Bruxelas investiga Google por posíbel abuso no uso de contido para adestrar a súa IA

A Comisión Europea abriu unha investigación formal para determinar se Google vulnerou as normas de competencia da UE ao empregar contidos de editoriais, medios dixitais e creadores de YouTube no adestramento e funcionamento dos seus servizos de intelixencia artificial (IA) sen ofrecer compensación nin permitir unha oposición real ao uso destes materiais. Bruxelas sospeita que o xigante tecnolóxico podería estar distorsionando o mercado ao impor condicións inxustas e dándose a si mesmo un acceso privilexiado que deixa en desvantaxe as empresas rivais.

Segundo comunicou esta terza feira Bruxelas, o procedemento céntrase en tres ámbitos principais: o emprego de contido de webs para alimentar ferramentas como AI Overviews ou AI Mode, o uso de vídeos e materiais de YouTube para adestrar modelos xerativos de IA, e as posíbeis restricións indebidas ao acceso de investigadores independentes aos datos públicos que xera a plataforma.

AI Overviews e AI Mode baixo sospeita

Bruxelas analizará de que maneira Google utiliza contido publicado por medios e webs europeas para xerar respostas automáticas a través de AI Overviews —resumos creados por IA que se mostran por riba dos resultados orgánicos— e AI Mode, un modo conversacional semellante a un chatbot integrado na busca. A Comisión sospeita que estas funcionalidades aliméntanse de maneira substancial de contido de editoriais sen compensación nin opción de exclusión sen perder visibilidade no buscador, elemento no que moitos medios dependen para obter tráfico.

A normativa europea non obriga as plataformas a verificar ou limitar estes usos, pero si prohibe prácticas de deseño enganoso ou imposicións que coloquen terceiros nunha situación de dependencia abusiva.

Outro dos puntos clave é o uso de vídeos e outros materiais cargados en YouTube —propiedade de Google— para o adestramento dos seus modelos xerativos. A Comisión destaca que os creadores están obrigados a permitir este uso para poder publicar na plataforma, mais non reciben ningunha remuneración específica, nin poden subir contidos sen aceptar esa cesión de dereitos.

Ao mesmo tempo, YouTube prohibe que desenvolvedores de IA rivais utilicen contidos da plataforma para adestrar os seus propios modelos, un comportamento que podería constituír unha restrición indebida á competencia.

Bruxelas tamén examinará se Google estabelece obstáculos inxustificados ao acceso de investigadores acreditados aos datos públicos da plataforma. A compañía impón condicións que, segundo a Comisión, poderían impedir a análise independente de riscos sistémicos vinculados á desinformación, ao funcionamento dos algoritmos ou ao impacto da plataforma na sociedade.

Posible infracción do Tratado de Funcionamento da UE

Se se confirman as sospeitas, Google podería ter vulnerado o artigo 102 do Tratado de Funcionamento da UE, que prohibe os abusos de posición dominante, así como o artigo 54 do Acordo do Espazo Económico Europeo. A apertura do procedemento implica que as autoridades estatais deberán absterse de actuar en paralelo e deixa agora o foco sobre a avaliación en Bruxelas.

Non existe prazo legal para concluír unha investigación deste tipo, que dependerá da complexidade do caso e da dispoñibilidade de información por parte da compañía. Google xa foi informada formalmente da apertura do expediente.