As comunidades enerxéticas terán espazo reservado na rede eléctrica e cota nas poxas

As comunidades enerxéticas disporán de cotas específicas nas poxas do Réxime Económico de Enerxías Renovábeis (REER) e reserva de capacidade nos nós da rede eléctrica obxecto de concurso para garantir a evacuación da súa produción, segundo a proposta do Real Decreto para a súa regulación lanzada esta sexta feira a consulta pública, até o próximo 17 de maio, polo Ministerio para a Transición Ecolóxica e o Reto Demográfico (Miteco). Comunidades enerxéticas, alternativa para rebaixar o prezo da luz até 50% En concreto, este Real Decreto busca regular as dúas figuras xurídicas comprendidas dentro do ámbito das comunidades enerxéticas (as comunidades de enerxías renovábeis e as comunidades cidadás de enerxía). Ambas as dúas figuras asociativas poderán acceder ás poxas coas que se outorga a retribución regulada, nas que serán consideradas as súas particularidades para que poidan competir con outras entidades participantes e nas que se incluirán cotas de potencia específicas para elas. De forma adicional, liberarase 5% da capacidade nos nós da rede eléctrica reservados para convocar concursos de acceso e conexión, que poderá outorgarse por orde de prelación ás novas instalacións de xeración que formen parte dunha comunidade enerxética, ao obxecto de garantir a evacuación da súa produción, informou o Miteco. As comunidades enerxéticas, de acordo coa normativa da Unión Europea (UE), permiten que a cidadanía produza, consuma, almacene, comparta e venda enerxía renovábel colectivamente. Aínda que non se circunscriben só ao eléctrico, xa que poden beneficiarse de fontes térmicas, de solucións de mobilidade ou de eficiencia enerxética, as comunidades están directamente ligadas ao autoconsumo. Participación do concellos As comunidades de enerxías renovábeis e as comunidades cidadás de enerxía poden adquirir distintas formas xurídicas, poden participar en todos os mercados organizados de produción de enerxía eléctrica, e deben estar integradas por un mínimo de cinco asociadas, sen que ningunha supere 51% dos votos, que han de ser persoas físicas, administracións locais ou empresas de pequeno tamaño. Os concellos poden facer parte das comunidades enerxéticas Unha oportunidade que quere aproveitar o Concello de Moaña, onde se está a desenvolver unha comunidade enerxética chamada Moaña Solar. Ao respecto, a alcaldesa deste municipio, Leticia Santos, explica, en conversa con Nós Diario, que desde o Goberno local "quixemos apoiar desde o primeiro momento este proxecto colectivo". A mandataria lembra que "Moaña xa foi pioneira nunha cuestión como as traídas veciñais de auga". As comunidades enerxéticas locais como alternativa Neste sentido, di, "Moaña Solar concorda con este espírito e pode converterse na traída da electricidade, as comunidades enerxéticas máis alá dunha quimera estanse a converter nunha necesidade da que dependen moitas familias para poder seguir tendo a subministración necesaria para as súas vivendas". "Estamos traballando na posibilidade de integrarnos dentro da propia comunidade enerxética, a normativa da UE xa contempla esta posibilidade, mais falta aínda desenvolvemento xurídico nesa materia", explica. "Queremos ser un socio máis e pór a enerxía que sexamos capaces de xerar nos tellados dos edificios públicos a disposición da comunidade enerxética, mais tamén para fornecernos nós e para poder apoiar ás familias en risco de exclusión social e de pobreza enerxética", explica. "É fundamental que se axuste o marco legal estatal, mais tamén o galego, que non está desenvolto, nós xa estamos traballando para formar parte de Moaña Solar e colaborar cedendo espazos para xerar enerxía", conclúe. Fenosa paraliza Tameiga A comunidade de montes de Tameiga, en Mos, reivindica que é unha comunidade enerxética "desde hai 20 anos". Así o defende, xa que "levamos dúas décadas levando leña ás casas da parroquia", explica o coordinador da Comunidade de Montes de Tameiga, Gonzalo Pérez, en conversa con Nós Diario. "Neste caso é enerxía primaria, de biomasa, mais é enerxía", sinala. A comunidade de montes de tameiga denuncia os impedimentos para o autoconsumo Por outra parte, explica Pérez, "hai cinco anos decidimos instalar paneis fotovoltaicos empregando os tellados das naves que recuperamos no polígono industrial". Non obstante, denuncia, "levamos 20 meses agardando polo permiso da distribuidora para poder envorcar a enerxía na rede e tamén para levarlla á veciñanza da parroquia". Autosuficiencia, o remedio fronte ás grandes eléctricas "O Estado español puxo o raposo a coidar o galiñeiro, non pode ser que o sistema de envorcado da enerxía dependa das distribuidoras, neste caso nós estamos loitando con Unión Fenosa Distribución (UFD)", salienta o coordinador da comunidade de montes de Tameiga. "Nós tramitamos correctamente os permisos mais UFD non fai máis que demorar a nosa conexión", di. "Agora mesmo esas instalacións benefician á veciñanza no sentido de que están a producir enerxía que aproveitan as empresas que temos nalgunhas das naves, o centro sociocultural da propia comunidade, así como a maquinaria que empregamos para rachar leña", afirma. "Mais o noso excedente se está perdendo, é un desperdicio", sinala. As comunidades de montes fican sen subvencións pola lei estatal O coordinador da comunidade de montes de Tameiga (Mos), Gonzalo Pérez, explica outro dos problemas que experimenta o seu proxecto enerxético. "Tanto a Administración estatal como a galega non nos recoñecen ás comunidade de montes como posíbeis comunidades enerxéticas porque carecemos de personalidade xurídica, cando xa estamos operando e podemos ser axentes que promovan este tipo de asociacionismo para o consumo cooperativo", relata. Sen subvencións "A posición da comunidade de montes é que non vamos a tramitar un permiso como comunidade enerxética, non ten sentido crear un ente paralelo con personalidade xurídica para poder ter esta catalogación de forma oficial", explica Pérez. "É curioso que o Miteco nos recoñece como comunidade enerxética desde hai tres anos na súa páxina mais non nos considera susceptíbeis de recibir subvencións porque a transposición da normativa introduciu a personalidade xurídica, cando a directiva da UE daba liberdade neste sentido", sinala o coordinador da comunidade de montes. "Obtemos subvencións das deputacións, da Xunta, dos administracións locais ou mesmo do Estado español, polo que non entendemos esta decisión nin as trabas que nos poñen e os argumentos que nos trasladan", conclúe Pérez.