O poder adquisitivo das pensións galegas caeu en 25% desde 2011

Até 772.531 galegas e galegas perciben unha pensión media de 1.022 euros ao mes. Segundo os datos achegados polo Instituto Nacional da Seguridade Social (INSS) do Ministerio de Inclusión, Seguridade Social e Migracións -recollidos por provincias-, o mes pasado recibiron algún tipo de pensión contributiva 304.376 residentes na Coruña, 111.365 residentes en Lugo, 106.930 en Ourense e 247.500 en Pontevedra. A contía media das pensións varía en función da estrutura produtiva dos diferentes territorios galegos e da súa realidade política, económica, social e sindical. Así, as retribucións da poboación na Coruña sitúanse en 1.071 euros ao mes, en 922 euros mensuais no caso de Lugo, mentres que en Ourense están en 886 euros ao mes e en Pontevedra en 1.065. A pensión media galega está 173 euros ao mes por baixo da estatal, situada en 1.195 euros. Neste sentido, só cobran unha contía inferior aos galegos os cidadáns estremeños, cunha percepción mensual de 998 euros. Porén, a pensión dos ourensáns -con 886 euros ao mes- e dos lugueses -con 922 - atópase á cola de todo o Estado español. Á cola do Estado As pensións presentan diferenzas en función do réxime de cotización das súas receptoras e dos seus receptores. Así, as 450.486 persoas adscritas ao Réxime Xeral na Galiza perciben unha contía media de 1.171 euros ao mes, situándose na Coruña en 1.232 euros, en Lugo en 1.148, en Ourense en 987 e en Pontevedra en 1.187. Precisamente, o maior continxente das persoas asociadas a este réxime atópase na área atlántica, con 332.547 persoas. A retribución das e dos pensionistas galegos do Réxime Xeral está 136 euros mensuais por baixo da media do conxunto do Estado. Neste caso, presentan uns rexistros peores a Galiza, Andalucía, Canarias, Estremadura e a Rexión de Murcia. Porén, Ourense volve presentar as cifras máis negativas de todo o Estado español. 52.489 persoas perciben a pensión polo Réxime Especial de Traballadores do Mar. Nesta caso, e por provincias, 25.234 deles residen na da Coruña, 2.670 na de Lugo, 89 na de Ourense e 24.496 na de Pontevedra. Asemade, a contía medía da pensión está en 1.128 euros ao mes para o conxunto da Galiza, situándose en 1.076 euros ao mes para A Coruña, en 1.186 euros ao mes para Lugo, en 1.171 para Ourense e en 1.175 para Pontevedra. As e os pensionistas galegos ligados ao Réxime Especial de Traballadores do Mar reciben unha retribución 92 euros por baixo da media estatal, cifrada en 1.222 euros ao mes. Nesta dirección, as pensións dos galegos e das galegas están só por encima dos andaluces, se ben a contía mínima do Estado percíbese na área da Coruña, con 1.072 euros ao mes. Autónomos As pensións máis baixas do Estado español percíbenas 237.661 galegas e galegos que cotizaron durante a súa vida laboral polo Réxime Especial de Traballadores Autónomos (RETA). Segundo os datos fornecidos polo Instituto Nacional da Seguridade Social (INSS) do Ministerio de Inclusión, Seguridade Social e Migracións, o mes pasado percibían unha contía media para o conxunto da Galiza de 717 euros mensuais. As retribucións máis reducidas recíbenas, por provincias, 53.359 cidadás e cidadáns xubilados polo RETA en Lugo, con 674 euros mensuais. A continuación sitúanse 37.520 residentes en Ourense, cunha pensión media de 688 euros mensuais; seguidos de 86.263 persoas na Coruña, con 737 euros e mensuais e, por último, 60.519 residentes en Pontevedra, con 744 euros mensuais. A contía da pensión dos galegos e galegas adscritos a este réxime está 105 euros mensuais por baixo da media estatal. A diferenza entre a cantidade percibida por un autónomo vasco, cuxa pensión está á cabeza do Estado, e un traballador por conta propia da Galiza é de 263 euros ao mes. A fenda de réximes A fenda entre as pensións dos autónomos e dos asalariados non deixa de medrar. Así, a contía da pensión media percibida polos primeiros para toda Galiza sitúase en 717 euros mensuais, colocándose no caso dos segundos en 1.171 euros mensuais. Neste sentido, a diferenza mensual entre unha retribución e outra é de 454 euros, cando en xullo de 2022 atopábase en 423 euros. As perspectivas de futuro non son mellores para este colectivo. A este respecto, o incremento no período de cálculo das pensións representa unha maior ameaza para o poder adquisitivo dos xubilados do RETA. Nesta orientación, o Grupo de Investigación en Pensións e Protección Social da Universidade de València afirma que “o réxime de autónomos sairía máis prexudicado, cunha baixada de 10,3%, fronte a 8,6% de redución no réxime xeral, debido a que no de autónomos non se integran as lagoas de cotización”. O presidente da Unión Profesional de Traballadores Autónomos (UPTA), Eduardo Abad, sinala a Nós Diario que “coas novas pensións de xubilación as diferenzas fanse aínda máis patentes”. Neste sentido, denuncia que “a fenda nas pensións contributivas continúa agrandándose no noso colectivo, é unha autentica incoherencia do sistema, que crezan o mesmo as pensións contributivas deste e non aumenten en maior medida as pensións máis baixas, polo menos até 10%, para pór fin a unha situación de marxinación". Os pensionistas máis empobrecidos do Estado son galegos A poboación pensionista da Galiza é un colectivo moi vulnerábel. Segundo se recolle no último informe da Rede europea contra a pobreza (EAPN), 196.416 pensionistas galegos atópanse en situación de pobreza severa, percibindo 4.949 pensións de incapacidade permanente, 75.348 de xubilación, 15.711 de orfandade e 13.345 de viuvez. Neste sentido, 39,2% do total dos viúvos e viúvas, 15,9% do total dos xubilados e xubiladas, sitúanse nun estado de pobreza severa, considerándose incluídas nesta categoría aquelas pensións por baixo de 458 euros mensuais en 14 pagas. A Galiza rexistra a máis alta porcentaxe do Estado español de pensionistas en situación de pobreza severa. Mentres na media estatal o 16,10% do total dos pensionistas atópanse en pobreza severa, no país a cifra chega a 22,10%, marcando diferenzas de máis de 10 puntos con Castela-A Mancha, de 8,30 puntos con Euskadi, de 8,20 puntos con Nafarroa ou de 8,80 puntos con Madrid. A este respecto, destaca a perda de poder adquisitivo das pensións galegas na última década, cunha caída na contía das mesmas de arredor de 25% desde 2011. Aliás, 52,8% de todas as pensións que se perciben na Galiza están por debaixo do limiar de pobreza. Así, o relatorio de EAPN-Galiza significa que este dato “converte Galiza na comunidade autónoma do Estado español con maior porcentaxe de pensións por debaixo do limiar de pobreza”. Na mesma dirección, destaca que “se se consideran só as 185.481 pensións de viuvez (case todas de mulleres) o 67,8% atópanse por debaixo do limiar de pobreza relativa”