Caravana polo emprego exixe o mantemento de Cementos Cosmos

Máis de de seis ducias de camións e centos de automóbiles particulares secundaron este sábado a mobilización convocada en solidariedade cos traballadores e traballadoras de Cementos Cosmos, a factoría situada no Oural que prevé aplicar un Expediente de Regulación de Emprego (ERE) e mesmo fechar a industria o vindeiro mes de marzo.

A caravana partiu do Oural e percorreu máis de doce quilómetros entre as localidades de Sarria e Nadela para voltar de novo á factoría aravesando a estrada LU-546. @s traballadores/as, que iniciaron o calendario de mobilizacións o pasado mes de novembro, exixen o mantemento da actividade da factoría pois aseguran teren capacidade e mercado para continuar coa produción, porén denuncian que outra industria --pertencente ao mesmo grupo empresarial situada no Bierzo, está a ser a responsábel da redución nas vendas ao distribuír o cemento no mercado galego.

Aliás, o pasado dia 30 de novembro máis de 2000 persoas participaron nunha manifestación histórica na vila de Sarria na que exixiron o mantemento dos seus postos de traballo e dunha industria cementeira --a única en Galiza-- que serve de dinamizador para a economía da comarca.