O Uni Ferrol comeza en Lisboa un novo soño europeo contra o Benfica

O Universitario de Ferrol volve a Europa tras os enormes éxitos recollidos a tempada pasada. As galegas obtiveron un histórico subcampionato tras a final xogada a dobre partido e perdida ante o Villeneuve-d'Ascq cun global de 162 a 145. Este ano a andaina comeza contra o Benfica, equipo que para Lino López destaca por ser moi físico. As xogadoras do Uni Ferrol veñen dun comezo máxico na competición ligueira. Xogadoras como Gala Mestres comentaran a dificultade deste partido co Valencia Basket no que acabaron levando a vitoria por 71 a 65, cunha excelente actuación de xogadoras como Dalayah Daniels, que remataba o encontro con 17 puntos, 8 rebotes e 2 asistencias. López destacaba a importancia da vitoria, especialmente nas novas xogadoras: "Unha vitoria deste nivel contra un equipo como o Valencia sempre dá esa confianza para seguir traballando e afrontar esta racha de partidos cun pouquiño máis de confianza". O obxectivo para o adestrador galego na competición pasa por desfrutar igual que o fixeron o ano pasado. López sinalaba tamén o enorme desgaste físico que o encontro con Valencia supuxera para o equipo: "Tes que facer moitas cousas e todo ese esforzo é para minimizar a súa cantidade de virtudes", apuntaba. Aínda así, o técnico salientaba a ilusión das xogadoras por participar e competir en Europa: "Moitas veces ese cansazo que che pode provocar tantos partidos e viaxes seguidas, minimizalo coas ganas de competir". Gala Mestres será baixa ante o Benfica Para o adestrador o factor de que moitas das xogadoras nunca competiran na Eurocup, e poidan acusar unha falta de experiencia na mesma, súplese coa ilusión xa antes mencionada de xogar unha competición dese nivel e as ganas de desempregar un bo papel. Lino López dicía que os sinais de identidade deste equipo pasan por traballar en cada posesión e manter un ritmo alto no ámbito defensivo: "Cando acaba o partido creo que marchas coa sensación de que todas intentaron axudar o equipo e dar o seu máximo, que é o importante". A ausencia de Mestres e a carga de partidos É importante destacar que as galegas continuarán competindo coa ausencia da súa capitá, Gala Mestres, que xa non puido estar no partido de debut na liga: "Gala vai seguir entre algodóns e imos ver como podemos afrontar esta semana sen ela", apuntaba López. Non obstante, o técnico quitáballe ferro ao asunto: "Céntrome sobre todo nas que están, as que competiron o outro día, que cheguen nas mellores condicións posíbeis. Ás ausencias pouco lles podes facer". Ademais, á baixa de Mestresa hai que sumar tamén a de Bego de Santiago. Na situación do Uni Ferrol cabe destacar a enorme carga de partidos das xogadoras e no caso desta semana, de viaxes, pois onte partiron cara a Lisboa e despois do partido xa viaxan directamente a Barcelona para o encontro de liga do domingo ante o Girona. Ante isto Lino López dicía que tiñan que estar preparadas para o que vén, á vez que puña en valor o enorme traballo realizado polo club, algo que xa se puido ver no espectacular ambiente vivido no encontro contra Valencia Basket. Benfica, un rival difícil As rivais das galegas foron campioas de liga e copa de Portugal e trátase, segundo López, dun rival moi físico no que cada acción defensiva e de xogo imprime un elevado desgaste. As dirixidas por Eugenio Rodrigues contan con xogadoras que xa tiveron experiencia na competición estatal, como son as bases Joana Soeiro, que xogou no xa desaparecido equipo leonés Bembibre, e Maria Bettencourt, que xogou no lucense Ensino. Estas dúas xogadoras son, a ollos de López, as encargadas de darlle o control de xogo que precisa o equipo portugués. Non obstante, para o técnico o máis importante para o Baxi é pensar nelas, no traballo que o equipo ten que facer e en como deben seguir traballando e crecendo a partir da defensa para ser capaces de pórse ao nivel físico das rivais. As bases Soeiro e Bettencourt son pezas clave para as portuguesas As portuguesas xa coñecen a derrota nesta tempada. O pasado 27 de setembro perderon a Super Cup Women do seu país por 67 a 55 ante o Quinta do Lombos. Non obstante, na competición ligueira arrincaron con bo pé tras imporse cunha contundente vitoria 95 a 60 ante o Coimbrões, no que a propia Soeiro remataría cuns números de 17 puntos, 3 rebotes e 5 asistencias, amosando o enorme peso que ten para as lisboetas. Fase de grupos complexa O Baxi Ferrol atópase no grupo K da competición e ao Benfica súmanse outras dúas rivais, o Zaglebie Sosnowiec polaco e o SBS Ostrava da República Checa. López dicía o seguinte ao respecto: "É un pouco incógnita porque ao final teñen cadros moi novos e necesitas ver as primeiras xornadas de Eurocup". “Puidemos ver a xornada previa e son equipos que ao mellor non teñen grandes estrelas na liga, pero compiten a un gran nivel”. O técnico dicía isto en referencia ás competicións locais de cada equipo no que o nivel de exixencia é moi alto, pois por exemplo no caso checo hai equipos como o Praga, que foron as últimas campioas da Euroliga. Rememorando un ano máxico na súa travesía europea Tras o éxito do curso pasado, a Eurocup é difícil de esquecer para as de Lino López. Na fase de grupos as de Ferrol medíronse ao Galatasaray, ao KP Brno checo e ao União Sportiva portugués. Non comezarían con bo pé, pois caerían no seu partido de debut ante o Galatasaray, mais tras isto non concederían ningunha derrota máis no que restaba de fase de grupos e certificaban así o seu pase á rolda 1 de playoff. Xa nas fases de eliminación, derrotarían o equipo belga Castors Braine, cun global de 180 a 133, certificando o pase aos oitavos, nos que se medirían nun durísimo encontro ás húngaras do Diósgyori VTK, que conseguiron derrotar cun pelexado resultado de 138 a 133 global. O Universitario de Ferrol comezaba a dar de que falar en Europa e tanto foi así que nos cuartos de final derrotarían as italianas do Dinamo Sassari por un contundente 184 a 146 global. Isto dáballe o pase a semifinais ao equipo galego, que volvería a non defraudar coa vitoria ante o Lyon-Villeurbanne francés, cun global de 156 a 133. Toda a emoción estaba servida para a histórica final na que, a pesar de non acadar o resultado agardado, as ferrolás deixaban un fermoso recordo na memoria de todos os seguidores e seguidoras do baloncesto feminino.