A falta de acordos para frear o xenocidio preside a Asemblea Xeral da ONU

Dionisio da Costa, representante permanente de Timor Leste na Organización das Nacións Unidas (ONU), fechou a segunda feira as intervencións das delegacións de case todos os 193 estados membros do organismo e dos dous observadores, Palestina e o Vaticano, no debate xeral do 80º período de sesións da Asemblea Xeral da ONU, marcado polo xenocidio que o réxime israelí está a perpetrar en Gaza. No contexto do evento, o Reino Unido, Francia, Bélxica, Portugal, Luxemburgo, Malta, Mónaco, Andorra, o Canadá e Australia recoñeceron o Estado de Palestina, ocupado polos sionistas, elevando a 157 a listaxe de estados que o fan, 81% dos membros da ONU e apenas dous menos que os países que recoñecen até o de agora Israel. O recoñecemento é especialmente relevante en concreto no caso de Londres, redactor en 1917 da Declaración Balfour, na que avalaba a colonización de Palestina por parte dos sionistas, tres anos antes de ocupar os militares británicos o territorio, e en xeral ao proceder de aliados dos Estados Unidos e até de membros da Organización do Tratado do Atlántico Norte (OTAN). Até este momento, estes estados pregáranse á posición fixada por Washington, que non pode haber un Estado palestino independente até que Israel o acepte, o que na práctica o faría imposíbel, posto que o réxime deixou claro que fará todo o que estea na súa man para evitalo, a última vez a sexta feira, na intervención do primeiro ministro do Goberno de extrema dereita, Benjamin Netanyahu, diante da Asemblea. Alí chegou a cualificalo de “suicidio nacional”, cando fronte a el boa parte dos asentos permanecían baleiros, ao marchar entre apupos múltiples delegacións estatais unha vez que Netanyahu entrou na sala, explicitando o illamento internacional de Israel. Asemade, o xenocidio tamén foi un dos temas recorrentes nos discursos das arredor de 90 xefas e xefes de Estado e 43 de Goberno que se desprazaron a Nova York, nos Estados Unidos, onde a ONU ten a súa sede, e un dos eixos da primeira intervención no debate a pasada terza feira, que como é tradición correspondeu ao Brasil. O dereito humanitario, soterrado en Gaza Nela, o seu presidente, o progresista Lula da Silva, fixo fincapé en que “absolutamente nada xustifica o xenocidio en curso en Gaza”, abundando en que “aí, baixo toneladas de cascallos, están soterradas decenas de milleiros de mulleres e crianzas inocentes, e tamén o dereito humanitario e o mito da superioridade ética de Occidente”. A Asemblea Xeral da ONU chega marcada polas crises e conflitos no 80 aniversario da institución Ademais, en alusión a Washington, apuntou que “este masacre non ocorrería sen a complicidade de quen pode evitalo”, nun momento de alta tensión a nivel bilateral polos aranceis e as sancións impostas polos Estados Unidos ao país por xulgar e condenar polo intento de golpe de Estado o predecesor de Lula, o ultradereitista Jair Bolsonaro. De forma paradoxal, Donald Trump, presidente dos Estados Unidos, anunciou que esta semana manterá unha xuntanza con Lula para abordar o asunto ao constatar a “química excelente” co brasileiro, co se cruzou na ONU como segundo líder en intervir no debate. Ademais, mentres as protestas contra o xenocidio se mantiñan fronte á ONU ao longo da semana, nas marxes da Asemblea o secretario xeral da entidade António Guterres, o Brasil, Xordania e o Estado español encabezaron unha tentativa de incrementar o apoio político e financeiro para a axencia da ONU para as e os refuxiados palestinos, prohibida por Israel, e os 34 estados do Grupo da Haia, que xa impuxeron un embargo de armas aos sionistas, estudaron novas medidas, como un embargo enerxético. “O risco é que os países se deteñan aquí” aducindo que “xa fixemos a nosa parte”, advertiu Varsha Gandikota-Nellutla, secretaria xeral da agrupación, que explicou que “queremos medrar país por país até abarcar o mundo enteiro, até que toda a cadea de subministración que leve armas letais a Israel se volva inaccesíbel para Netanyahu e o seu Goberno”. Bogotá pide un anfitrión "neutral" Un dos impulsores deste grupo, ao que pertence o Estado español e territorios de catro continentes, o mandatario colombiano, o progresista Gustavo Petro, viu revogado o seu visado para permanecer nos Estados Unidos por parte da Casa Branca, despois de unirse a unha protesta pro palestina e demandar aos militares estadounidenses “que non apunten os seus fusiles contra a humanidade”, amais dun exército mundial para “liberar os palestinos”. O Ministerio de Exteriores colombiano, que incidiu en que usar os visados como arma diplomática vai en contra do espírito da ONU, subliñou que o organismo “debería atopar un país anfitrión completamente neutral”. Sexa como for, a Casa Branca xa aproveitara a localización da sede para impedir a participación no debate de Mahmoud Abbas, presidente palestino, ao que negou o visado, obrigándoo a falar por videoconferencia. En última instancia, malia as condenas e os debates na Asemblea Xeral non se adoptou ningunha medida concreta para pór fin ao xenocidio, e tanto analistas como persoal diplomático citado pola canle Al Jazeera sentenciaron que “a retórica e as medidas diplomáticas por si propias, incluído o recoñecemento dun Estado palestino, non son suficientes para cambiar as cousas sobre o terreo nin mellorar a situación dos palestinos baixo bombardeos e ocupación”. A China postúlase como líder mundial na loita contra o cambio climático Ante a falta de reacción da comunidade internacional perante o aumento dos efectos do cambio climático, en paralelo á suba da temperatura global, António Guterres, secretario xeral da ONU, convocou unha sesión de alto nivel sobre esta cuestión o 24 de decembro, co obxectivo de que os membros do organismo internacional presentaran os seus novos obxectivos de redución das emisións dos gases que causaron esta situación. Apenas un día despois de que Donald Trump asegurara que o cambio climático é “o maior engano xamais perpetrado no mundo”, a China encabezou os anuncios sobre medidas neste campo nunha intervención por videoconferencia do presidente Xi Jinping, que salientou que para 2035 reducirán entre 7% e 10% as súas emisións en relación ao seu pico e multiplicarán a súa produción de enerxías renovábeis por seis en comparación con 2020, metas que persoas expertas defenderon que son de fácil cumprimento. A Unión Europea (UE) criticou como “claramente decepcionante” o obxectivo de diminución de emisións da China, que retrucou acusando Bruxelas de “dobres varas de medir e cegueira selectiva”, cuestionando a lentitude do bloque á hora de fixar as súas propias metas climáticas. O certo é que os 27 estados membros da UE non lograron pactar un novo obxectivo de cara a 2035 na reunión de alto nivel que se desenvolveu na ONU, e tampouco foron quen de superar os seus desacordos no tocante á proposta da Comisión Europea de rebaixar para 2040 até 90% dos niveis de emisións do bloque comunitario en 1990.