Ciudadanos dá o sorpasso ao PP en Valéncia e perfílase como a terceira forza no Estado

Sismo eleitoral en Valéncia, tradicional feudo do PP, e demostración de que Génova xa non ten o monopolio sobre o centro-direita. Un inquérito realizado por Metroscopia para El País coloca Ciudadanos como primeira forza política para as eleccións xerais, cunha estimación de entre 9 e 10 escanos e o 25,4% dos sufraxios. O fiasco do Partido Popular é monumental: non só cedería 12 mandatos (pasaría de 20 parlamentares a só 8), senón que mesmo é superado polo PSOE, que se faría co 23,3% do voto e entre 8 e 9 asentos no Congreso. O PP ficaría apenas co 21,6% dos sufraxios. A debacle non ten precedentes, sendo que en 2011 acadara o 53,3%.

A candidatura propia do país, Compromís -marca na que está integrado o Bloc Nacionalista Valencià-, obtería un bon resultado nesta enquisa, unha vez que todo apunta a que non irá ás xerais en coligazón con Podemos. Mantén o seu escano e incrementa as súas expectativas de voto, ao pasar do 4,8% ao 7,3%.

A sondaxe convida a pensar que Ciudadanos se perfila como a terceira forza en potencia, deixando atrás a un Podemos que nos últimos meses está a rexistar un descenso imparábel nas enquisas

Por súa parte, Podemos roldaría o 15,6 % dos votos -10 pontos por debaixo de Ciudadanos- e apañaría 5 actas no Congreso, mentres que a Esquerra Unida del País Valencià cedería lixeiramente en porcentaxe de voto (descería do 6,5% ao 5,6%) mas sería quen de manter a súa presenza, un deputado, no Congreso.

A sondaxe convida a pensar que no actual cadro político Ciudadanos se perfila como a terceira forza en potencia, deixando atrás a un Podemos que nos últimos meses está a rexistar un descenso imparábel nas enquisas e que acaba de colleitar un resultado moi por debaixo do agardado nas eleccións ao Parlament de Catalunya.