Fundació Neus Català, lugar de encontro para a reflexión

O xoves 13 de abril presentouse no Centre Artesà Tradicionàrius, no barrio de Gràcia, en Barcelona, a Fundació Neus Català; entidade que recollendo a longa experiencia de vida da persoa que lle dá nome, considera que esa experiencia de vida debe servir para a aprendizaxe política, social e humana de quen teñen decidido comprometerse activamente na defensa da emancipación e da transformación social. Neus Català, falecida en 2019 aos 104 anos, foi militante antifascista e comunista toda a súa vida, unha vida longa e intensa. Participou na guerra civil activamente, defendendo a lexitimidade republicana. No exilio, formou parte da resistencia contra os nazis en Francia; denunciada e capturada. Foi deportada e pasou polos campos de concentración nazis de Ravensbrück e Holleischen, dos que conseguiu saír con vida. Volveu a Francia ao rematar a segunda guerra mundial, onde viviu até a morte de Franco. Á súa volta a Catalunya seguiu militando, primeiro no PSUC e, posteriormente, nos anos oitenta do século pasado, participando na fundación do PCC (hoxe Comunistes de Catalunya), cunha militancia activa especialmente no movemento feminista e no da loita pola paz. Referendo do 1 de outubro O compromiso político e social mantívoo até o final da súa vida, e con 102 anos votou no referendo do 1 de outubro de 2017, sumándose posteriormente á campaña en esixencia da liberdade da presidenta do Parlament de Catalunya, Carme Forcadell; pois como declarou a súa filla, Neus Català era unha firme partidaria do dereito do pobo catalán a poder decidir o seu futuro. Espazos que marquen como obxectivo armarse para encarar a loita das ideas son esenciais, e non só en Catalunya A Fundació, que xorde por iniciativa do seu partido, ten como primeiro obxectivo preservar a memoria dunha das súas militantes máis coñecidas e recoñecidas. Neus Català, ademais das múltiples condecoracións oficiais que recibiu tanto en Francia como en Catalunya, tivo o recoñecemento e o respecto de todos os sectores de esquerda, progresistas e soberanistas cataláns, dada a súa traxectoria de persoa coherente e comprometida na loita antifascista, pola paz, polo socialismo e polos dereitos de Catalunya. Proba dese recoñecemento é que nun momento político como o que vive Catalunya, a Fundació conseguiu contar no seu Consello Asesor con persoas representativas dun amplo abano de sensibilidades, que vai desde quen se declaran defensores do dereito democrático a decidir, pasando polo soberanismo até o independentismo. Crear pensamento crítico e emancipador "Nun momento no que está demostrado que o capitalismo é incompatíbel coa vida, a Fundació persegue crear pensamento crítico e emancipador, coa vontade de ser un espazo de encontro", ese é o segundo obxectivo que se marca; crear un pensamento crítico sempre necesario, pero moito máis hoxe, cando os acontecementos sofren unha aceleración constante, levándonos a vivir un inmediatismo sen fin. Unha realidade que ten levado demasiadas veces as organizacións políticas e sociais transformadoras a deixar nun segundo plano a reflexión, a formación e a creación de pensamento propio, apuradas pola necesidade de dar respostas urxentes ao día a día. Feito que ten favorecido de xeito involuntario, que sexa o propio sistema contra o que loitan o que impoña o seu pensamento, facéndoo hexemónico. Por iso é importante a aparición de iniciativas como esta, que busca, en palabras do seu presidente Ricard Ribera, ser "espazo de encontro e de reflexión para o conxunto da esquerda soberanista, para dar resposta ás necesidades da clase traballadora e aos sectores populares do país, en chave social e en chave nacional". Unha reflexión sobre a realidade que vaia máis alá da conxuntura, e permita ver cada conflito e cada problema no seu contexto que sempre é máis amplo; sendo ese o único xeito de poder analizar correctamente a realidade, e de elaborar as estratexias máis axeitadas para enfrontar os problemas no seu conxunto; indo á raíz dos mesmos, e non só atallando as súas manifestacións puntuais. A situación política catalá é moi complexa, e con moitas derivadas que para quen non vivimos alí son difíciles de entender; pero espazos que se marquen como obxectivo armarse para encarar a loita das ideas son imprescindíbeis, e non só en Catalunya.