Paulo Rodríguez, de Dinahosting: "Falar o idioma do cliente sempre formou parte da nosa filosofía"

—Que produtos e servizos oferta Dinahosting? O núcleo do noso negocio consiste en ofrecer aloxamento web, servizo de correo electrónico, rexistro de dominios e xestión de servidores VPS, Dedicados e Cloud. Ademais da asesoría xurídica especializada en asuntos de Internet, ou a consultaría técnica, para realizar auditorías de seguridade e outras intervencións a medida. En esencia, proporcionamos toda a infraestrutura precisa para que as web e as aplicacións dos nosos clientes funcionen co mellor rendemento e sexan seguras. —Como foi o nacemento do proxecto? Dinahosting naceu en Compostela en 2001, da man de dous emprendedores que montaron unha startup que ofrecía servizos de creación de páxinas web. Naquela fase incipiente da Internet no noso país había moi poucas webs, mais despois medraron rapidamente. Neste contexto de expansión inicial, foi posíbel que a parcela dedicada ao hosting se fixese autónoma e tivese dinámica de crecemento propia. Isto é relevante porque xerou a necesidade de empresas que prestasen un servizo desde a proximidade e comprensión da realidade da clientela, que falase un idioma onde esta se sinta cómoda. É importante non perdermos de vista que a maioría das empresas tiñan sede nos Estados Unidos de América e atendían apenas en inglés. Desde entón esas foron as chaves da nosa orientación de negocio: proximidade, compromiso de calidade e aposta polo capital propio, o humano e o tecnolóxico. —Pasaron de dez a máis de 100 traballadoras e traballadores. A principios de 2000 éramos apenas 10 empregados, manexábamos cinco ou seis extensións de dominio e ofrecíamos dous paquetes de hosting. Hoxe, contamos con 120 traballadores, máis de 400 extensións de dominio, multitude de plans de aloxamento e moitos outros servizos relacionados. Son xa 21 anos sendo a primeira compañía independente do sector no Estado que non está participada por ningunha transnacional ou capital de risco. O noso accionariado segue sendo 100% galego. —Como estruturan o persoal? As áreas nas que se articula o cadro de persoal son Atención ao Cliente, Desenvolvemento, Sistemas e Redes, Comunicación e Márketing, Comercial, Facturación, Administración e Recursos Humanos. Atención ao Cliente e posvenda conforman ao redor do 50% do cadro de persoal. Permítame subliñar este dato, en canto a que é indicativo do peso específico que esta parcela ten no noso negocio. —Que perspectivas de evolución ten Dinahosting? A evolución nestas dúas décadas foi sempre en positivo, e as necesidades actuais de dixitalización dinnos que a tendencia vai seguir nesa liña. Pouco a pouco, os negocios tradicionais van percibindo que o online pode traer vantaxes directas e mesmo oportunidades novas, e aí é onde entramos nós para prestar axuda e acompañalos. "O principal reto destes anos atrás foi seguir sendo competitivos nun sector cada vez máis concentrado en grandes grupos estranxeiros" —Cales son os principais obstáculos que tiveron que superar? Pois seguramente o principal reto destes anos atrás foi seguir sendo competitivos nun sector cada vez máis concentrado en grandes grupos estranxeiros con todo o vento a favor para se presentaren aquí cunha política comercial moi agresiva en canto a prezos. Dinahosting é un dous poucos axentes relevantes en xogo neste negocio que se mantén á marxe de capital externo. Contamos exclusivamente con capital propio, e xeramos practicamente o 100% dos nosos postos de traballo aquí, na Galiza. Certo é que cada vez hai unha maior consciencia acerca do importante que é apostar por unha provedora de aquí á hora de contratar calquera tipo de servizo. É aí cando se valora levantar o teléfono e que te atendan no teu idioma, por suposto, mais que tamén entendan a túa lóxica de negocio, ou ter copias de seguranza e alguén que che axude a recuperalas en tempo récord. —É a Galiza un país punteiro nas novas tecnoloxías? Está claro que hai experiencias moi destacadas, tanto no ámbito da investigación universitaria como no campo empresarial, aínda que isto non nos debería facer caer na autocompracencia, porque carencias, hainas, e moito que facer aínda, tamén. Mais se falamos de capacidade o potencial está fora de toda dúbida. Porei algúns exemplos que poden soar típicos mais que non son tan obvios, no sentido que gustaría salientar: Inditex, Estrella Galicia e no seu momento R son casos de éxito que non serían posíbeis se non houbese na Galiza, ademais de visión de proxecto, unhas condicións obxectivas para desenvolver e implementar tecnoloxía propia. Se empresas coma estas naceron e medraron aquí é porque, como mínimo, hai capital humano e tecnolóxico válido. No sector das tecnoloxías da información e a comunicación (TIC) hai exemplos de empresas innovadoras no seu campo, sen esquecer iniciativas, como a Cidade das TIC na Coruña ou o Gaiás en Compostela, ao redor das que paira un ecosistema con ideas moi interesantes. Mais, quero insistir, que iso non nos faga esquecer as carencias e -como dicimos no sector- os "to do" [por facer]. —Como valoran a evolución da rede de internet galega? Hai unha falta evidente de infraestrutura aínda. Segundo datos proporcionados polo Estado, falamos dun 30% do territorio que neste momento non ten acceso a unha boa cobertura de Internet, e en certas coordenadas mesmo en regresión. O feito de non dispoñer dunhas condicións óptimas de conectividade, especialmente nos