64 Estados do mundo perseguen as relacións sexuais da comunidade LGBT

A Asociación Internacional de Lesbianas, Gais, Bisexuais, Trans e Intersex (ILGA) denunciou a quinta feira que 64 países criminalizan os actos sexuais entre persoas do mesmo sexo, que en Brunei, Mauritania, Irán, Nixeria, Arabia Saudita e o Iemen supoñen unha condena a pena de morte. Apenas un día antes, o Parlamento de Uganda aprobou unha das leis máis restritivas contra a comunidade LGBT, e que segundo Human Rights Watch é a primeira no mundo que prohibe directamente identificarse como parte desa comunidade. ILGA, conformada por máis de 1.800 organizacións en arredor de 160 territorios, incide en que até 51 membros da Organización das Nacións Unidas (ONU) contan con normativas que atentan contra a liberdade de expresión no relacionado con cuestións de xénero e diversidade sexual. Deste grupo, 11 países lexislaron sobre o tratamento do que atinxe á comunidade LGBT no ensino e 25 sobre os contidos nos medios de comunicación. Asemade, en 55 Estados hai obstáculos legais moi restritivos para as organizacións en defensa dos dereitos da comunidade LGBT e os seus integrantes, entrementres o matrimonio igualitario só está permitido en 33 países e a adopción por parte de parellas homosexuais nun número semellante. Unha cifra menor de territorios, 20, recoñecen a autodeterminación de xénero e outros tantos avalan que a cidadanía se poida definir como de xénero non binario, e só 11 países prohiben as denominadas “terapias de conversión”, iniciativas pseudo científicas para que as persoas renuncien á súa orientación sexual por medio de “abusos físicos, psicolóxicos e sexuais”, sostén Víctor Madrigal-Borloz, experto independente da ONU sobre orientación sexual e identidade de xénero, que asegurou que “poden equivaler á tortura”. As agresións por LGBTfobia cuadruplicáronse en cinco anos A lei ugandesa A norma aprobada polo lexislativo ugandés, pendente de que o presidente Yoweri Museveni a asine para converterse en lei, prohibe as relacións entre as persoas do mesmo sexo baixo ameaza de cadea perpetua, e tamén veta promover as relacións homosexuais, favorecelas ou participar nunha conspiración que derive nelas. Ao tempo, introduce a pena de morte para o que define como "homosexualidade agravada", que caracteriza como ter relacións cunha persoa do mesmo sexo mais menor de 18 anos ou cando o suposto agresor é seropositivo, explica Al Jazeera. Así e todo, a criminalización da comunidade LGBT non é nova, pois a flamante lexislación endurece leis que proveñen das máis de sete décadas nas que Uganda foi sometida como unha colonia do Reino Unido. A pasada semana seis homes foron arrestados na cidade de Jinja, no sueste do país, detencións que precederon as doutros seis homes o domingo, todos por “practicar a homosexualidade”, afirmou a Policía ugandesa. “Os membros da comunidade están a vivir con medo”, alertou Frank Mugisha, director executivo de Minorías Sexuais Uganda, que debullou que a entidade -clausurada no país africano en 2022- recibiu consultas masivas de persoas preocupadas pola norma. Bruxelas abre expediente a Hungría e Polonia polas súas leis antiLGTBI O presidente chegou a catalogar como “desviadas” as persoas da comunidade LGBT, e malia que reiterou en distintas ocasións que non consideraba a nova lei unha prioridade e que prefería consolidar as boas relacións con doadores e investidores dos países occidentais, defendeu que estes Estados “deberían deixar de perder o tempo da humanidade tratando de impor as súas prácticas a outras persoas”. Esta última afirmación, a de que o fomento da homosexualidade provén de países occidentais, tamén está a espallarse como unha teoría da conspiración en Uganda nos últimos anos. Reaccións internacionais Volker Türk, Alto comisionado da ONU para os Dereitos Humanos, reclamou a Museveni que non promulgue a mudanza legal, e fixo fincapé en que suporía dar “carta branca” a “violacións sistemáticas” dos dereitos humanos, incrementando á vez o odio social. Após lembrar que a norma viola a Constitución ugandesa e as “obrigas legais internacionais” do territorio, subliñou que non é un debate sobre valores, senón sobre “promover a violencia e a discriminación contra persoas só por ser quen son e por quen aman”, amais de advertir que constituirá unha “distracción masiva” no combate contra a violencia sexual. Dereitos LGTBI, dereitos humanos Pola súa parte, a voceira de Asuntos Exteriores e Política de Seguridade da Unión Europea, Nabila Massrali, trasladou a preocupación do bloque comunitario, e aseverou que colaborarán coas autoridades e a sociedade civil de Uganda para garantir o respecto á orientación sexual da poboación. Nese sentido, John Kirby, voceiro do Consello de Seguridade Nacional dos Estados Unidos, condenou a aprobación da lei por parte do Parlamento e adiantou “posíbeis repercusións, quizais económicas”, contra o país africano, namentres Karine Jean-Pierre, portavoz da Casa Branca, definiuna como “unha das leis anti LGBT máis extremas” e unha violación dos dereitos humanos. Os evanxélicos dos EUA impulsan a homofobia en África Malia as críticas estadounidenses á lei de Uganda, son precisamente evanxélicos deste país os principais colaboradores no “florecemento da homofobia en África”, corroborou Foreign Policy. De feito, Scott Lively, líder dunha organización fundamentalista cristiá branca en California, foi o que levou a Uganda a proposta de pena de morte por “homosexualidade agravada” tras encabezar no país unha serie de eventos anti LGBT na primeira década do 2000. Polo menos cinco persoas son asasinadas nun club LGBT en Colorado As igrexas evanxélicas lanzáronse a predicar polo continente fomentando a narrativa ex-gai, na que difunden casos de persoas que supostamente mudaron a súa orientación sexual e vinculan a homosexualidade coa pederastia “para lexitimar a resposta e a represión dos Gobernos e institucións”, apunta o medio. Basicamente “é unha exportación dun movemento e ideoloxía feitos nos Estados Unidos que están a polarizar os países africanos, prexudicando e pondo en perigo as persoas LGBT”. Tamén introduciron a idea de que a homosexualidade é un invento occidental, como o propio Lively proclamou no Parlamento de Uganda, o que permite aos evanxélicos presentarse como a resistencia neses países e aos homófobos africanos xustificar a súa homofobia cun verniz anticolonial.