, Esmaeil Baqaei, si confirmou contactos a través de terceiros, mais lamentou que as primeiras propostas que chegaron desde os EUA "non son razoábeis". Mentres, nunha entrevista co Financial Times, Trump afirmou querer apropiarse do combustíbel iraniano. "Para ser sincero, o que prefiro é quedarme co petróleo do Irán, mais algúns parvos nos Estados Unidos pregúntanme: 'Por que están a facelo?' Mais son estúpidos", dixo. "Talvez tomemos a illa de Kharg, talvez non. Temos moito opcións", continuou, admitindo que "se tería que estar alí durante un tempo". Así o dixo logo de que o sábado The Washington Post informara de que o Pentágono está preparando unha incursión terrestre no Irán que podería durar semanas. "Calquera agresor que poña os seus ollos no territorio iraniano, especialmente no golfo Pérsico e nas illas iranianas, enfrontarase a unha resposta decisiva, lamentábel e irreversíbel, e o inferno é o único destino final para os soldados invasores", contestou esta segunda feira o vicepresidente primeiro do Irán, Mohamed Rezá Aref. E a uns días de que se levante a suposta suspensión de Trump das agresións contra centrais eléctricas iranianas, os EUA e Israel seguen a golpear instalacións enerxéticas, e tamén civís, como a Universidade de Ciencia e Tecnoloxía do Irán. Así, o Ministerio de Enerxía anunciou esta segunda feira o restabelecemento da subministración eléctrica en Tehran e na veciña provincia de Elburz, tras as interrupcións a causa destes ataques. O Goberno español fecha o seu espazo aéreo aos voos implicados na guerra contra o Irán E neste contexto, alegando que a agresión dos Estados Unidos e Israel contra Irán é "profundamente ilegal e inxusta", a ministra española de Defensa, Margarita Robles, confirmou esta segunda feira o feche do espazo aéreo para os avións que participan na guerra. Tres soldados da ONU e sete persoas máis morren en ataques no Líbano Dous militares da Forza Interina de Nacións Unidas no Líbano (Finul) morreron esta segunda feira polo impacto dun proxectil contra o vehículo no que se desprazaban perto de Bahi Haxan, no distrito de Marjayún, no sur de Líbano, onde Israel está intensificando os seus bombardeos. Previamente, o domingo, morreu outro 'casco azul' de nacionalidade indonesia noutro ataque de orixe descoñecida. As forzas israelís, que xa protagonizaran varios incidentes e ataques contra as forzas da ONU, intentan facerse co control desta zona do Líbano no contexto da súa invasión ao país, mentres que Hezbolá está a defender o territorio. Pola súa parte, a Finul é un continxente internacional duns 8.000 militares dedicados a vixiar o cesamento de hostilidades que foi quebrado por Israel. Neste contexto, tras coñecerse a morte do primeiro dos seus 'cascos azuis' asasinados, as autoridades de Indonesia exixiron esta segunda feira abrir unha investigación. Ao mesmo tempo, volveron condenar os ataques de Israel no Líbano e pediron respectar a soberanía e integridade territorial do país, que está sendo invadido polo Exército do Estado sionista. Israel prepara unha grande invasión do sur do Líbano mentres aumentan as mortes polos seus bombardeos Outras catro persoas morreron esta segunda feira nun ataque aéreo israelí sobre Bint Yebeil, no sur do país, no marco da ofensiva militar de Israel para alcanzar o río Litani. Ataques anteriores contra a aldea de Hanuiyé, en Tiro, deixaron outras tres mortas, e Beirut recibiu tamén novos bombardeos. O Ministerio de Sanidade libanés informou de que, desde o 3 de marzo, no marco da nova ofensiva israelí, morreron 1.247 persoas e 3.680 resultaron feridas.