Cuba e Palestina

O conflito entre Israel e Palestina gañou nova relevancia no escenario noticioso internacional logo da escalada iniciada o pasado 7 de outubro. A brutalidade da arremetida israelí, practicamente sen comparación con outras agresións anteriores, expuxo o cinismo de moitos dos grandes poderes occidentais, cacarexados defensores dos "dereitos humanos", pero indolentes ante o xenocidio que se está cometendo fronte aos seus ollos por fríos cálculos de intereses xeopolíticos. O gran esforzo mediático está dirixido hoxe a presentar os vitimarios como vítimas, en satanizar a resistencia palestina e invisibilizar ou diminuír as accións de Israel. Nese longo conflito, é xusto apuntar a fermosa páxina de solidariedade entre os pobos que desde hai décadas vén escribindo unha pequena illa do Caribe. Cuba, a "terrible e inhumana ditadura" que insisten en debuxar os grandes medios cartelizados, foi e é unha das máis firmes defensoras do pobo palestino. Fidel e a causa palestina Aínda que a Revolución cubana desde data ben temperá mostrou a súa solidariedade co pobo palestino, a figura de Fidel, a súa comprensión do mundo árabe e as relacións que teceu cos principais líderes e movementos de resistencia nesa zona xeográfica foron claves. Especial relevancia ten a súa relación con Yasser Arafat, histórico líder da resistencia palestina. O 12 de outubro de 1979, na súa condición de presidente do Movemento de Países Non Aliñados (Mnoal), Fidel falou enfaticamente sobre o conflito israelí-palestino con palabras que resultan de total actualidade aínda hoxe: "Desde o fondo das nosas almas, repudiamos con todas as nosas forzas a desapiadada persecución e o xenocidio que no seu tempo desatou o nazismo contra o pobo hebreo. Pero non podo lembrar nada máis parecido na nosa historia contemporánea que o desaloxo, persecución e xenocidio que hoxe realizan o imperialismo e o sionismo contra o pobo palestino". En 1982, en diálogo co líder palestino Yasser Arafat, Fidel comunicou a decisión de Cuba de recibir 500 nenos palestinos para que levasen a cabo os seus estudos na nación antillana. Isto marca o inicio dunha colaboración que ao longo dos anos graduou miles de palestinos en medicina, enxeñerías e outras profesións que son fundamentais para o desenvolvemento das súas comunidades. Aínda hoxe centos de mozos palestinos estudan en diversas universidades cubanas con bolsas achegadas polo goberno de Cuba. Fidel tamén expuxo a situación palestina en numerosos foros internacionais ao longo do seu extenso labor político. E xa retirado, seguiu de perto a realidade na zona. Proba da indignación que lle provocaba a impunidade do xenocidio israelí é un texto publicado o 6 de agosto de 2014 na súa habitual columna de opinión no diario Granma, baixo o título: "Holocausto palestino en Gaza". O actual conflito A violencia desatada o pasado 7 de outubro cobrou un saldo arrepiante de vidas palestinas. Máis de 20.000 mortos, deles, máis de 9.000 son crianzas, e os números continúan en ascenso mentres se denuncia por numerosas organizacións internacionais o ataque a hospitais, escolas, edificios residenciais, mesquitas e o uso de fósforo branco. Nunha carta recente o Secretario Xeral da ONU denunciaba que máis de 80% da poboación de Gaza debeu refuxiarse. Desde o inicio desta nova escalada, Cuba mantivo unha postura coherente coa súa histórica política de apoio ao pobo palestino e solución pacífica do conflito. Por só mencionar algunhas accións, a illa impulsou e votou a favor da resolución "O dereito do pobo palestino á libre determinación". Apoiou, como membro do Mnoal, a posición do bloque ante o Consello Executivo da Organización para a prohibición das Armas Químicas denunciando o posíbel uso por parte de Israel de armamento prohibido. Tamén interveu nos numerosos foros internacionais convocados, incluíndo varias sesións extraordinarias da Asemblea Xeral da ONU, esixindo o cesamento do fogo e reivindicando os dereitos do pobo palestino. O presidente da república e primeiro secretario do partido, Miguel Díaz-Canel, mantivo un encontro con 144 mozos palestinos que estudan en Cuba. En diálogo con eles, ratificou a firme posición do país ao lado da causa palestina. Tamén o día 23 de novembro convocouse unha marcha masiva de solidariedade polo dique habaneiro, onde decenas de miles de cubanos expresaron a súa solidariedade e o rexeitamento non só á política israelí, senón o rexeitamento á política imperialista de Washington na rexión. Ante a nova resolución aprobada este 13 de decembro por maioría absoluta na ONU, o presidente cubano pronunciouse en redes sociais con total firmeza: "O xenocidio que executa Israel contra o pobo palestino, coa complicidade dos EUA debe cesar xa. Urxe atender o reclamo desta nova resolución da ONU para deter de inmediato a barbarie en Gaza. Esiximos a paz para Palestina".