Océano-gráfico Seoane

Durante máis de vinte anos Luís Seoane foi editor, por conta propia e allea, exercendo ao tempo de deseñador, nunha estratexia cultural –"El só toda unha fronte cultural galega no exilio bonaerense", como quere Ferrín– que tentaba prestixiar a cultura nosa e ao tempo empatar coa que se estaba a facer na Arxentina. Unha ferinte brincadeira porteña conta: "Fixéronlle un atentado ao Centro Galego, guindáronlle á porta un diccionario!". Seoane devolveulles cento por unha e encheu as librarías de libros galegos e arxentinos, todos cunha fasquía que sobordaba os lindes do libro convencional e aínda dentro deles. Nos primeiros deseños dos anos 1940-42 –as coleccións Hórreo, abaixo, á dereita; e Dorna, de EMECÉ– busca clasicismo e sobriedade con letras didonas ou romanas, sempre cunha pequena viñeta debuxada ou gravada, que anuncia o pintor que aínda non é. Xa coa súa propia editora, Nova, proxecta a colección Mar Dulce –abaixo á esquerda–, que logra grande identidade ao dotar o fondo dun colorista encrucillado de liñas tomado se cadra das costas dos naipes, Seoane sempre cun ollo na cultura popular. Pero non só nas capas, todas as páxinas son unha obra coidada, afastada do "libro concibido industrialmente", como quere Axeitos. A mediados dos 40 xorde Botella al Mar, a editora onde Seoane se sente máis libre, experimentando con cada novo libro: concibe as capas como un todo e estende a ilustración, que agora é pintura e logo debuxo, sempre limitado a dúas tintas que nas súas mans parecen infinitas, tirando partido das superposicións e dos brancos. Desbota as cartelas, e o texto sempre en negro, por xerarquía, vai superposto, en letras romanas ou na mítica Futura. Con Citania ou Edicións Galicia aparece a abstracción xeométrica que aprende dos artistas arxentinos do movemento Arte Concreto-Invención, como sinala en 1953 o seu cartel para Cinzano. Experimentación e liberdade que recolle nos seus Libros de tapas, publicacións valoradas na mítica revista suíza Graphis, que foi o olimpo dos deseñadores de todo o mundo.