A dereita e a ultradereita españolas apreman a Xustiza para frear a investidura de Sánchez e a amnistía

Como aconteceu no fracasado intento de investidura de Alberto Núñez Feixoo, do Partido Popular (PP), malia que daquela non estaba claro que se chegase a producir un acordo entre o PSOE e as forzas catalás, que exixían a amnistía para apoiar a reelección de Pedro Sánchez (PSOE) como presidente no Congreso español, todo indica que na sesión de investidura que comeza esta cuarta feira, xa con Sánchez como candidato, a amnistía volverá ser o eixo central do debate, que de forma previsíbel rematará nas votacións da quinta feira coa elección de Sánchez para un novo mandato co apoio de Sumar e as forzas nacionalistas de Catalunya, Euskadi e a Galiza, así como Coalición Canaria (CC), tras asinar distintos acordos de investidura ou lexislatura. A sesión chega no marco dunha ofensiva dos conservadores e da ultradereita, co apoio do sistema xudicial español, contra o Proxecto de lei orgánica de amnistía, rexistrado a segunda feira na Cámara Baixa, e cuxa aprobación definitiva levará meses. Tanto PP como a ultraespañolista Vox buscan desde suspender a investidura até imposibilitar que a lei, que beneficiará as persoas independentistas catalás represaliadas polo Estado español e que tamén incluirá os policías denunciados por actos de violencia para evitar o referendo de autodeterminación do 1 de outubro de 2017 en Catalunya, chegue a ser promulgada. Plano xudicial Após os comunicados en contra da amnistía do Consello Xeral do Poder Xudicial, controlado polos conservadores, o Tribunal Supremo (TS) ou a Confederación Española de Organizacións Empresariais, Ramón Fernández-Pachecho, voceiro do Executivo de Andalucía dirixido polo PP, anunciou hoxe que están a traballar nun recurso de inconstitucionalidade, algo que tamén anunciou outro dos territorios gobernados pola formación, a Rexión de Murcia. DOCUMENTO | Así é a Lei de amnistía: dende os CDR e o Tsunami até os antidisturbios do 1-O Pola súa parte, Vox presentou no TS unha demanda contra Sánchez, o ex presidente catalán Carles Puigdemont (Junts), e os seus partidos por suposto suborno, encubrimento de delitos, usurpación de funcións do Poder Xudicial e negociacións prohibidas a funcionarios públicos. Nese sentido, reclama como medida preventiva que se suspenda o debate de investidura. Tamén intentará frear no Tribunal Constitucional (TC) a tramitación da norma insistindo en que é inconstitucional, e adiantou que demandarán por prevaricación Fernando Galindo, letrado maior da Cámara Baixa española, no caso de que emita un informe favorábel a súa tramitación. O equipo xurídico do órgano si que emitiu un informe favorábel no tocante a unha proposta de lei da extrema dereita para ilegalizar forzas nacionalistas. A Mesa do Congreso aprobou por unanimidade que o Hemiciclo debata un texto para prohibir formacións que teñan por fin -ou que a súa actividade o suxira- “quebrar a unidade de España e a orde constitucional”. A mesma proposta foi rexeitada polo lexislativo en 2020. Fontes do TC trasladaron a medios estatais que darán prioridade aos recursos que se presenten contra a amnistía, porén, indicaron que non prevén un veredicto arredor desta cuestión antes de seis meses. Asemade, apuntan que “se agarda” que as propias maxistradas e maxistrados do TS responsábeis de causas vinculadas co proceso independentista catalán presenten unha petición para que o TC determine se é constitucional ou non. O sindicato de Vox convoca unha folga xeral contra a amnistía... que sería ilegal Á vez, Curro Nicolau, un avogado que denunciara as restricións no País Valencià no contexto da aparición da Covid-19, presentou un recurso no Tribunal de Xustiza da Unión Europea que pide a anulación de forma provisoria da promulgación da amnistía, acusando a Comisión Europea de inacción perante unha suposta infracción dos “principios básicos” das leis comunitarias e da separación de poderes. A propia Comisión defendeu hoxe que é un asunto interno español e que non choca coa normativa da Unión Europea (UE). Plano político No Senado, o PP, que conta con maioría absoluta, aprobou nun proceso acelerado unha reforma no regulamento que permite á Mesa decidir se aplica ou non o procedemento de urxencia -polo que foi tramitado a amnistía- en cada caso, o que permitirá na práctica que o paso polo Senado da norma se prolongue até dous meses, o máximo fixado pola Constitución. Tamén avalou unha emenda para que o presidente do Goberno ou os integrantes do Executivo teñan que comparecer cando o reclamen os grupos parlamentarios. O PP válese da súa maioría absoluta para mudar de forma exprés as normas do Senado e bloquear a amnistía Ademais, no mínimo dez comunidades autónomas -entre elas Galiza- en mans do PP, varias en coalición con Vox, e Canarias (gobernada por CC e PP), lanzaron unha solicitude a Sánchez para convocar unha Conferencia de Presidentes que aborde os acordos de investidura coas forzas catalás. En última instancia, a súa convocatoria é unha decisión que compete ao actual presidente en funcións. Ao tempo, o voceiro de Justicia para la Guardia Civil (Jucil), que acusou Sánchez de “traizón”, e dous membros da Asociación Pro-Guardia Civil, que comunicaron a súa disposición a “derramar o seu sangue” na defensa da Constitución, foron sancionados polo corpo militar, nun proceso que pode supor a súa expulsión por violar a neutralidade política á que están obrigados. Galego na UE En paralelo ao comezo da sesión de investidura, o Consello de Asuntos Xerais da UE abordará unha reforma do regulamento lingüístico, logo de que Madrid presentara hoxe unha nova proposta para tratar de superar as inquedanzas de varios Estados membros á oficialidade do catalán, o éuscaro e o galego. En todo caso, non está previsto que se vote a proposta, á espera dun informe técnico que ten que remitir o Executivo da UE. O BNG acusa Feixoo de "trumpismo" O deputado do Bloque Nacionalista Galego (BNG) no Congreso, Néstor Rego, denunciou que o Partido Popular (PP), encabezado por Alberto Núñez Feixoo, impulsa unha “estratexia trumpista de deslexitimación das maiorías democráticas” ante a súa incapacidade de asumir que non ten apoios dabondo para gobernar. Incidindo en que agora se amosa a verdadeira cara dun Feixoo “cada vez máis escorado á dereita ultra e na estela de Vox”, defendeu o voto favorábel dos nacionalistas na investidura logo dun acordo co PSOE que “favorece a Galiza e as clases populares e as maiorías sociais”.