A industria galega ofrece 30% postos de traballo menos que a media estatal

Santiago de Compostela acolleu onte a presentación do Informe de Conxuntura Socioeconómica correspondente ao ano 2023, que constata unha redución tanto na produtividade da industria galega como no gasto en consumo final que realizan as familias da Galiza. Aínda que todo semella indicar que, ao feche de 2022, a economía galega recuperou o nivel de actividade previo á pandemia da Covid-19, os expertos da "plataforma de transferencia de coñecemento en materia económica" alertan da evolución da industria, un sector que "preocupa moito", posto que reduciu a súa produtividade. O estudo económico resalta negativamente a contracción da industria manufactureira galega, "fronte ao seu dinamismo no Estado español". "Un dos principais problemas da economía da Galiza é a baixa produtividade da industria manufactureira", sinalan os expertos. No último ano esta produtividade situouse en 69,2% da media española en termos de postos de traballo equivalente a tempo completo, e en 72,7% en termos de horas traballadas. Isto é, 30,8% e 27,3% menos que a media estatal, respectivamente. Desta maneira, e comparando a estrutura produtiva galega actual coa existente en 2008 e a orixinada pola pandemia da Covid-19, o informe do Foro Económico resalta que o sector da construción e a industria manufactureira presentan un importante descenso do seu peso relativo en cada un dos catro anos que considera o estudo do Foro. Dunha banda, a industria manufactureira galega representaba en 2022 11,9%, cando no ano 2008 supuña 13,8% e 12,7% en 2019. Doutra banda, o descenso máis acusado rexistrouse no sector da construción, que se ben concentraba o 11,7% do valor engadido bruto galego en 2008, no último ano supuña só 6,1%. Os datos feitos públicos onte en Santiago de Compostela constatan, desta maneira, a crise que padece a industria galega desde hai anos. A industria galega recupérase a un ritmo catro puntos inferior á media estatal As familias galegas gastan menos No que respecta á demanda interna, o cadro macroeconómico da Galiza reflicte que o gasto en consumo final encadeou, en 2022, dous trimestres consecutivos con taxas de variación anual negativas. O Foro percibe unha caída do consumo ou gasto das familias galegas no segundo semestre de 2022, despois de ser "moi importante na primeira parte do ano" e sendo esta caída moito máis acusada que a medida no Estado español. Concretamente, o gasto en consumo final contraeuse en 2022 1,4% respecto do ano anterior (baixando 2,1% no terceiro trimestre). Tamén ve "sobresaínte" o "forte" descenso do gasto público, que fora "unha panca nos momentos de crise e da pandemia". O informe sinala que a contracción do gasto das Administracións públicas foi significativamente máis intensa na Galiza (-3,6% fronte a -0,7% en España). O sector servizos supón 70% da actividade económica de Ferrolterra Dinamismo no sector servizos Pola contra, o subsector de comercio, transporte e hostalaría, após ser un dos sectores máis afectados polo impacto inicial da crise sanitaria e das medidas de restrición de mobilidade, concentra en 2022 24,9% do valor engadido bruto galego. Esta porcentaxe é significativamente superior á rexistrada tanto en 2008 como en 2019, que acollían 22,3% e 22,7%, respectivamente. É máis, desde o punto de vista sectorial, o informe sinala que, tanto no cuarto trimestre de 2022 como no conxunto do ano, tan só o sector primario presenta un mellor comportamento que no conxunto do Estado, manténdose un ano máis o sector servizos como o de "maior dinamismo", impulsado polo comportamento das actividades do comercio, do transporte e da hostalaría. O subsector de comercio, transporte e hostalaría presenta na Galiza unha taxa de variación interanual de 10,1%, case tres puntos máis que a media do Estado español, e unha taxa de crecemento de 17,4%, un punto máis que na economía española. O sector industrial galego perdeu 47.500 empregos nos últimos 15 anos Análise da macroeconomía O documento elaborado polo Foro económico da Galiza ten como obxectivo "subministrar aos axentes sociais, económicos e políticos a información básica e estratéxica que permita definir a situación actual da economía da Galiza". O informe tamén pretende "facilitar a avaliación continua" das magnitudes máis salientábeis do país, e analizar "avances e melloras", e "atrancos e retrocesos" na dinámica macroeconómica. Na presentación das conclusións desta análise económica participaron o director do Foro, Santiago Lago, e o catedrático e ex presidente da Xunta da Galiza Fernando González Laxe, que participaron na redacción do documento xunto con José Francisco Armesto e Patricio Sánchez. Cae a produción de conservas en 2022 A produción de conservas e semiconservas de peixe e marisco situouse nas 305.403 toneladas en 2022, o que supón un descenso de 7,6% en comparación co ano anterior, a pesar de que o seu valor subiu 5,7%, até 1.745 millóns de euros, pola suba do IPC. Así o sinalou onte o secretario xeral de Anfaco-Cecopesca, Roberto Alonso, durante un almorzo informativo levado a cabo en Vigo para realizar unha valoración dos resultados do sector da industria transformadora e conserveira de produtos da pesca e a acuicultura durante o exercicio pasado. Alonso explicou que este descenso na produción explícase pola baixada da demanda destes produtos, o cal motivou que as empresas reducisen o seu ritmo de traballo. Así, solicitou accións para reactivar a demanda, como unha redución do IVE ou o atraso da entrada en vigor do imposto aos envases de plástico non reutilizábeis. A cadea mar-industria alerta dunha caída de 20% no consumo de peixe