O Ministerio de Traballo relega o sindicalismo galego da cimeira da UE en Compostela

Compostela acolle esta quinta feira e esta sexta feira un cumio da Unión Europea (UE) sobre emprego, no que se discute sobre temáticas laborais como o diálogo social ou as transicións dixital e verde. Esta reunión, que decorre no Hostal dos Reis Católicos baixo o nome 'O futuro do traballo e o diálogo social', contará coa vicepresidenta segunda do Goberno español e ministra de Traballo, Yolanda Díaz, así como con ministros dalgúns Estados da UE, ademais de líderes sindicais e representantes de patronais a nivel comunitario e estatal. Entre as centrais sindicais convidadas a esta xuntanza non se atopaba a CIG, que convocou en consecuencia unha protesta para esta quinta feira na praza compostelá do Obradoiro. Posteriormente, o secretario xeral da CIG, Paulo Carril, foi incluído entre os participantes da reunión de alto nivel que tivo lugar esta quinta feira, e finalmente, foi desconvocado. “Equilibrio” orzamentario, a receita do Ecofin en Compostela Apenas tres horas antes do comezo da xuntanza, Carril, segundo sinalou a Nós Diario, recibiu unha chamada do secretario de Estado de Traballo e Economía Social, Joaquín Pérez, na que lle comunicou que quedaba sen efecto a súa convocatoria por presións da Confederación Europea de Sindicatos (CES), á que pertencen CCOO e UXT. Consultadas por Nós Diario, fontes do Ministerio de Traballo aseguraron que intentaron "até o último momento que estivese a CIG representada como sindicato maioritario da Galiza", mais o CES "trasladounos que non forma parte do diálogo social na UE e non tiña encaixe na reunión". Comunicacións por escrito Cando a CIG tivo coñecemento do cumio e do "veto á súa participación" convocou a mobilización que tivo lugar esta quinta feira. Non obstante, segundo acreditan as comunicacións por escrito ás que tivo acceso Nós Diario, o secretario xeral da central sindical nacionalista recibiu días despois un convite a unha visita á catedral compostelá e a unha cea de benvida no contexto da reunión de alto nivel, unha invitación que foi rexeitada polo sindicato, ao entender ter dereito a participar na cimeira nas mesmas condicións que outras organizacións como CCOO e UXT. A CIG toma a Praza do Obradoiro nunha concentración con motivo do evento sobre o futuro do traballo Posteriormente, a pasada terza feira, a CIG recibiu unha chamada telefónica por parte do secretario de Estado na que foi convocada a participar no cumio en igualdade de condicións, feito que se corrobora cunha posterior comunicación por escrito sobre o programa da reunión tripartita (Administracións, sindicatos e patronais) que tivo lugar esta quinta feira, no que Carril ficou incluído como participante. O secretario xeral da CIG, despois da chamada na que se lle desconvocaba da reunión, denunciou “que o Ministerio acepte o que lle digan a CES, UXT e CCOO”. Segundo explicou o secretario de Estado, sinalou Carril, "a CES entende que a CIG non forma parte desta confederación e que sendo unha reunión da que esta organización participa, non pode estar ao mesmo tempo o noso sindicato". Carril si acudirá hoxe a unha reunión co comisario europeo de Emprego e Dereitos Sociais, Nicolas Schmit, mais desta vez convidado pola Representación da Comisión Europea no Estado español. O líder da central sindical cualificou como "grave" o feito de que a CIG sexa recibida por Schmit ao tempo que fica relegada do cumio por parte do Ministerio español de Traballo que lidera Yolanda Díaz. Ademais, afeou que "a CES, que ao fin, é unha rexional dunha confederación internacional de sindicatos, vete a presenza doutra central sindical”. A este respecto, incidiu en que “o máis clamoroso é que UXT e CCOO participen disto calando a boca”. Díaz comprométese "a seguir subindo os salarios" A ministra española de Traballo, Yolanda Díaz, compareceu antes da reunión de alto nivel, xunto ao comisario europeo Nicolas Schmit. Díaz comprometeu que o Estado español "vai seguir subindo o salario mínimo e os salarios", o que defendeu como "a mellor ferramenta de loita contra a pobreza laboral". O salario medio na Galiza é 25,3% inferior ao do conxunto da Unión Europea A ministra de Traballo opinou que hai dous modelos de saída das crises, o que ocorreu coa crise financeira de 2008 cunha austeridade que produciu "enorme dor e sufrimento", fronte ao que acaba de pasar coa pandemia da Covid cunha protección "sen precedentes". "Esta é a Europa que queremos", co diálogo social como "mellor ferramenta" para "transformar a vida das xentes", sentenciou Díaz. Cuestionada polas vacantes laborais, aínda que admitiu que hai profesións nas que a demanda de man de obra é coñecida, argumentou que este "non é o problema que ten o mercado de traballo", senón a "realización de millóns de horas extraordinarias que son absolutamente excesivas e sen remunerar". Paralelamente, Díaz fixo mención a que o paro estrutural atópase no Estado español "moi por baixo" da media da serie histórica, posto que coa dereita alcanzou 27%, mais recoñeceu que queda "moito camiño por percorrer" nun contexto no que hai que ser "moi prudente". Mobilización en Compostela por "unha Europa dos pobos e con xustiza social" Centos de delegados e delegadas da CIG mobilizáronse esta quinta feira polas rúas da zona vella compostelá para rematar cunha concentración diante do Hostal dos Reis Católicos, na praza do Obradoiro, onde ten lugar o evento ministerial da Unión Europea (UE) sobre “O futuro do traballo e do diálogo social”. Unha mobilización, a da CIG, para reclamar unha “Europa dos pobos e con xustiza social”. O secretario xeral da CIG, Paulo Carril, explicou que esta protesta realizouse para "reclamar á UE que abandone as políticas monetaristas, de austeridade, que construíron un mundo de precariedade enorme e que se manifesta nas sucesivas reformas laborais dos últimos anos e que seguen en vigor". Carril lamentou que "Europa segue sendo do capital", onde o libre mercado "prevalece" e os dereitos sociais "son negados", de modo que a política social está subordinada a un "terceiro ou cuarto plano". "En favor da libre circulación do capital non se respectan os dereitos laborais", censurou, para despois afirmar que o "piar social europeo non existe", cunha UE que "non asumiu a Carta Social Europea". Ao respecto, exemplificou, "en Europa segue sen recoñecerse o dereito a folga nunha regulación comunitaria". Reprobou que a UE "nega realidades que existen de nacións e pobos", como o dereito á autodeterminación. Ademais, Paulo Carril referiuse a que na reunión ministerial informal de Economía da UE da pasada semana, tamén en Compostela, "o que fixeron foi máis do mesmo, máis consignas de austeridade e máis suba de tipos de xuro para estender a pobreza".