O Uni Ferrol busca ante o Perfumerías Avenida o pase aos cuartos de final da Eurocup

O Uni Ferrol volve esta quinta feira á Eurocup nun enfrontamento que terá lugar ás 20:30 horas no Pavillón Municipal de Würzburg en Salamanca. As ferrolás continúan con este cargado xaneiro no que disputarán un total de oito partidos. Polo momento, comezaron o ano con bo pé sumando xa dúas vitorias en tres partidos xogados. Impuxéronse ao Estudiantes 74 a 54, ao Joventut 66 a 62 e perderon 78 a 73 ante o Leganés. As salmantinas manteñen uns resultados menos favorábeis que as galegas, pois comezaron o ano cunha soa vitoria, ante o Estudiantes 71 a 68 e dúas derrotas ante o Uni Girona 77 a 60 e o Valencia Basket 81 a 54. A maiores, tamén arrastran a do pasado 28 de decembro por 69 a 64 ante o Leganés. Non obstante, o último enfrontamento que tiveron en liga, o pasado 21 de decembro, saldouse con vitoria para o Perfumerías Avenida nun axustado 81 a 75 que tamén se xogou en Salamanca. O técnico das de Ferrol mantén a idea de que irán ao partido coa "mentalidade de sempre, de intentar competir, de afrontar un partido de 80 minutos e de pelexar por cada balón", mais sendo consciente dun detalle importante, que "Avenida son favoritas, son un dos equipos candidatos a gañar a Eurocup e competir en España por todo". Porén, o técnico incidiu na súa intención de dar a mellor imaxe posíbel. "Nós imos intentar facer o noso traballo e evidentemente dar o máximo", afirmou. Perfumerías Avenida chega como favorito para Lino López Un punto positivo do que parten as xogadoras do Baxi Ferrol é o feito de que o partido de volta se xogue na Malata. Aínda así, Lino amosa a súa postura contraria a ir a Salamanca a xestionar o marcador e non pensar na ida. "Sempre digo o mesmo, nestas eliminatorias cada posesión é importante, todas temos que pensar que cada acción é vital para o transcurso da eliminatoria e afrontalo así, non pensar en se é a ida ou a volta", sinalou. "A tempada pasada tivemos a experiencia de xogar co factor cancha ao revés, pero a mentalidade sempre é a mesma, ser moi intensas e estar moi concentradas durante os 80 minutos", lembrou. Ademais, é conveniente salientar que o Baxi Ferrol chega ao partido con algunha baixa importante que lle afecta directamente neste partido. No encontro deste pasado sábado, onde se impuxeron a Estudiantes por un contundente 74 a 54, a irlandesa Claire Melia foi suplente e o propio Lino confirmou a súa lesión. "É difícil que Claire poida axudar ao equipo porque xa leva tempo con problemas no pé, o fin de semana non puido xogar e seguramente sexa complicado que poida axudar para o partido de Avenida”, indicou o técnico. Un óso duro de roer Lembrando o anterior encontro ante Avenida e partindo da idea do favoritismo destas, Lino sinalou o bo desempeño das súas, mais iso si matizando aspectos importantes. "Nós no partido de ida fixemos un moi bo traballo, evidentemente as circunstancias son diferentes porque elas non tiñan a súa referencia interior, Cave, e ficharon a Virag tamén no interior", manifestou Lino. Todo apunta a que Claire Melia será baixa no partido desta quinta feira Polo tanto, para o de Baxi Ferrol, o Perfumerías Avenida é "outro equipo diferente, sempre coa mesma identidade, con xogadoras de moitísimo talento e moita capacidade para anotar", dixo Lino, que volveu incidir na importancia de que o equipo faga o seu traballo e "minimizar o máximo posíbel as súas virtudes". "Hai que traballar durante os 80 minutos", insistiu. Baixas salmantinas A maiores, no caso das de Salamanca é importante destacar a baixa de Laura Erikstrup que fichou por Estudiantes e a de Natalie Stoupalova que rematou contrato co equipo. Non obstante, a ollos de Lino isto non supón un problema para Avenida, quen argumentou que "Cave é unha das mellores interiores da liga. É a súa máxima anotadora, reboteadora e en valoración". Ademais, recordou o adestrador, "ficharon unha xogadora con experiencia Euroliga (Virag), internacional e que xa amosou nestes dous partidos que pode axudar moito o equipo". Para Lino é moito máis probábel que as salmantinas noten a incorporación destas dúas xogadoras e non as súas baixas. O apoio na bancada Un feito moi salientábel do encontro é o feito de que boa parte da afección do Uni se desprazará até Salamanca para apoiar as xogadoras. Para Lino López isto supón "unha alegría moi grande". "Cando vemos que tanta xente se despraza para animarnos e para apoiarnos, pois sempre fortalece o traballo que estamos facendo como equipo e o traballo que está facendo o club. Como digo sempre, é o máis importante do que conseguimos durante estes últimos anos, o aumento da masa social, do seguimento e a repercusión que ten cada partido e cada viaxe. Ver o apoio da xente é o máis gratificante”, concluíu Lino. A emoción está servida e ambos equipos preparados para este enfrontamento da competición continental no que estará en xogo un billete aos cuartos de final. Veremos se a balanza se inclina a favor das ferrolás ou, pola contra, son as salmantinas as que conseguen pasar á seguinte ronda da competición. Primeiro choque continental contra un rival da súa liga Este enfrontamento entre o Baxi Ferrol e o Perfumerías Avenida será o primeiro que as galegas teñan ante un rival estatal en competición europea. Na pasada tempada, a primeira na que xogaron ante equipos do vello continente, esta posibilidade estivo vixente, mais como os outros equipos non conseguiron facerse coa vitoria, non chegou a materializarse. Así, nos cuartos de final non puido darse un enfrontamento ante IDK Gipuzkoa, mais estas caeron nos oitavos por un global de 143 a 121 ante o Dinamo Sassari, ao que o Baxi venceu 184 a 146. Algo similar podería ter acontecido nas semifinais, mais o Uni Girona non foi quen de imporse ao Asvel de Lyon, que as derrotou por un global de 144 a 128, mentres que o Baxi as venceu por 156 a 136. Partido a partido O primeiro enfrontamento cun equipo estatal vaise materializar esta quinta feira, algo que podería volver pasar nunha hipotética semifinal se Estudiantes ou Gernika Bizkaia conseguen chegar a ela e o Uni Ferrol tamén fai os deberes. Aínda así, para que isto poida acontecer aínda faltan un total de 160 minutos, os 80 dos oitavos e os 80 que implicarían o pase en cuartos, polo que, recordando a Lino López, o seu será ir partido a partido.