núcleos rurais, impide que se poidan levar a cabo proxectos de emprendemento, que a xente poida teletraballar, ou simplemente ter condicións de vida homologábeis ao urbano. Hai moito que mellorar neste sentido, para poder facer viábeis todas as oportunidades que nos brindaría o rural. —E a evolución das persoas usuarias no dominio das novas tecnoloxías? Dentro dos nosos clientes atopámonos con diferentes perfís. O nivel de alfabetización dixital é total para aqueles que están completamente enfocados no online e para os que Internet supón a súa única fonte de ingresos. Se falamos dos negocios que utilizan o dixital como un complemento ou apoio simple á súa tenda física, o ritmo de adaptación é loxicamente máis progresivo, pero está aí. A experiencia vivida nos últimos dous anos a raíz da pandemia indícanos que hai unha vontade de mellora en todo o tecido. Por exemplo, a un restaurante pode chegarlle con ter dispoñíbel unha carta dixital, mais tamén pode facilmente introducir un formulario de contacto, e de aí pasar a un xestor de reservas. Cada negocio é diferente e ten as súas propias necesidades e o online revelouse como un compañeiro imprescindíbel para os negocios presenciais. —Que papel deben desenvolver as administracións para facilitar que medre o sector? O noso sector cumpre unha posición central sobre a que pivota toda a economía dun país, por tanto non é posíbel concretar un modelo social e económico que non teña en conta a dixitalización e o desenvolvemento tecnolóxico para que esta se produza. Quizais o papel das administracións sería precisamente o de servir de punto de encontro de todos os ámbitos da sociedade e dos sectores económicos para clarificar cara onde debemos ir e como. Hai múltiples iniciativas neste sentido, mais creo que podemos concordar en que acostuman ser ou parciais ou desagregadas e que o reto é dar cunha unha visión global máis de fondo e a medio e longo termo. Poría como exemplo os fondos Next Generation. Hai unhas importantes sumas de diñeiro que virtualmente estarían dispoñíbeis para investir nun prazo relativamente curto, mais o que nos encontramos é indefinición e, mesmo por veces, falta de entendemento entre as diferentes administracións. —Que significa a lingua galega para Dinahosting? Como empresa galega, en Dinahosting o galego estivo presente sempre. E como reflexo da sociedade galega, é o idioma de uso diario de gran parte da nosa equipa. Falar o idioma do cliente sempre formou parte da nosa filosofía, porque entendemos que non é posíbel darlle unha atención de calidade á clientela se non é no idioma que fala. Para nós é un selo de distinción, que nos axuda a posicionarnos e nos achega valor. Nun sector no que predomina o inglés, somos pioneiros en ofrecer versións multidioma na nosa web e en dar soporte técnico en todos os idiomas da península: galego, castelán, catalán, euskera, portugués e tamén inglés. —Teñen relacións de colaboración con outras empresas galegas? Colaboramos de forma directa co tecido empresarial local a través de asociacións empresariais e colexios profesionais, ademais de coa universidade e con centros de ensino dos que sairán os nosos clientes futuros. Temos compañeiros de viaxe de hai moitos anos. Ademais de proporcionarlles servizos a un menor custo, impartimos formacións e obradoiros sobre dixitalización. Pomos o acento en axudar as empresas que teñen dúbidas sobre os pasos que teñen que dar para crear unha páxina web. "A Galiza ten unha posición xeográfica realmente única que se sitúa entre a lusofonía e a hispanofonía" —Cales consideran as principais potencialidades da economía galega? Pois, para comezar, e ao fío da nosa propia natureza empresarial, sen dúbida o seu capital humano: as súas facultades e os seus centros de Formación Profesional, dos que sae anualmente un volume importante de persoas preparadas, con ilusións e boas ideas. Por outra parte, a Galiza posúe unha posición xeográfica realmente única que se sitúa entre a lusofonía e a hispanofonía, o que potencialmente nos permitiría proxectarnos neses dous espazos lingüísticos de alcance internacional cunha total comodidade. "Habería que ir dando os pasos certos, volvendo ás posibilidades do Eixo Atlántico aínda non maduradas" Esta é unha posición de privilexio e de gran vantaxe competitiva para desenvolvermos a nosa economía. Loxicamente todo ten o seu proceso natural e habería que ir dando os pasos certos, volvendo ás posibilidades do Eixo Atlántico aínda non suficientemente maduradas e, a partir de aí, seguir medrando. —Que rol desenvolven internet e as novas tecnoloxías na posición da Galiza no mundo? Deberíamos falar de "Tecnoloxías da Información e da Comunicación", e feita está puntualización, fica á vista a importancia que estas teñen para o desenvolvemento da nosa sociedade. Así como non podemos deixar de ler, falar e ouvir, sen TIC unha sociedade non podería estar no mundo. —Teñen confianza dunha boa evolución desta posición da Galiza? Son tempos incertos, mais tamén temos que ter confianza no camiño andado e na capacidade para enfrontar os retos. Por descontado, en Dinahosting a nosa forma de entender o negocio é: uns alicerces sólidos, un esforzo na actualización tecnolóxica e máxima atención e rigor no día a día nos fluxos de traballo e na atención á clientela. Sobre esa base sempre é máis doado poder atender da mellor maneira posíbel todo o que veña. Quizais poida ser a nosa achega: tentar ollar cara ao futuro cos deberes feitos.