María Sancha, capitá do Atlético Guardés: "Queremos gañar ao Erice, non contamos coa vantaxe da ida"

María Sancha (Santibáñez de la Peña, Castela e León, 2001) agarda con confianza e concentración o partido deste sábadodo Mecalia Atlético Guardés fronte ao Handball Erice na volta dos oitavos de final da EHF European Cup. O equipo miñoto é favorito após imporse por 25 a 22 na ida na Sangriña, pero a capitá ten claro que un partido destas características non vai ser cómodo e menos xogando de visitantes. —Nun deporte como o balonmán, onde no nivel profesional a competitividade é moi alta, que é o que máis desfruta unha xogadora dun partido coma este? O que máis me gusta dos partidos é, sobre todo, cando xogamos na casa, toda a xente que nos anima, que está nas bancadas apoiando o equipo, a peña [O Inferno da Sangriña] que está ao noso lado... sentir que somos un equipo e que estamos todas xuntas e desfrutar facendo o noso traballo, que ao final é o máis satisfactorio e é unha sorte poder estar facendo algo que nos gusta e por enriba vivir diso, aínda que non sexa unha fortuna como noutros deportes. Tamén sentirse parte de algo; creo que temos un equipo moi bo e que estamos desfrutando pouco a pouco de todos os partidos e dos adestramentos. —Nesta tempada 2025-26 pasou a ser a capitá do Guardés tras varios anos no equipo. Que significa para vostede? É algo moi importante, sempre soñas con chegar a ser unha das deportistas importantes do equipo, independentemente do deporte que sexa. Estou contenta de ser a capitá e de pertencer a este club dunha forma tan relevante. Levo aquí desde a tempada 2021-22 e é un orgullo conseguir ser capitá este ano. —Agora que chegamos ao ecuador da tempada e todas as competicións están aínda por decidirse, como avalía o rendemento do equipo até o momento? Creo que hai que ter unha sensación positiva do que levamos de tempada. A derrota desta pasada cuarta feira foi dura, xa que esperabamos unha vitoria, non só para a clasificación na liga senón para ter boas sensacións antes do sábado. Pero, mirándoo con perspectiva, levamos moitos partidos gañados; tivemos tres derrotas e un empate. E aínda que nunca gusta perder ou non gañar, é algo que forma parte do deporte e temos que asumilo con normalidade para poder seguir adiante. Agora mesmo imos terceiras na liga. Creo que hai que ser positivas, queda moita liga, moitas competicións, coa European Cup, a Copa da Raíña... e todo pode pasar aínda. Temos que seguir traballando con esa visión positiva, optimista, motivadora e con carácter que nos define como equipo, e seguir loitando. —Chegan con tres goles de vantaxe ao partido de volta contra o Erice, pero a derrota da cuarta feira ante o Grafometal en liga (20-22) foi dura. Como ve ao equipo de cara ao choque deste sábado? O equipo vai con moitas ganas de afrontar esta eliminatoria. Estamos confiadas no traballo que estamos facendo e que nos levou até aquí, a pesar da derrota da cuarta feira. Creo que non todo se define nun mal partido, nunha mala derrota. Temos que seguir coa mesma mentalidade e mirar con moita ilusión e moita motivación o partido deste sábado. —Un partido europeo sempre é difícil e máis como visitantes, neste caso contra o Handball Erice. Que espera do rival? Vai ser un partido moi duro. Creo que van ser un equipo moi difícil, a pesar de levar tres goles de renda do partido de ida. Aínda así, nós imos pensando que o marcador é 0-0, que cremos que é o que temos que facer. Queremos unha vitoria, sen contar con eses tres goles que levamos de vantaxe. —Antes falaba da Copa da Raíña e das demais competicións que aínda están a disputar, e en todas teñen posibilidades de levantar o título. Cales son as expectativas para o resto da tempada? Creo que non hai expectativas e que todo pode pasar, pero temos que ter claras as nosas ideas. Todo o equipo rema no mesmo sentido e estamos convencidas de que o podemos lograr. Empezas a tempada coa idea de poder quedar primeira de liga e de conseguir algún título, sempre tes esa ambición. Pero é unha liga moi longa, é unha tempada exixente, pois os demais equipos tamén xogan para conseguir o mesmo. Creo que pouco a pouco imos encontrando o noso ritmo, o noso sentido e a nosa posición. —Acaba de comezar 2026. No plano persoal, que obxectivos se marca para este ano e cales para o Guardés como equipo? Os obxectivos como xogadora son dar o máximo de min e aportar todo o que poida ao equipo. Cada partido, adestramento... xa sea desde o campo ou desde o banco, sempre sumar ao equipo. E, despois, os obxectivos do equipo están claros: quedar na mellor posición na que poidamos na liga, pasar á final da Copa da Raíña, conseguir avanzar o máximo en Europa, facer bos partidos e traballar sendo un bo equipo e estando todas xuntas sempre. É a única forma de conseguilo. O Atlético Guardés confía en selar o pase a cuartos en Sicilia O Mecalia Atlético Guardés continúa co soño europeo intacto. O equipo miñoto viaxou onte a Sicilia (Italia), onde este sábado xogará na pista do Handball Erice o partido de volta da eliminatoria de oitavos de final ás 18 horas. Un choque ao que chega cunha vantaxe de tres goles conseguida o pasado sábado na Sangriña. Buscando corrixir erros e imporse ante un anfitrión capaz de lle pór as cousas moi difíciles, Ana Seabra anunciou unha lista de 13 xogadoras na que se seguen notando as baixas de Ariana Portillo e de Nerea Gil. O Guardés chega tratando de comezar de cero. As de Seabra volveron tropezar na cuarta feira na Liga Guerreiras, asinando un partido cheo de erros non forzados na Sangriña que rematou con dous puntos para o Grafometal da Rioxa (20-22). Os nervios e o cansazo inevitábel que implica o seu apertado calendario deixaron pegada nun cadro de xogadoras que non puido ofrecer a súa mellor versión, pero que quere a resarcirse e volver concentrar enerxías para recuperar o xogo atractivo ao que ten afeita á bancada da Sangriña este curso. Unha "final" para Seabra Para a adestradora do Guardés, Ana Seabra, o duelo deste sábado é “unha final" que, malia a pequena vantaxe de tres goles (25-22) coa que chegan, "comezará cun marcador 0-0”. A preparación foi moi seria e exixente, pois segundo a técnica son conscientes de que teñen que "traballar moi ben para seguir nesta competición”, aínda que a ilusión tamén pesa: “Obviamente, é un partido que nos motiva e que nos emociona moito”. Sobre o Erice, Seabra prevé que logre converter o pavillón “nunha pista difícil”, pois “xa demostrou a súa calidade” no partido de ida. A adestradora tamén espera que as súas sexan “máis competentes ca no último partido”, e ve o partido deste sábado coma unha oportunidade para resarcirse e recuperar o bo ritmo de xogo que tiñan.