Colombia ocultou como baixas en combate o asasinato de 314 crianzas
Segundo datos entre 2004 e 2019 do Instituto Nacional de Medicina Legal e Ciencias Forenses fornecidos ao ex candidato presidencial Gustavo Petro, que presentou no Senado, «dos 314 asasinados, 15 son menores de catro anos».
Polo menos 314 menores de idade morreron os últimos 15 anos en Colombia aparentemente en operacións da forza pública e foron presentados como «datos de baixas en combate», segundo denunciou o senador e ex candidato presidencial polo movemento Colombia Humana (socialdemócrata) Gustavo Petro.
«Dos 314 menores que foron asasinados, 15 son menores de catro anos, 95 nenas e 204 nenos. Nese mesma orde o ano que menos presentou asasinatos foi 2018 con só dous rexistros», apuntou Petro na presentación do seu informe nunha sesión especial do Senado.
A investigación do senador, informan os medios locais e as axencias internacionais, abarca desde 2004 até que vai de 2019. No primeiro ano documentouse a morte de 44 menores, a cifra máis alta do período analizado.
Dimisión do ministro de Defensa
Durante o Goberno de Álvaro Uribe (2002-2010) contabilizáronse 177 mortes de menores, en tanto que no do seu sucesor, Juan Manuel Santos (2010-2018), ocorreron 124.
Desde o 7 de agosto do ano pasado, cando asumiu a presidencia Iván Duque, morreron 13 menores, entre estes os oito dun bombardeo militar en agosto pasado contra disidentes das FARC en Caquetá e que lle custou o posto ao ministro de Defensa, Guillermo Botero.
A información, salientou Petro, foille fornecida de «xeito oficial polo Instituto Nacional de Medicina Legal e Ciencias Forenses».