Así multiplica Alemaña o envío de armas a Israel en plena escalada da agresión militar de Tel Aviv

O Goberno alemán aprobou nos últimos dous meses o envío de armamento a Israel por valor de máis de 31 millóns de euros, o que supón máis do dobre das licenzas autorizadas durante o resto do ano e evidencia a "solidariedade" de Berlín, afirmou esta cuarta feira o chanceler Olaf Scholz.

En contraposición, o Executivo francés solicitou esta cuarta feira ao salón Euronaval, que reunirá en novembro empresas de defensa, que non autorice a participación formal de compañías israelís.

Pola súa parte, o primeiro ministro de Irlanda, Simon Harris, adiantou que na reunión do Consello Europeo que terá lugar esta quinta feira reiterará, "xunto" ao seu homólogo español Pedro Sánchez, a petición de que se revise o acordo de asociación entre a Unión Europea (UE) e Israel.

Estas reaccións danse nun contexto no que as vítimas mortais polos ataques israelís sobre a Faixa de Gaza xa alcanzan as 42.400, ao estimarse que 65 persoas máis faleceron nas 24 horas desde o último reconto. 

Ademais, Israel realizou esta cuarta feira o seu primeiro ataque desde o mar sobre o Líbano no contexto da actual agresión militar a este país, que xa provocou máis de 2.000 mortes, entre elas a do alcalde de Nabatiye (sur), Ahmed Kaheel, abatido xunto a outras catro persoas no consistorio.

Chamamento de Irán

Contra os incesantes ataques israelís, o presidente de Irán, Massoud Pezeshkian, fixo esta cuarta feira un chamamento á unión dos pobos musulmáns para disuadir o "réxime sionista" de cometer máis "crimes".

Pola súa parte, o ministro de Exteriores iraniano, Abbas Araqchi, mostrou esta cuarta feira a súa disposición a ofrecer unha "resposta decidida" a Israel no caso de que se produzan novos ataques contra o seu territorio.