A Xunta licitará un contrato para que 40 concellos dispoñan de caixeiro, mentres as entidades bancarias pechan sucursais
Facenda asina un acordo coa Fegamp para dotar corenta municipios de caixeiro automático a través dun concurso público no que o Goberno asumirá "maioritariamente" os custos. Nos últimos dez anos as entidades bancarias fecharon na Galiza 936 oficinas.
Na Galiza corenta concellos, 13% do total, carecen dunha entidade de crédito. A meirande dos municipios afectados, nos que viven arredor de 52.000 galegas e galegos, pertencen ás comarcas interiores. Entre 2008 e 2018 en Galiza botaron o feche 936 oficinas bancarias, 37% do total das existentes.
As recentes políticas das entidades financeiras deixaron aos corenta concellos sen ningunha oficina para atender á veciñanza. A maiores, 81 municipios contan cunha única entidade. A solución proposta pola Consellaría de Facenda, que vén de asinar un protocolo coa Federación Galega de Municipios e Provincias (Fegamp), consiste nun concurso público para a instalación dun caixeiro automático nos municipios que así o soliciten. O Goberno galego comprométese a asumir “de maneira maioritaria” o custo dun servizo que cualifican de “pioneiro”.
Con esta medida a veciñanza poderá efectuar xestións comúns como a retirada e ingreso de cartos, a actualizacións das libretas bancarias ou o pago de recibos nos seus propios municipios. O concurso público incluirá outros servizos que prestará a entidade adxudicataria: un de asistencia financeira á cidadanía e outra de formación no uso da banca electrónica.
A exclusión financeira, ou as dificultades para acceder a servizos e produtos financeiros no mercado xeral é unha das consecuencias do proceso de concentración e centralización de entidades financeiras. Entidades coma o Santander, que anunciou o feche de 136 sucursais na Galiza e o despido de 271 traballadores e traballadoras, que en 2019 obtivo un beneficio atribuído de 3.732 millóns de euros nos nove primeiros meses.