Uni Ferrol, Ensino, Celta e Maristas loitan en Narón pola Copa Galiza

Narón (Ferrolterra) acolle entre esta sexta feira e este sábado á a XXXVIII Copa Galiza de Baloncesto, o evento deste deporte máis importante no país por reunir os catro equipos que máis destacaron a tempada pasada ou que accederon á final despois de superaren unha clasificación previa. As semifinais, definidas por sorteo, enfrontarán no Pavillón Municipal da Gándara o Durán Maquinaria Ensino co Maristas da Coruña (18.30 horas) primeiro e o Baxi Uni Ferrol co Celta Femxa Zorka (21 horas) despois. As gañadoras xogarán a final o sábado ás 20 horas. Desde a Federación Galega de Baloncesto (FGB), que organiza o evento, a súa vicepresidenta, Susana García, explica a Nós Diario que está moi satisfeita de como se desenvolveu esta iniciativa desde que naceu. É consciente da idea que se ten de que "hai favoritos" entre os equipos participantes, mais destaca que nestes partidos "pode pasar calquera cousa". Sobre o momento do baloncesto feminino no país, García acha que "ten moi boa saúde, malia o tropezón do Celta a tempada pasada [descendendo á segunda categoría]". Ademais, subliña que Galiza tivo "seis xogadoras nas seleccións [internacionais] este verán, sen contar co nivel que temos en adestradoras e adestradores". O Uni Ferrol preséntase á afección nunha nova tempada ilusionante Ensino vs Maristas Esta sexta feira o primeiro choque terá como un dos protagonistas o equipo que adestra Fernando Buendía, Maristas da Coruña, o único dos catro deste trofeo que tivo que vencer nunha eliminatoria previa, derrotando de maneira contundente o Cortegada (92-58) e logo, cun axustado marcador, o Arxil (73-76). O adestrador coruñés recoñece, en declaracións a Nós Diario, que o equipo se atopa "en plena construción", polo que considera, no seu papel de técnico, que para elas será "un adestramento máis”. Cun cadro de nove xogadoras do primeiro equipo e catro do filial, neste partido non poderá contar por lesión con Nuria Ríos nin Raquel Botana. Porén, tamén admite que a nivel de club e de afección poder estar na Copa "é ilusionante", como o mero feito de que "Maristas estea cada vez máis arriba, cando hai uns anos era impensábel superar Cortegada e Arxil". Nesa "ilusión" entra a certeza de poder "participar na festa do baloncesto galego". As coruñesas terán diante o gañador do trofeo na edición pasada, o Durán Maquinaria Ensino. O seu novo técnico, Suso Garrido, aclarou onte en rolda de prensa que o seu equipo tamén "está en construción", polo que a Copa Galiza, para el, "serve de preparación". Por este motivo, adiantou que haberá "cambio de xogadoras" para o partido. Sobre o rival, alertou de que Maristas fixo unha "tempada pasada fantástica" que culminou clasificándose para a Copa Galiza. Entre as súas armas salientou a de "manter un bloque constante nas últimas campañas" e ter esa aspiración de "seguir medrando". Na mesma comparecencia presentouse Nhug Bosch como nova xogadora do conxunto lugués. A catalá recoñeceu que se está "adaptando pouco a pouco" ao sistema de Garrido mais tamén sinalou que é unha persoa que aprende "moi rápido". Esther Castedo, xogadora do Ensino Lugo CB: "A tempada non comezou como queriamos, pero xa estamos atopando o noso xogo" Uni Ferrol vs Celta Na outra semifinal estará o Celta Baloncesto, o equipo máis laureado na Copa. "Era outra época", admite a técnica celeste, Cristina Cantero, a este xornal. Con todo, cre que segue a ser "unha cita sempre rechamante de pretempada como proba para comezar á semana seguinte a liga". A cordobesa indica que o Celta tamén está "en fase de construción" e que lle gustaría "ir máis rápido, mais os tempos son os tempos". Define o cadro de xogadoras que dirixe como "moi novo e hai que ter paciencia para que todo o mundo chegue a conxuntarse". A súa capitá, Sara Vidal, afirma a Nós Diario que para o club “é un trofeo moi importante por ser o que reúne os mellores equipos da Galiza, algo que as espectadoras e os espectadores agradecen”. Non esquece o seu valor como "inicio da tempada", onde se verán equipos "moi novos que buscamos boas sensacións cara a esta tempada". Alén diso, pon o foco en que é un torneo "galego". Sobre o contrincante das celestes a nigranesa afirma que é "o eterno rival, contra o que xogamos moitas veces". Desde o Baxi Uni Ferrol, o seu técnico, Lino López, ten claro, segundo explica a Nós Diario, que esta edición é "especial, por xogarse en Narón, e será unha oportunidade para a nosa afección de que goce do equipo". Deportivamente considera que este trofeo é "un test importante" despois de tres semanas adestrando. "Tivemos algúns problemas coas incorporacións e algunha baixa por compromisos e por lesións", declara. Por este motivo, para o equipo ferrolán "é importante competir", logo de non poder durante a pretempada xogar os suficientes partidos con todas as xogadoras. En relación ao rival desta semifinal, o ferrolán cre que "é duro, traballa moito e ten un obxectivo ambicioso". Máis alá de conseguir a sexta Copa Galiza para o seu equipo, Lino López non quere fixarse no resultado e si en que "temos cinco xogadoras novas con respecto á tempada pasada, e para min o máis importante é medrar como equipo", confesa. Cristina Cantero, adestradora do Celta: "Tivemos máis problemas no eido psicolóxico que no do baloncesto" O Celta, con 12 títulos, lidera o palmarés do trofeo galego A Copa Galiza de baloncesto feminino naceu en 1987, un ano despois de que se crease a competición sénior masculina. Organizada pola Federación Galega de Baloncesto (FGB), na primeira edición gañou o Círculo Mercantil de Ourense, aínda que a proba non se estabilizou até mediados da década de 1990. O equipo feminino máis laureado deste trofeo é o Celta de Vigo, con 12 títulos conseguidos entre 1996 e 1999, entre 2001 e 2003 e mais nos anos 2005, 2007, 2008, 2009 e 2011. Ségueno o Uni Ferrol e o Ensino de Lugo, ambos os dous clubs con cinco copas cada un. No caso do primeiro as vitorias foron nas edicións de 2015, 2016, 2017, 2021 e 2022, e no do segundo, en 2006, 2018, 2019, 2023 e 2024. Con tres títulos está o Cortegada de Vilagarcía de Arousa (O Salnés), que levou a Copa en 2004, 2010 e 2012, así como o Cluny de Compostela e o Narón (Ferrolterra), que gañaron dous, o primeiro nos anos 1988 e 1990 e o segundo en 2013 e 2014. Desde a propia Federación, Susana García, confirma a Nós Diario que a Copa Galiza é a competición "máis importante" do organismo e tamén de todo o país para este deporte. "É moi boa tamén para os equipos por realizarse nunha época en que teñen necesidade de xogar este tipo de partidos oficiais", estima.