O índice galego de prezos industriais aumenta 9,4% ao excluír a caída no sector da enerxía

O índice de prezos industriais da Galiza caeu por primeira vez en dous anos na súa taxa interanual, é dicir, en comparación co mesmo mes do ano anterior, ao marcar unha evolución negativa de 1,3%. Porén, este dato foi influenciado pola ampla baixada dos prezos dos bens enerxéticos, que se moderaron en 20,6%. Tanto é así que, excluíndo a enerxía, todos os tipos de bens industriais experimentaron unha suba de custo. Fernando Blanco, ex conselleiro de Industria: "O actual modelo eólico da Xunta non beneficia Galiza" Desta forma, o índice de prezos do total da industria sen a enerxía na Galiza subiu 9,4%. Neste sentido, unha das principais consecuencias da inflación fabril nas empresas é o aumento dos custos das compras, tanto no caso dos bens de equipo (como pode ser a maquinaria necesaria para o proceso produtivo) como no dos bens intermedios (aqueles que son empregados na fabricación dun produto final). Non obstante, non se trata dunha situación que inflúa negativamente tan só nos altos custos de produción para as empresas, senón tamén na perda de competitividade das exportacións. Deste modo, mentres diminúen os prezos enerxéticos, unha produción controlada na súa maioría por firmas de fóra da Galiza, aumenta o custo do resto dos bens industriais, unha situación que pon a proba a competitividade vía prezos das exportacións, que de feito, segundo o último dato dispoñíbel, o de febreiro, reducíronse 9,9% interanual. As persoas usuarias finais, é dicir, a cidadanía galega, tamén se ve afectada polo incremento dos prezos industriais. Malia a tregua que se está a vivir nos últimos meses no caso dos bens enerxéticos, as familias sofren o aumento dos bens de consumo (os produtos finais listos para ser comercializados) da industria, algo que ademais inflúe en que as usuarias e os usuarios sexan máis propensas a escoller comprar produtos de fóra, coa consecuente mingua para o conxunto da economía galega. Os custos da industria da alimentación aumentaron 17,8% en marzo De feito, a maior das subas entre os distintos subsectores deuse na industria da alimentación, cuxos prezos aumentaron en 17,8%. Pola contra, a maior baixada de custo foi no campo do fornecemento de enerxía eléctrica, gas, vapor e aire acondicionado, de 24,2%. Mentres tanto, a fabricación de material e equipamento eléctrico aumentou o seu custo en 11,9%. Por sectores, o prezo dos bens de consumo aumentou en marzo 13,4% en comparanza co mesmo mes do ano 2022, mentres que os bens intermedios incrementáronse 7,9% e os bens equipo fixérono nunha taxa de 3,1%. No caso da evolución mensual, con respecto ao mes de febreiro, os bens de equipo encareceron en 0,4% e os de equipo en 0,1%, mentres que os bens intermedios abaratáronse en 0,3%. A caída mensual do índice galego de prezos industriais, de 3,4%, tamén estivo influenciada pola evolución dos bens enerxéticos, cuxo custo caeu en 10,5%. Prórroga da 'excepción ibérica' até decembro A Comisión Europea aprobou esta terza feira a prórroga modificada da 'excepción ibérica' até final de 2023 solicitada este mes polos Estados español e portugués ao recoñecer que estas economías aínda están a experimentar unha "grave perturbación" debido á crise inflacionista. A 'excepción ibérica' prorrógase até o 31 de decembro Porén, o Executivo comunitario xa advertiu ambos os Estados de que esta medida de emerxencia non poderá estenderse máis aló do 31 de decembro, data na que expira o marco temporal das medidas de apoio pola guerra de Ucraína. A chamada 'excepción ibérica', que expiraba o 31 de maio, é unha medida que Bruxelas aprobou en xuño de 2022 para reducir os custos dos insumos das centrais eléctricas alimentadas con combustíbeis fósiles co fin de reducir os seus custos de produción e, en última instancia, o prezo no mercado almacenista da electricidade en beneficio das persoas usuarias e das empresas destes dous Estados da UE. O mecanismo estabelecía que os produtores de electricidade reciban un pagamento que funciona como unha subvención directa para financiar parte do custo do combustíbel e que se calcula diariamente en función da diferenza de custo entre o prezo de mercado do gas natural e o prezo máximo estabelecido. Entre xuño e decembro de 2022, o prezo máximo fixouse en 40 euros por megawatt hora (MWh), así como que, despois dos seis primeiros meses, aumentaría en 5 euros ao mes. Con todo, a prórroga da medida inclúe unha modificación desta traxectoria de límite de prezos para lograr unha eliminación "progresiva, fluída e predecíbel" en liña cos prezos de mercado do gas previstos para finais de 2023. Deste modo, o prezo máximo fixarase en 56,1 euros por MWh hora para o mes de abril, e incrementará 1,1 euros mensuais até alcanzar 65 euros por MWh no mes de decembro. A vicepresidenta terceira do Goberno do Estado español e ministra para a Transición Ecolóxica e o Reto Demográfico, Teresa Ribera, valorou esta terza feira positivamente o visto e prace definitivo de Bruxelas á prórroga da 'excepción ibérica', xa que, dixo, "fecha o círculo" que permite contar aos usuarios e ás usuarias de electricidade cun "sistema de seguro adicional" fronte á volatilidade de prezos enerxéticos. Redes eléctricas fechadas para os polígonos industriais O Consello de Ministros e Ministras español aprobou esta terza feira o Real Decreto que desenvolve o procedemento e os requisitos para o outorgamento das autorizacións das redes de distribución de enerxía eléctrica fechadas, unha medida destinada aos polígonos industriais que persegue a redución dos seus custos enerxéticos e mellorar a súa competitividade. As axudas para polígonos industriais discriminan os Concellos que non seguen a política fiscal da Xunta Segundo a vicepresidenta terceira do Goberno estatal e ministra para a Transición Ecolóxica e o Reto Demográfico, Teresa Ribera, trátase dunha solución semellante ás comunidades enerxéticas locais. Imposto ao carbono para as importacións Outra medida que pretende mellorar a competitividade da industria, neste caso aprobada no seo da Unión Europea (UE), é a do imposto ao carbono aplicado ás importacións. A Unión Europea porá aranceis á pegada de carbono das importacións Os Estados do bloque comunitario aprobaron esta terza feira a reforma do seu mercado do carbono, aumentando até 62% (antes en 43%) a redución de emisións para 2030 con respecto a 2005. Paralelamente, para evitar que a industria se deslocalice cara aos Estados cunha lexislación ambiental máis laxa, a UE imporá impostos aos produtos importados ao seu territorio pola súa pegada de carbono.