A Arxentina desenvolve unhas primarias chave

Máis de 35 millóns de arxentinas e arxentinos están convocados para votar mañá nas eleccións primarias a nivel presidencial e lexislativo, primeira fase de camiño ás eleccións do 22 de outubro. Nas votacións do domingo non só se decidirá que candidatas e candidatos representan cadansúa coalición, senón se poden participar nos comicios, para o que precisan facerse no mínimo con 1,5% dos sufraxios válidos a nivel nacional. Tres das 15 listas das primarias presidenciais concentran a meirande parte da atención, a progresista Unión pola Patria, herdeira da Fronte de Todos coa que Alberto Fernández se impuxo nas eleccións de 2019, a conservadora Xuntos polo Cambio e A Liberdade Avanza, do candidato de extrema dereita Javier Milei. Estas votacións, que viñan marcadas pola difícil situación económica e polo conflito social aberto en Jujuy, estarán determinadas en última instancia por dúas mortes, a dunha crianza a pasada cuarta feira e a dun militante de esquerda a quinta feira no marco da represión das forzas de seguridade de Bos Aires, o que levou á suspensión dos actos de final de campaña das principais candidaturas. No que atinxe á economía, o Executivo destaca a redución do desemprego por baixo de 7% en paralelo a un crecemento económico sostido nos últimos anos. Porén, a Covid-19 primeiro e a seca extrema que sufriu o país despois afectaron a mellora dos datos económicos no medio dunha inflación de 115% e dos compromisos co Fondo Monetario Internacional. Hai unha semana, Bos Aires recibiu un crédito de Qatar para afrontar un pago de 700 millóns de euros, poucos días despois de efectuar outro de case 2.500 millóns de euros con iuans e dólares prestados pola CAF-Banco de Desenvolvemento de América Latina e o Caribe. En Jujuy, unha nova Constitución territorial que limita a protesta social, facilita as explotacións mineiras en territorios indíxenas ou somete o sistema xudicial ao Goberno de Jujuy, foi impulsada polo gobernador conservador Gerardo Morales. Máis de 170 persoas resultaron feridas pola represión ás protestas a finais de xuño, cando a aprobación do texto era inminente. Así e todo, grupos indíxenas, sindicalistas e progresistas proseguen coas mobilizacións e advertiron que a segunda feira intensificarán as protestas no caso de que non obteñan resposta ás súas reclamacións. Morena Domínguez tiña 11 anos e vivía en Lanús, na periferia de Bos Aires. Na mañá da cuarta feira, cando camiñaba á escola, foi asaltada por dúas persoas que lle roubaron a mochila e a golpearon, o que provocou a súa morte pouco despois. Unión pola Patria cargou contra Xuntos polo Cambio, que goberna o municipio, pola ausencia da Policía na zona e polo atraso na chegada dunha ambulancia. Antes de que o caso de Domínguez abandonase as cabeceiras da prensa arxentina, fíxose pública unha nova morte a quinta feira, a de Facundo Molares, ex combatente arxentino das Forzas Armadas Revolucionarias de Colombia. Molares participaba no Obelisco, en Bos Aires, nun acto político da agrupación Fogoneros Luciano Lupi, Votamos Luchar, Movemento Teresa Rodríguez e Rebelión Popular “contra a farsa electoral e a democracia do pobo”, en alusión aos comicios do domingo. Testemuñas presenciais relataron a Télam que cando a protesta xa rematara e estaban a recoller a Policía municipal entrou a desaloxalos e comezou a reprimir os participantes cando intentaron evitar a detención dun deles. Nese contexto, vídeos independentes amosaron como Molares, que se desempeñaba como fotógrafo, foi asfixiado no chan polos axentes, mentres que o Goberno local defendeu que foi un paro cardíaco. As principais dúbidas, no campo conservador O alcalde, o conservador Horacio Larreta, lamentou a morte mais eloxiou a acción dos policías. Larreta é un dos precandidatos presidenciais de Xuntos polo Cambio, e leva a Morales, gobernador de Jujuy, como o seu vicepresidente. Aínda así, a última enquisa publicada antes do veto ás sondaxes, da consultora Federico González & Asociados, defende que non logrará a designación como candidato, ao obter 16,3% de intención de voto, por detrás da ex ministra en distintos períodos Patricia Bullrich, que se convertería na principal candidata conservadora con 20,1%. En todo caso, sería o actual ministro de Economía, Sergio Massa, o que alcanzaría a primeira praza con 23,8% dos votos, o que lle garantiría o nomeamento de Unión pola Patria fronte a Juan Grabois, fundador do Movemento de Traballadores Excluídos e apoiado por boa parte dos movementos sociais, que ficaría con 6,3%. Atacada unha candidata no Ecuador A candidata alterna á Asemblea Nacional do Ecuador Estefany Puentes foi disparada no seu coche, reportaron onte medios internacionais, sen que fora ferida. O ataque produciuse despois do asasinato do candidato presidencial Fernando Villavicencio na madrugada da cuarta á quinta feira, que levou o presidente Guillermo Lasso a decretar o estado de excepción en todo o país. Os seis detidos polo asasinato, amais dun atacante falecido, teñen nacionalidade colombiana.