A carne e o peixe, xunto a outros 42 produtos, venderanse sen IVE en Portugal

Esta terza feira entrou en vigor a nova medida do Goberno de Portugal contra a escalada da inflación dos alimentos. O Executivo luso aprobou unha exención temporal, entre abril e outubro, do Imposto sobre o Valor Engadido (IVE) para 44 produtos básicos do cesto da compra, nos que se inclúen varios tipos de carne e peixe. O Executivo luso pediu á Autoridade de Concorrência que fiscalice a exención do IVE Porén, esta eliminación do IVE non se fará notar de contado, pois as cadeas de supermercados portuguesas contarán con 15 días desde a entrada en vigor da medida para actualizar os prezos nos estabelecementos de venda ao público. O Executivo luso fixo esta terza feira un chamamento para que a Autoridade da Concorrência fiscalice nese momento o cumprimento da medida nas tendas. Desta maneira, dentro de dúas semanas, alimentos como o pan, a pasta, o arroz, o leite de vaca, os ovos, os iogures, o queixo, o aceite, a manteiga, as fabas, os garavanzos, os chícharos, o tomate, a cebola, a coliflor, a cabaza, o brócoli ou as espinacas deixarán de estar gravados a través do IVE. A principal diferenza con respecto ás medidas tomadas polo Goberno do Estado español nesta materia está na inclusión da carne e do peixe. Así, en Portugal, carnes como a de porco, vaca, polo e pavo, e tamén peixes como o bacallau, as sardiñas e a dourada, entrarán dentro da exención. Os sindicatos agrarios piden control dos prezos Alén das críticas por parte do sector primario que o Goberno español recibiu ao excluír a carne e o peixe da exención do IVE, representantes dos sindicatos agrarios, en conversa con Nós Diario, sinalan que a prioridade para loitar contra a inflación dos alimentos debería ser o control das marxes de beneficio dos supermercados. O coordinador xeral da Federación Rural Galega (Fruga), Manuel Dacal, explica que "o que se ten que facer é intervir e pór topes de prezo ao sector da alimentación, así como garantir que non se discriminen as produtoras e non se aproveite para pagar por baixo dos custos de produción". Manuel Dacal (Federación Rural Galega): "Hai que controlar as marxes de beneficio na cadea alimentaria e pór topes nos prezos dos alimentos". "Hai que controlar as marxes de beneficio na cadea alimentaria e a partir de aí estabelecer límites máximos para os produtos básicos necesarios para ter unha alimentación de calidade", afirma. A Fruga acusa a industria de incumprir a norma nos contratos co sector lácteo "Isto é o que nós pensamos, independentemente de IVE ou non IVE, eu penso que a rebaixa deste imposto é un 'enganabobos', unha cortina de fume coa que se quere facer ver que se baixa o custo dos alimentos cando en realidade non é así", sinala Dacal. A secretaria xeral do Sindicato Labrego Galego (SLG), Isabel Vilalba, explica que "quen deixa de cobrar o IVE é o produtor, que si ten que seguir a pagalo en todas as operacións de compra". Segundo sinala, na tributación directa, "os produtores deixan de cobralo durante todo o ano". Aínda que "é certo que cando fagan a declaración anual vai haber un cálculo do cobrado e do pagado, polo que entendemos que se lles devolverá a diferenza", recoñece. Porén, afirma a representante do sindicato agrario, "teñen unha importante perda de liquidez". Isabel Vilalba (Sindicato Labrego Galego): "Os alimentos son bens de primeira necesidade e non poden estar sometidos á especulación como están". Peor é o caso do sistema de tributación por módulos, xa que segundo sinala, "quen financia a baixada do IVE é o produtor, que deixa de cobralo mentres que ten que seguir pagándoo en todas as súas operacións de investimento sen que lle sexa devolto". O SLG denuncia o recorte de fondos en partidas agrarias "Os alimentos son bens de primeira necesidade e non poden estar sometidos á especulación como están", engade. "Ás Administracións sempre lles treme a man cando hai que facer estudos serios sobre os custos de produción, unha ferramenta que permitiría actuar cando haxa prezos abusivos", di Vilalba. "Cando se fala de fiscalidade temos que ter claro que os impostos son básicos para financiar cantidade de cuestións de interese público e os dereitos básicos das persoas", opina. "Non entendo esa postura tan neoliberal de baixar impostos cando moitas veces vemos que se baixan e que o prezo ao consumidor segue sendo o mesmo, é dicir, que absorben as ganancias as grandes distribuidoras e as grandes empresas", conclúe Vilalba. Pola súa parte, o secretario xeral de Unións Agrarias (UUAA), Roberto García, insiste en conversa con este xornal na necesidade de incluír a carne e o peixe nas exencións do IVE para non estabelecer un agravio no consumo destes alimentos. Roberto García (Unións Agrarias): "A caída que se experimenta no consumo de carne ten moito que ver coa exclusión da rebaixa impositiva". Porén, sinala que a rebaixa de impostos non vale de nada se non hai un control das marxes de beneficio por parte dos supermercados. "A proteína animal é básica no cesto da compra para as rendas máis baixas e sobre ela recae un dobre efecto negativo, o da inflación e o dos impostos, que castigan producións moi sensíbeis na Galiza, como a de vacún e a de polo, que se están vendendo por baixo dos custos de produción", explica. "A caída no consumo de carne ten moito que ver con esta exclusión da rebaixa impositiva", engade. Unións Agrarias reclama "solucións rápidas" para "salvar o futuro" do sector apícola De todos modos, di, "quitar a taxación se non hai un control sobre a distribución, que pode anular a rebaixa con outras subas arbitrarias, xera a aparencia de que a vía do IVE non é unha medida que acabe de domar a inflación, e isto é porque debe ir acompañada do control de prezos". As confrarías solicitan de novo rebaixar o IVE do peixe O presidente da Federación Galega de Confrarías de Pescadores, José Antonio Pérez Sieira, en declaracións a Nós Diario, afirma que os pósitos están a favor de que se aplique unha rebaixa do Imposto sobre o Valor Engadido (IVE) ao peixe. "Levamos anos reclamando isto, non só desde a federación galega, senón todo o colectivo do mar", explica. "A rebaixa serviría para promover o consumo do peixe e para que a fonte de proteínas máis saudábel que hai sexa accesíbel", entende Pérez Sieira. José Antonio Pérez Sieira (Federación Galega de Confrarías de Pescadores): "Reducir o IVE promovería o consumo de peixe". "Seguiremos insistindo" "Non nos dan ningunha explicación sobre a razón de excluír o peixe das diminucións do IVE, estano facendo moi mal, entendemos que a taxación débese rebaixar para aqueles produtos que máis consome a xente, e o peixe e a carne son consumidos no día a día pola maioría das persoas, e hai que favorecer que a cidadanía teña un acceso máis equitativo ao cesto da compra", sinala o presidente da federación. "Imos seguir insistindo, non temos ningunha dúbida ao respecto diso, máis tendo en conta que estamos loitando para que non desapareza o sector da pesca con todos os problemas que temos enriba". "Isto súmase ao fechamento de caladoiros, á instalación da eólica mariña ou ao prezos dos combustíbeis", conclúe.