Os Estados Unidos consideran "xusta" a petición rusa de pór fin á expansión da OTAN ao leste

“É unha preocupación xusta”, así se referiu na madrugada da sexta feira o enviado especial dos Estados Unidos a Ucraína, Keith Kellogg, na canle ABC News á demanda rusa de que os líderes dos países occidentais se comprometan por escrito a frear calquera ampliación da Organización do Tratado do Atlántico Norte (OTAN) cara ao leste como parte das condicións para pór fin á guerra en Ucraína, reveladas esta semana en exclusiva pola axencia Reuters. Asemade, tres fontes procedentes do país eslavo tamén indicaron que reclaman que Ucraína volva á neutralidade, levantar parte das sancións coercitivas, resolver o tocante aos activos rusos conxelados e a protección da poboación rusofalante no territorio ucraíno. O pasado ano o país xa trasladara como condicións iniciais a fin da posibilidade de adhesión de Kíiv á OTAN e a retirada dos seus militares de Donetsk, Luhansk, Khersón e Zaporijia, catro rexións que Rusia considera agora propias e que controla parcialmente. “Non só están falando de Ucraína, están falando de Xeorxia, están falando de Moldova”, debullou Kellogg, que reiterou que a última palabra a ten o presidente estadounidense Donald Trump, nunha proposta que tamén incluiría outras repúblicas que estaban integradas na Unión Soviética (URSS). O enviado especial pormenorizou que trasladaron a Moscova que “a incorporación de Ucraína á OTAN non está sobre a mesa, e non somos o único país que o di, probabelmente podería incluír outros catro países da OTAN, e precísanse 32 dos 32 para permitirlles ingresar”, ratificando que están dispostos a abordar o asunto “de forma integral”. A demanda rusa de que a fin da expansión cara ao leste da OTAN fique por escrito procede do incumprimento estadounidense dese mesmo compromiso. En 1990, o país americano garantiu a Mihail Gorbachov, último líder da URSS, que se aceptaban que todo o territorio alemán ficase integrado na alianza militar controlada polos Estados Unidos após a reunificación a OTAN non se expandiría ao leste. Desde ese momento nove repúblicas ex soviéticas ou da órbita da URSS entraron na OTAN. A UE trata de entrar nas conversas para a paz en Ucraína, mais os Estados Unidos ofrécenlle apenas "un rol" Nese contexto, en 2008 a alianza militar pactou facilitar a integración de Ucraína e Xeorxia, e na primeira instigou un golpe de Estado en 2014 impulsado pola extrema dereita para acabar cun Gabinete comprometido coa neutralidade do país. Ese mesmo ano os golpistas acabaron coa neutralidade militar ucraína. O propio Trump admitiu que o apoio estadounidense á entrada de Kíiv na OTAN foi o detonante da invasión rusa en febreiro de 2022, dous meses despois de rexeitar Washington unha oferta de Moscova para deseñar unha nova arquitectura de seguridade que incluíse o veto á entrada de Ucraína na OTAN. Negociacións en Istambul Despois de que o 16 de maio Istambul (Turquía) acollera as primeiras negociacións directas en máis de tres anos entre Rusia e Ucraína, Moscova propuxo que a segunda xuntanza decorra a segunda feira na mesma cidade. No encontro inicial pactouse un intercambio de 1.000 prisioneiros por bando (que xa se produciu), desenvolver as condicións das partes para un cesamento do fogo e proceder con novas conversas. A sexta feira aínda non estaba claro se Kíiv asistiría, pois exixe recibir con anterioridade as propostas rusas para un hipotético acordo de paz, insistindo en pactar o antes posíbel unha tregua, algo que Moscova rexeita até que haxa perspectivas dun acordo final que acabe co conflito, e entre o temor de que o Exército ucraíno a aproveite para reagruparse e lanzar un ataque após xustificar de calquera forma a fin do cesamento das hostilidades, precisamente cando os avances rusos se suceden nos últimos meses. A China advirte de que a 'cúpula dourada' desatará unha carreira armamentística no planeta Sexa como for, o Kremlin sinalou que o seu equipo negociador se desprazará a Istambul. Os dous países confirmaron tamén que xa teñen listas as propostas. En última instancia, prevese que Ucraína participe, pois Kellogg transmitiu que así llo solicitaron, logo de que tiveran que presionar o Goberno de Volodimir Zelenski –afoutado pola tentativa dos membros europeos da OTAN (a maioría na Unión Europea, UE) de obstaculizar unha saída negociada, acabando cos límites de alcance das armas que entregan a Kíiv para que ataque Rusia e implementando novas sancións a Moscova– para que aprobara formar parte da primeira reunión. En paralelo, o enviado especial pormenorizou que na xuntanza tratarán de fusionar as propostas nun único documento. Polo de agora, os medios internacionais fan fincapé en que as expectivas do encontro son modestas, coas posicións das partes moi afastadas, e non hai consenso sobre se o endurecemento das posicións públicas dos Estados Unidos, Rusia e Ucraína nas últimas xornadas, cunha intensificación da actividade bélica entre as dúas últimas, responde á intención de fortalecer a súa postura nas conversas ou presaxia un colapso das negociacións. Aínda que a disposición de Washington a negociar a fin da expansión da OTAN é coherente co seu anuncio de que a UE debe valerse por si propia a nivel militar para que poidan centrar todas as súas enerxías en rivalizar coa China no Indo-Pacífico, implicaría pór fin ao papel de Washington como potencia dominante no continente europeo, facendo difícil xustificar o motivo polo que antes da invasión de 2022 rexeitou pactar que Ucraína mantería a neutralidade, azuándoa para que se achegase á OTAN. Nestas circunstancias, incluso o secretario xeral da OTAN, Mark Rutte, deixou entrever que suporía unha derrota. Unha trintena de países crean un órgano para mediar na resolución de disputas Tras tres anos de traballo, a sexta feira decorreu en Hong Kong (China) a cerimonia de sinatura da convención que crea a Organización Internacional de Mediación, con sede no territorio chinés, que se dedicará a promover a resolución por medio do diálogo e os métodos pacíficos de disputas internacionais e crear relacións entre estados “máis harmoniosas”, detallou o titular de Exteriores chinés, Wang Yi. A entidade aspira a mediar en conflitos entre estados ou entre países e investidores estranxeiros, así como en disputas comerciais de carácter internacional, e “pode axudar a transcender a mentalidade de suma cero de ‘ti perdes-eu gaño’”, sostivo. As autoridades chinesas afirmaron que será o primeiro organismo intergobernamental centrado na mediación, e estará “en pé de igualdade” co Tribunal Internacional de Xustiza ou o Tribunal Permanente de Arbitraxe na Haia (Países Baixos) unha vez que estea activo, o que se prevé para finais deste ano ou comezos de 2026. Ademais de subliñar que a entidade estará en liña cos principios da Organización das Nacións Unidas (ONU), Wang remarcou a importancia de "amplificar as voces do Sur Global" nas institucións internacionais. 33 países rubricaron o convenio na cerimonia, entre eles Indonesia, Paquistán, Laos, Camboxa e Serbia, nun evento ao que asistiron arredor de 400 representantes de 85 países de Europa, América, África e Asia, e unha vintena de organismos internacionais, incluída a ONU, informou o Ministerio de Relacións Exteriores chinés.