Os EUA conxelan a expedición de visados para 75 países, entre eles o Brasil, Irán e Rusia
O Departamento de Estado dos EUA decretou a conxelación de expedición de visados para 75 países, entre eles o Brasil, Irán e Rusia, segundo informou a cadea norteamericana Fox News, que obtivo o acceso ao memorando correspondente da Administración liderada por Donald Trump.
Segundo o medio, este paso responde a un intento por tomar medidas drásticas contra solicitantes que o Goberno dos Estados Unidos considera que poden "converterse nunha carga pública". En concreto, o documento ordena o funcionariado consular denegar os visados en virtude da lexislación vixente, mentres o Departamento reevalúa os procedementos de selección e verificación.
Detállase que a pausa comezará o 21 de xaneiro e prolongarase até que o organismo diplomático realice unha reevaluación do procesamento de visados. Entre os países que se verán afectados polas restricións tamén figuran Somalia, Afganistán, o Iraq, Exipto, Nixeria, Tailandia e Iemen.
"O Departamento de Estado utilizará a súa autoridade tradicional para considerar non aptos posíbeis inmigrantes que se converterían nunha carga pública para os Estados Unidos e se aproveitarían da xenerosidade do pobo estadounidense", afirmou o portavoz do Departamento de Estado, Tommy Piggott, nun comunicado.
"Suspenderase a inmigración procedente destes 75 países mentres o Departamento de Estado reevalúa os procedementos de tramitación da inmigración para impedir a entrada de estranxeiros que se beneficiarían das prestacións sociais e públicas", agregou.
En novembro do ano pasado, o secretario de Estado dos EUA, Marco Rubio, xa aprobara a restrición de visados a persoas que padezan enfermidades crónicas, como obesidade, diabetes ou cancro, tras considerar que, unha vez dentro do territorio estadounidense, poderían converterse nunha carga financeira para as contribuíntes.
Récord histórico de revogacións de visas
En xeral, en menos dun ano, o Goberno dos EUA revogou as visas de máis de 100.000 persoas, revelou Pigott. As cifras representan un récord histórico xa que, por exemplo, en 2024, ano do último ano de Executivo de Joe Biden, revogáronse 40.000 visas
Con Trump, quen asumiu o 20 de xaneiro do ano pasado, as suspensións creceron 150% durante o ano 2025. A maioría aplicáronse en contra viaxeiros e viaxeiras que estaban nos EUA por motivo de negocios e a turistas que excederon o permiso que tiñan para permanecer no país.
Con todo, entre as persoas afectadas tamén se atopan ao redor de 8.000 estudantes, dos cales a 500 foron acusados de posesión e distribución de drogas; e 2.500 persoas que traballaban legalmente no Estados Unidos de América e quen, segundo Pigott, cometeron algún tipo de delito.