Francia rexeita a entrada de 80% das persoas migrantes que chegan de Italia

Persoas "extremadamente vulnerábeis son rexeitadas indiscriminadamente pola Policía francesa, sen avaliar axeitadamente as súas condicións individuais específicas”, denunciou a sexta feira Sergio Di Dato, coordinador de Médicos Sen Fronteiras na localidade de Ventimiglia, en Italia, facendo énfase en que se obriga ás persoas migrantes a “permanecer en territorio italiano sen asistencia adecuada das institucións”. Estas declaracións producíronse no marco da presentación dun informe da entidade non gobernamental no que desvela que 79,8% das persoas migrantes que intentaron cruzar a Francia desde Italia no que vai de ano foron rexeitadas na fronteira, e critica as “violacións de procedemento” á hora de denegar a entrada no país por parte dos axentes franceses. Outro tanto acontece coas crianzas, detalla o documento, que recolle que máis dun terzo dos 48 menores non acompañados atendidos pola entidade foron rexeitados nos lindes entre Francia e Italia, e no mínimo catro familias foron separadas no marco das expulsións na primeira metade do ano. Tamén se inclúen múltiples testemuños de detencións arbitrarias por parte das forzas de seguridade galas, con persoas retidas en contedores e sen protección específica para mulleres e crianzas, ao que hai que engadir un trato violento e inhumano. As condicións nas que sobreviven as persoas migrantes en territorio italiano, onde o Executivo de extrema dereita decretou o estado de emerxencia pola chegada de persoas migrantes, son especialmente duras, abunda a organización, que narra a falta de “albergue axeitado e o acceso limitado á atención médica”, o que deriva en que “decotío carecen de lugares para pasar a noite, casas, baños, comida e auga potábel”, con efectos directos no seu estado de saúde. Di Dato puxo o foco en que “é fundamental que as persoas en tránsito, independentemente do seu status legal, teñan garantida a protección e os servizos axeitados ás súas necesidades”, recalcando a situación de “estancamento”. Os cruces de migrantes na fronteira xeraron varios choques entre os Gobernos de Emmanuel Macron en Francia e de Giorgia Meloni en Italia, que alcanzou especial intensidade en maio cando o ministro de Interior galo, Gerald Darmanin, culpou a Meloni por ser “incapaz de resolver os problemas migratorios polos que foi elixida”, indicando que malia a situación de Tunisia e Libia, lugar do que proceden boa parte das persoas que chegan a Italia por mar, “hai unha situación política que fai que moitas crianzas vaian a Italia”. Precisamente Tunisia converteuse no último Estado co que a Unión Europea (UE) asinou un acordo de cooperación para que free a saída de persoas migrantes das súas costas cara a Europa, após Turquía, Marrocos ou Libia, entre denuncias de múltiples violacións dos dereitos humanos contra as migrantes. O inexistente efecto chamada Neste sentido, aínda que as forzas conservadoras e de extrema dereita sosteñen que as operacións de rescate provocan un ‘efecto chamada’, vinculando estas migracións con traficantes de persoas, un estudo da Universidade de Postdam, en Alemaña, descarta que as operacións de pescuda e rescate no Mediterráneo central entre 2011 e 2020 favoreceran o aumento no número de intentos de chegar a Europa. “Non atopamos ningunha evidencia empírica de que as operacións de rescate atraesen máis migrantes”, resolve Alejandra Rodríguez Sánchez, a autora principal da investigación, que apunta cara aos altos prezos, os conflitos ou as catástrofes naturais como motivacións das persoas para migrar. Por iso, define como “simplista” o argumento do ‘efecto chamada’, salientando que “non captura a complexidade das decisións migratorias nin da mobilidade humana”, afirmando que posibelmente estas conclusións sexan aplicábeis a outras rutas migratorias. A pesar disto, esta foi a xustificación de países como Grecia para endurecer as súas políticas migratorias, forzando segundo as entidades en defensa dos dereitos humanos que as persoas migrantes afronten viaxes máis longas e perigosas coa costa italiana como obxectivo. Isto é o que aconteceu en xuño, cando máis de 500 persoas morreron no mar Xónico ao afundirse un destes buques, que intentaba alcanzar Italia desde Libia. Porén, as continuas declaracións xudiciais de inocencia de axentes gregos implicados en casos similares provocou que Amnistía Internacional e Human Rights Watch exixiran unha investigación “críbel” sobre os feitos. Neste caso destacan que o contraste no contido dos relatos da Garda Costeira grega e das persoas superviventes “é extremadamente preocupante”, nun afundimento que tamén está a investigar a Defensora do Pobo da UE. Mentres que os gardacostas insisten en que o barco afundiu só tras pedirlle os tripulantes que os deixasen continuar a travesía a Italia, os testemuños e probas vistas por Reuters sinalan que naufragou cando o buque grego tratou de remolcar a embarcación, de forma presumíbel para que lograse alcanzar augas italianas. As boias no río Bravo xeran un choque entre México e os EUA Os corpos sen vida de dúas persoas foron descubertos polas autoridades mexicanas no río Bravo, onde o gobernador de Texas, Greg Abbott, instalou boias esféricas con revestimento de púas para evitar o paso de persoas migrantes polo curso de auga, que marca a fronteira entre México e os Estados Unidos. Un dos cadáveres foi atopado directamente nas boias, e o outro a 5 km do primeiro. O presidente mexicano, Andrés Manuel López Obrador, cualificou a Abbott como “inhumano”, pondo énfase en que “non debe tratarse así a ninguén”. O gobernador de Texas respondeu a Obrador criticando unha suposta “política de portas abertas” da que tamén inculpou o mandatario estadounidense, Joe Biden. O propio Biden, que impulsou unha restritiva política migratoria, denunciou á Xustiza as boias, sostendo que a súa instalación xera dúbidas sobre o cumprimento das normas de dereitos humanos. Migrantes mortos A Organización Internacional para as Migracións reporta que máis de 57.000 persoas migrantes morreron ou desapareceron na viaxe desde 2014, case a metade no Mediterráneo. En 2023 máis de 2.000 persoas faleceron nesta travesía, 83 delas crianzas.