CIG critica que se fale de “recuperación do naval en Vigo” cando en menos de 10 anos se destruíron 8.000 empregos
“Compáranse as actuais contratacións coas de anos anteriores, cando case non existía sector ao atoparse practicamente desfeito”.
As últimas noticias sobre a recuperación do naval de Vigo e de que este sector está a liderar a contratación de novos proxectos, por diante de Euskadi e Asturies, non convencen á CIG, que considera que nelas hai máis “propaganda” que realidade. Así, o sindicato nacionalista indica que o pretendido aumento nas contratacións débese que se compara a cifra actual coa destes anos, “cando case non existía sector” por estar “practicamente desfeito”. A isto engaden que desas 6 contratacións, 2 dependen de Armón Asturies e outra dun estaleiro de Marín. “Trátase de estaleiros pequenos que xa estaban a traballar, polo que o impacto en termos de postos de traballo é nulo”.
Os que levaban “o peso da contratación en termos de buques e postos de traballo continúan no dique seco”: Barreras está á espera da entrega do flotel, “co que quedaría baleiro”; Vulcano leva cinco anos sen contratación, encadeando EREs “e no limite da resistencia”; xa pasaron tres anos dende que Metalships entregou o ultimo buque; e Freire atópase rematando dúas construcións.
A CIG critica que se fale de “recuperación do naval en Vigo” cando en menos de 10 anos se destruíron 8.000 empregos.