O grupo Brics fecha a primeira expansión e contará con 11 membros en 2024

O presidente de Suráfrica, Cyril Ramaphosa, foi o encargado de despexar na mañá da quinta feira, na última xornada da XV cimeira do grupo Brics na urbe surafricana de Xohanesburgo, a principal incógnita dos tres días de xuntanzas, a identidade dos novos membros da organización. A partir do 1 de xaneiro, a Arxentina, Exipto, Etiopía, Irán, Arabia Saudita e os Emiratos Árabes Unidos uniranse ao Brasil, Rusia, a India, a China e á propia Suráfrica como membros de pleno dereito da entidade, comunicou o mandatario, que amais de confirmar a invitación aos novos Estados que se integrarán, salientou o “consenso sobre a primeira fase deste proceso de expansión”, adiantando que “seguirán outras fases”. Ao longo das reunións da cuarta feira, os cinco membros actuais fixaron un consenso, obrigatorio para impulsar calquera acordo no seo da organización, sobre “os principios reitores, estándares, criterios e procedementos” da ampliación, apuntou Ramaphosa. Finalmente, non entrou nesta rolda de expansión Indonesia, que fora citado pola prensa internacional como un dos probábeis novos membros. Ademais do país do sueste asiático, para futuras ampliacións ficaron pendentes as solicitudes de adhesión de Alxeria, Bahrein, Bangladesh, Belarús, Bolivia, Cuba, Honduras, Kazakhistán, Kuwait, Nixeria, Palestina, Senegal, Tailandia, Venezuela e Vietnam. Unha vintena de Estados máis expresaron o seu interese por integrarse. A ampliación non só incrementará até 46% a porcentaxe da poboación mundial con residencia en membros do grupo Brics, senón que elevará a súa economía a 37% do produto interior bruto mundial por paridade de poder adquisitivo, aumentando a fenda nesta estatística con respecto ao G7, a entidade conformada por Alemaña, o Canadá, os Estados Unidos, Francia, Italia, o Xapón e o Reino Unido. Isto reflíctese en sectores como o petroleiro, no que os Brics controlarán arredor de 40% da produción mundial, de feito, a inclusión de Riad, o segundo produtor mundial, “atraería claramente a atención dos Estados Unidos e os seus aliados nun clima xeopolítico moi xélido”, sinalara AP, que tamén recolle a alza da influencia chinesa en Asia Occidental após mediar na normalización dos lazos entre Arabia Saudita e Irán. Nova orde internacional Ramaphosa proclamou que “con esta cimeira, os Brics inician un novo capítulo”, cunha ampliación que “fortalece a loita por unha nova orde que se adapte á pluralidade económica, xeográfica e política do século XXI”, subliñou o presidente brasileiro, Lula da Silva, que fixo fincapé en que “a presenza neste encontro dos Brics de decenas de líderes doutros países do Sur Global [até medio centenar segundo algunhas fontes] amosa que o mundo é máis complexo que a mentalidade da Guerra Fría que algúns queren restaurar”. “O mundo con benestar para todos só é posíbel cunha orde internacional máis inclusiva e solidaria”, detallou, ratificando que “as promesas da globalización non se cumpriron”. O primeiro ministro indio, Narendra Modi, reiterou os chamamentos das últimas xornadas para fomentar institucións globais máis representativas, e asegurou que a expansión dos Brics permitirá incrementar a representación nestes órganos do Sur Global, que identificou con todos os países que loitaron contra o colonialismo. O éxito da misión lunar de Nova Delhi, que levou a primeira nave ao polo sur do satélite e se converteu no cuarto Estado en aterrar na lúa, tamén remarcou o crecente peso a nivel tecnolóxico dos membros dos Brics. O secretario xeral da Organización das Nacións Unidas (ONU), António Guterres, presente no evento, fíxose eco das demandas de reforma do Consello de Seguridade da ONU ou do Fondo Monetario Internacional, e incidiu en que as estruturas de goberno global “reflicten o mundo de onte”. Nese sentido, solicitou unha reforma coherente co “poder e as realidades económicas actuais”, sen ela, “a fragmentación é inevitábel”, alertou, antes de trasladar que “non hai alternativa á cooperación”, polo que é precisa “desesperadamente” unha “arquitectura multilateral fortalecida e reformada baseada na Carta da ONU”. Xi Jinping, líder chinés, que definiu o da ampliación como “un día histórico”, defendeu que a decisión “sirve os intereses comúns dos mercados emerxentes e dos países en desenvolvemento”, e indicou que a China “foi, é e sempre será un membro do mundo en desenvolvemento”. Ademais, fixo público o lanzamento dun fondo de máis de 9.000 millóns de euros para promover o crecemento económico e social neste grupo de Estados. No que atinxe a esta cuestión, o presidente ruso, Vladimir Putin, destacou nunha intervención por videoconferencia que os Brics “non compiten con ninguén”, mais contra o “proceso da formación dunha nova orde mundial” hai “opositores irreconciliábeis que buscan minoralo, conter a creación de novos centros independentes de desenvolvemento e de influencia no mundo”. Logo de facerse público os seis Estados convidados a ingresar nos próximos meses no grupo Brics, sucedéronse as celebracións. Exipto confiou en que a ampliación “eleve a voz” do Sur Global, mentres que Irán a considerou unha “vitoria estratéxica”. Xa en América, o presidente arxentino Alberto Fernández dirixiuse á poboación para transmitir “un novo paso na consolidación da Arxentina fraterna e aberta ao mundo que sempre soñamos”, pondo o foco na unión cos “países máis importantes das economías emerxentes” fronte “un mundo inestábel e non equitativo onde os países con economías emerxentes requirimos maiores niveis de integración”. Fernández tamén aseverou que o “enorme peso institucional e financeiro” dos Brics é “determinante” para o deseño dunha “arquitectura financeira mundial que teña en conta as necesidades de crecemento, comercio, investimento e benestar social”, nun grupo que, “segundo a Organización da ONU para a Alimentación e a Agricultura”, integra os Estados “preparados para liderar a erradicación da fame e da pobreza mundial en 2030”. Os Brics apoian as moedas locais Na declaración final da cimeira o grupo Brics reclamou a reforma da ONU e unha maior representación dos países en desenvolvemento no Consello de Seguridade, algo que estenden ao resto de organizacións internacionais. Á vez, defenderon o multilateralismo e o uso das moedas locais no comercio mutuo. Tamén apoiaron a resolución pacífica da guerra en Ucraína e dos conflitos en Níxer, Libia e o Sudán, e amosaron preocupación polos efectos das sancións unilaterais.