Ser preferidos ou non ser: a pesca ante as eleccións xerais

Comezo a análise cun conto que empeza así: “Un día a nai repróchalle ao seu neno pequeno, tras debuxar unha paisaxe con patos e ovellas, que tiveran maior tamaño os patos que as ovellas. O neno ante este reproche alzou a mirada e díxolle á súa nai: os patos son máis grandes porque son os meus preferidos”. Efectivamente, o que preferimos sempre pode ser máis grande, aínda en contra da teimuda realidade. A pesca non representa en termos de PIB en España gran cousa, claro que tamén é certo que o de medir a importancia das cousas polo PIB deberiamos ir deixándoo xa como algo desfasado, máxime neste contexto de crise climática onde precisamente o medrar no PIB tal como agora se mide non é precisamente o máis axeitado para o planeta, non si? Non podemos ir, pois, a nivel español na pesca, facendo alusión ao noso tamaño, pero si podemos ir polo preferente, porque preferente debería ser manter a soberanía alimentaria en base a unha proteína tan saudable e sostible como o peixe, preferente debería ser manter un sector fundamental en moitas vilas de Galicia, Asturias, Andalucía ou Canarias, por exemplo. En Galicia, onde o sector é estratéxico, xogámonos moito nesa cita electoral porque a política é a ferramenta fundamental para que o sector non vaia esmorecendo pouco a pouco e os galegos e galegas escapen del ante os intensos ‘nubarróns’ grises que albiscan no horizonte. Os programas políticos xa sabemos que teñen varios defectos, por un lado non os le ninguén e por outro teñen bastante pouca credibilidade para a cidadanía, por iso o sector é sempre moi escéptico co que poidan conter ditos documentos. A pesca organizada a nivel do Estado nesa Federación Nacional de Confrarías que preside e dirixe con moi bo tino o mariñán e patrón maior de Burela, Basilio Otero, vén de publicar unha guía para que todos os partidos políticos, independentemente da cor política, se queren facer algo polo sector pesqueiro, acudan a esta guía, que lles dará moitas das claves para facer unha política que impulse o sector e arranxe moitos dos problemas que arrastra e se agravan ano tras ano. Nesta guía fálase de cuestións como evitar a especulación coas cotas de pesca e evitar os monopolios que se poden producir con bens públicos se deixamos que o salvaxe mercado impere ás súas anchas na xestión das cotas de pesca; fálase da equidade no reparto de cotas para que aqueles que menos cotas de pesca teñen e que más dificultades pasan para rendibilizar os seus buques sexan os que maior atención merezan, porque si toda a riqueza do país está subordinada ao interese xeral como mandata a Constitución Española. Galicia é a comunidade onde máis Confrarías se asentan Na guía tamén se lles lembra aos partidos a importancia das Confrarías de Pescadores, onde Galicia destaca como a comunidade autónoma onde máis confrarías se asentan, entidades que desenvolven unha actividade moi pouco recoñecida polos políticos a pesar de ser esenciais sobre todo para vertebrar o sector pesqueiro artesanal e o marisqueo. Fálase tamén de que se debe promover a harmonización dos obxectivos de conservación e de sostibilidade coa actividade pesqueira sostible, que deixen moitos políticos, en definitiva, de deixarse manipular e influír por tanto ‘señorito’ ecoloxista de salón que lle gustaría ver os nosos mares libres de pescadores para satisfacer entre outros a poderosos lobbys que tamén necesitan limpar o mar deses molestos pescadores que en Galicia ademais están por todos os sitios. Reducir o IVE Un portelo único para as xestións da pesca, apostar pola cogobernanza e menos polo despotismo ilustrado de moitos xestores pesqueiros, a redución do IVE do peixe como alimento de primeira necesidade e especialmente saudable para a poboación, promover a integración da muller no sector da pesca, por suposto unha moratoria para a eólica mariña ata que non teñamos claro as súas consecuencias, etc. Son todas medidas que non é necesario que figuren en ningún programa político, o que é necesario é que, quen teña o goberno a partir de xullo do 2023, valore se quere apostar por este sector ou non, se queren en definitiva ternos como preferidos como obriga a Constitución Española no seu artigo 130.1 ou vernos tan pequenos que non merecemos ningunha atención especial. E si, como noutros sectores e aspectos da vida, a política pode ser unha ferramenta moi valiosa, tanto para chantar cravos no cadaleito onde moitos nos queren levar, como para o contrario. Pois iso.