Dimite o xefe de Gabinete de Zelenski tras un rexistro das axencias anticorrupción

A Oficina Nacional Anticorrupción (NABU) e a Fiscalía Especializada Anticorrupción de Ucraína (SAPO) informaron a sexta feira de que estaban efectuando “rexistros no domicilio do xefe da Administración presidencial”, Andrii Yermak. Pola súa parte, o xefe de Gabinete do mandatario ucraíno Volodimir Zelenski indicou en Telegram que “os investigadores non están a atopar ningún obstáculo” e obtiveron “acceso completo ao meu departamento”, insistindo en que cooperará “plenamente” e detallando que “os meus avogados están alí e están a interactuar coas forzas de seguridade”. O portal Dzerkalo Tyzhnia reportou que os rexistros se desenvolveron na súa oficina e no apartamento no que vive desde a invasión rusa, localizado na sede presidencial. Porén, xa pola tarde Zelenski anunciaba que presentou a súa dimisión, que foi aceptada posto que "non quero que haxa rumores nin especulacións". Yermak, incidiu a axencia AFP, “é considerado por moitos como o segundo home máis influínte do país, só por detrás do presidente”, amigo próximo seu, amais de liderar o equipo negociador de Kíiv nas últimas conversas cos Estados Unidos sobre un plan de paz para acabar coa guerra con Rusia. Malia que o comunicado conxunto da NABU e a SAPO recolleu que o rexistro “autorizado” estaba relacionado cunha investigación que non especificou, todo indica á existencia dun vínculo co escándalo, que a axencia Reuters cualificou como a “peor crise política de Ucraína en tempos de guerra”, que estoupou a comezos deste mes. Nese momento, a NABU fixo público que descubriu un “sistema criminal” dirixido por Timur Mindich, socio comercial e amigo de Zelenski, que teceu unha rede de subornos coa que desviou 86 millóns de euros da compañía estatal de enerxía atómica, Energoatom. As pescudas constataron que Mindich se aproveitou da súa relación co mandatario e a cúpula do poder ucraíno para deseñar o esquema de corrupción. A comisión para outorgar ou revogar contratos con Energoatom movíase entre 10% e 15%. Ademais das cinco detencións, tras os rexistros do domicilio de membros do Gabinete e da empresa Zelenski anunciou a destitución de German Galushchenko, titular de Xustiza, e Svitlana Grinchuk, de Enerxía, aliás do cesamento do consello directivo de Energoatom. Ao tempo, Mindich conseguiu fuxir antes de que o detiveran. O presidente, baixo presión Zelenski xa rexeitara despedir Yermak após transcender o caso, e que membros do seu propio partido, Servidor do Pobo, que conta con maioría absoluta na Rada Suprema, e outras forzas no Parlamento, todas conservadoras despois da prohibición de todos os partidos progresistas relevantes, llo demandaran, revelou o portal Politico. En todo caso, o xefe de Gabinete ucraíno non foi designado sospeitoso. Crecen as protestas en Ucraína pola nova norma contra as axencias anticorrupción Antes da saída de Yermak, as persoas achegadas a el e Zelenski coas que falou Shaun Walker, de The Guardian, fixeron énfase en que “a relación é tan próxima que é difícil imaxinar que Zelenski dea ese paso”. O xornalista pormenoriza que o xefe de Gabinete acumulou tal poder que “é difícil exaxerar” a súa importancia no “sistema político ucraíno”, cunha influencia que vai da man con que “poucos na elite ucraína” teñan “unha visión positiva de Yermak”. No exterior, funcionarios da Casa Branca trasladaron que preferirían tratar con Rustem Umerov, que lidera o Consello de Seguridade Nacional e Defensa ucraíno e que foi interrogado no contexto da causa esta semana. Antes desta, a crise política máis grave en Ucraína desde a invasión rusa decorrera o pasado mes de xullo, con milleiros de persoas protestando en múltiples cidades pola decisión de Zelenski de intervir a SAPO e a NABU, colocándoas baixo control gobernamental directo. Logo de lanzar os servizos secretos ucraínos unha redada contra máis de 80 oficinas e vivendas vinculadas coas entidades, o presidente tivo que dar marcha atrás, ante a alarma tamén no seo da Unión Europea (UE), que está a financiar os envíos de armamento máis recentes a Kíiv. A pesar do papel chave de Yermak nas negociacións de paz, esta semana resaltou nunha entrevista que “ninguén debería contar con que renunciemos ao territorio”. Con todo, aparenta existir consenso en que as áreas controladas polos soldados rusos no Donbás, Khersón e Zaporijia ficarán nas súas mans máis alá da fórmula que se articule. En paralelo, Dmitri Peskov, portavoz do Kremlin, ratificou a sexta feira que os Estados Unidos comunicaron “os principais parámetros” do documento resultante das negociacións entre Washington e Kíiv en Xenebra (Suíza) a pasada fin de semana, polo que “a próxima semana terá lugar unha conversa en Moscova”, onde se desprazará Steve Witkoff, enviado especial de Donald Trump, ocupante da Casa Branca. Asemade, o presidente ruso, Vladimir Putin, confirmou a sexta na visita a Rusia do primeiro ministro de Hungría, o ultradereitista Viktor Orbán, que acepta a súa oferta para que a capital do país, Budapest, acolla unha posíbel reunión bilateral Putin-Trump. Bélxica afasta a confiscación da UE O primeiro ministro de Bélxica, Bart De Weber, remitiu unha misiva a Ursula von der Leyen, presidenta da Comisión Europea, na que advirte que “avanzar de forma apresurada no esquema de préstamos de reparacións [avalados con activos rusos conxelados, o que suporía unha clase de confiscación]” tería como “dano colateral” impedir “alcanzar un eventual acordo de paz”, desvelou o xornal Financial Times. A meirande parte dos activos rusos conxelados están na sede central de Euroclear, en Bruxelas, o que explica o seu temor ante a posibilidade de que o país teña que responder por eles. Valérie Urbain, presidenta executiva da compañía, aseverou a Von der Leyen que ese préstamo encarecería o endebedamento da UE e sería visto como socavar o “Estado de dereito”.