A guerra do Irán cústalle xa 5.000 millóns ao Estado español

O Consello de Ministros extraordinario desenvolvido na xornada de onte aprobou o primeiro paquete de medidas destinado a facer fronte ao impacto da crise económica provocada pola agresión militar dos Estados Unidos e Israel contra Irán. A proposta, que inclúe 80 iniciativas cun custo estimado, segundo o presidente do Executivo do Estado, Pedro Sánchez, de 5.000 millóns de euros, estrutúrase en dous decretos que entran en vigor no día de hoxe após a súa publicación no Boletín Oficial do Estado (BOE). Neste contexto, o mandatario español cualificou o proxecto como "o maior escudo social de Europa". O primeiro dos decretos aprobados onte recolle un bloque de propostas centradas no ámbito enerxético e laboral. Así, estabelece unha rebaixa de 11 puntos porcentuais no imposto sobre o valor engadido (IVE) dos combustíbeis que pasa de 21% a 10%, unha redución dos tributos relativos á electricidade, ampliación do bono social eléctrico, axudas á industria electrointensiva, bonificacións ao coche eléctrico, axudas directas de 20 céntimos por litro de carburante para as e os profesionais do sector do transporte, da pesca e do agro e a gandaría e a obriga para as empresas e administracións de elaborar plans de mobilidade. O combustíbel para o sector pesqueiro subiu até 40% desde a agresión ao Irán A proposta gobernamental volve recuperar unha medida xa aplicada en 2022, após o inicio da guerra no leste de Europa, que fixa a prohibición de despedir en empresas que reciban axudas asociadas ao decreto, impedindo que aquelas compañías beneficiadas polas alternativas incluídas na proposta poidan prescindir do seu persoal. Porén, Sánchez asegurou que "o noso país está mellor preparado que en crises anteriores. O forte crecemento económico, o rigor fiscal e a nosa aposta por un modelo enerxético diferente fan que hoxe España estea mellor preparada para facer fronte a este shock". Neste punto, insistiu en que "sairemos máis fortes". O segundo dos decretos acordado onte, tras unha longa disputa previa ao Consello de Ministros entre Sumar e PSOE, que rexeitaba apoiar o documento argumentando que non contaba cos apoios parlamentarios para ser ratificado, inclúe alternativas no ámbito da vivenda. Concretamente, incorpora a conxelación dos alugueres con duración até 2027, obrigando o propietario do inmóbel a renovar o aluguer a un inquilino nas mesmas condicións da actualidade e estabelece que os contratos de arrendamento non poderán incrementarse por riba de 2%, independentemente da alza do Índice de Prezos ao Consumo (IPC), a variábel seguida para a actualización dos alugueres. A agresión militar contra o Irán encarecerá o prezo da hipoteca media na Galiza en máis de 422 euros este ano O paquete de medidas do Goberno do Estado non inclúe alternativas para as persoas que están a pagar unha hipoteca, cuxo custo se incrementará como consecuencia da alza do Euribor, o tipo de xuro medio empregado no mercado interbancario comunitario e utilizado como referencia oficial para calcular os intereses das hipotecas e doutros produtos financeiros, que marcou desde o comezo do conflito bélico en Oriente Medio o seu incremento máis elevado en dúas décadas. Na mesma dirección, non se recolle ningunha medida para impedir os desafiuzamentos, cuestión considerada central pola parte maioritaria das forzas nacionalistas e progresistas no Congreso español. Críticas ao PP Sánchez aproveitou a presentación destas propostas para incidir na liña argumental seguida pola súa formación nas últimas semanas e cargar contra a dereita española. Nesta perspectiva, manifestou que "as guerras custan vidas humanas, e refuxiados, hai xa catro millóns de persoas desprazadas, pero ademais esta guerra vai custar aos españois 5.000 millóns dos nosos impostos. Un diñeiro que poderiamos dedicar a bolsas, a sanidade, a dependencia. Imos dedicar a protexer aos autónomos, ao campo, ás pemes, aos traballadores". Neste punto, referíndose a PP e Vox afirmou que "eses que se poñen de perfil deben explicalo". A vicepresidenta segunda do Goberno do Estado e militante de Sumar, Yolanda Díaz, en liña con Sánchez, criticou a agresión militar dos Estados Unidos e Israel contra Irán, cualificándoa como "a guerra ilegal de Trump", mais quixo marcar un perfil aos seus socios de Executivo afirmando que "conseguimos ampliar o escudo social controlando as marxes empresariais, prorrogando os alugueres e ampliando a protección aos traballadores e ás traballadoras". A este respecto, rematou asegurando que "para isto estamos no Goberno". O Partido Popular, por boca do seu secretario de organización, o ferrolán Miguel Tellado, avanzou que "até non ver os decretos no BOE, até non ler a letra pequena, non faremos unha valoración máis detallada", mais abriuse a apoiar o decreto relativo a políticas enerxéticas e laborais, caracterizándoo como "o decreto de dereitas", por recoller, na súa opinión, moitas das propostas formuladas pola súa formación. Nesta dirección, referíndose a Sánchez ironizou "benvido á fachosfera". Rego exixe ao Goberno estatal aprobar con "urxencia" as medidas presentadas polo BNG para frear as consecuencias da guerra O portavoz do BNG no Congreso dos Deputados, Néstor Rego, indicou que a súa formación non adoptará unha posición definitiva até coñecer o contido íntegro dos dous decretos, pero explicou que "son claramente insuficientes para facer fronte á crise provocada pola guerra imperialista iniciada polos Estados Unidos e Israel no Irán". Neste punto, reclamou "medidas fiscais, como a baixada do IVE á cesta básica de alimentación" e "medidas para topar hipotecas, alugueres e a prohibición de desafiuzamentos". "Atentado contra o pobo" As organizacións sindicais, tamén, consideraron insuficientes as propostas do Goberno do Estado. A este respecto, o secretario xeral da CIG, Paulo Carril, asegurou que "excluír a alimentación e reducir as medidas sobre vivenda á conxelación dos alugueiros é un atentado contra o pobo e as clases populares” e significou que o "antibelicismo defendido por Sánchez "non é críbel se non se traduce nun recorte do gasto en defensa e na saída do Estado español da OTAN". Ao tempo, UXT valorou as medidas do Goberno do Estado pero considerou "insuficiente as propostas en materia de vivenda" e reclamou "máis accións" para os fogares vulnerábeis. Por último, CCOO considerou que "as medidas do Goberno supoñen un paso na boa dirección" mais botou en falla "políticas máis ambiciosas". A CIG reivindica o cese do incremento dos gastos militares: "Que estes cartos se destinen a medidas de protección social" As organizacións de autónomos agardaban máis do paquete de medidas do Executivo do Estado. Mentres ATA demandou máis axudas para os traballadores e traballadoras por conta propia do "campo, da industria e do transporte", UPTA cualificou de "insuficiente a rebaixa do IVE" e urxiu "máis axudas ante o impacto da crise enerxética"