A demisión de Ramón Espinar de todos os seus cargos agrava a crise de Podemos
Home de Pablo Iglesias, era partidario de tender pontes con Errejón, isto é, de non competir nas autonómicas madrileñas co tándem formado polo cofundador de Podemos e Manuela Carmena. Nisto discrepaba con Pablo Iglesias.
Ramón Espinar, na súa condición de secretario xeral de Podemos Madrid, era o encargado de montar unha candidatura alternativa á que vai encabezar Íñigo Errejón. Non o fará porque esta sexta feira acaba de renunciar a todos os seus cargos orgánicos e institucionais —senador e portavoz da organización no Parlamento autonómico—, un auténtico golpe de efecto que leva a formación morada a unha situación límite.
"Cando non tes marxe para dirixir e non partillas o rumbo, teste que ir", declarou o dirixente demisionario a eldiario.es. Fontes consultadas por El País alegan, por súa parte, que "Espinar se vai porque non quere pór a competir o partido con Errejón".
A saída de escena de Espinar complica moito a vida a Iglesias e mostra como un importante sector de adeptos ao líder morado pensa que é un erro estratéxico conducir a organización a un confronto co dueto Errejón-Carmena.