As causas do descenso do Deportivo Abanca

Galiza non contará con ningún representante na Primeira División Feminina de fútbol na vindeira campaña, logo de consumarse a crónica dunha morte anunciada do Deportivo Abanca após perder ante o Betis no penúltimo partido ligueiro (3-1).

A tempada pasada o Dépor foi a gran revelación do torneo. Iso espertou o interese doutros equipos, que levaron varias das súas xogadoras estrelas como Tere Abelleira, Maya ou María Méndez.

Lamentabelmente, o club non puido, non soubo ou non quixo cubrir esas baixas con futbolistas á súa altura, apostando por mulleres de perfil baixo, procedentes de ligas estranxeiras de inferior nivel e sen experiencia, defraudando así ao mesmo tempo a confianza de xogadores internacionais que si apostaron por quedarse, como Peke ou Athenea. 

Tamén decepcionou o técnico Manu Sánchez, superado pola negativa dinámica inicial e impotente á hora de reconducir a situación, até o punto de chegar a recoñecer que fixo cousas nas que como adestrador "non" creu "nunca. 

O seu descenso prexudica, ademais, ás súas veciñas da Victoria, escuadra que optaba a ocupar a un posto na Segunda División que tería garantido no caso de que as branquiazuis lograsen a permanencia a costa do Betis. Porén, non puideron pasar do empate ante o filial bético e, polo tanto, xa que non coincidirá co seu segundo equipo na categoría de prata, é o club andaluz o que xogará a vindeira tempada na liga Reto Iberdrola.

Adeus á aventura do Viaxes Amarelle

Unha derrota por un único tanto (1-2) ante Joventut D'Elx condenou ao descenso ao Viaxes Amarelle da Primeira RFEF de Fútbol Sala.

A pesar de que a cousa comezou ben, cun tanto inicial de Anna Escribano no minuto 27, Carol empataba cando faltaban só dous minutos para o final e, lamentabelmente, as xogadoras laranxas non puideron aguantar o ritmo na prórroga, encaixando o segundo e definitivo tanto alacantino no 42.