Lorena Patiño, campioa estatal sub-23 de Ciclocrós: "O meu obxectivo para a Copa do Mundo é estar no top 15"

—Todos os nenos e as nenas adoitan aprender a montar en bicicleta de cativas, pero, cando se empeza no ciclocrós? Eu fago dúas modalidades. Empecei facendo XCO, que é mountain bike, e a esa idade non podía competir en ciclocrós, só podía a partir dos 15 anos. Logo, ao pasar á categoría cadete, xa puiden competir en ciclocrós sen problema. —Porque decidiu empezar a practicar esta modalidade? Empecei a practicar ciclocrós porque me gusta moito o ciclismo e quería probar. Empecei como cadete, facendo XCO, como che dicía, e estrada, que é máis diferente. Comecei na modalidade de ciclocrós por probar e por amizades que tamén tiña alí. Nada máis probar na primeira carreira encantoume... e até aquí, até agora. —É unha disciplina moi exixente a nivel físico. Que é o máis difícil para vostede? Para min, o más difícil é a parte técnica, sobre todo á hora de trazar as curvas. Cando compito en campionatos internacionais que son noutros países atópome en circuítos que hai como rodeiras. A terra é distinta e os trazados tamén, comparando cos que estou acostumada. Son cousas que aquí non se ven tanto e cústame máis adaptarme a iso. —Ao ser unha modalidade onde inflúen moitos factores á hora de competir en comparanza con outras modalidades do ciclismo, como é un adestramento seu? Ademais da bici, son adestramentos máis cortos e más explosivos, por exemplo, que os de montaña. Ademais, traballo tamén en pretempada a carreira a pé. Sobre todo, para algunhas competicións, coma na zona coreana, porque cando vas en bicicleta o corpo sofre moito. — Vostede empezou a competir desde moi nova e xa en campionatos de grande importancia. Como foi o seu debut nun Campionato estatal? O meu primeiro Campionato de España non foi en ciclocrós, senón en montaña. En canto ao primeiro no que competín de ciclocrós, gustoume moito, pero non logrei o resultado que esperaba. Coma sempre, podes ter a ilusión de estar nun Campionato estatal, pero non me sorprendeu tanto... estaba máis concentrada en facelo ben. Ademais, ao practicar máis modalidades, o de ciclocrós non foi o meu primeiro campionato relevante en xeral e iso cambia as sensacións. —Neste último Campionato estatal tivo algunhas dificultades técnicas, tamén se adestra para estas situacións? Aínda que non son experta en mecánica, hai algunhas cousas básicas que se deben saber facer nesta disciplina. A non ser que teñas unha picada na roda ou algo semellante que sexa máis difícil de arranxar, pór a cadea é algo básico. O máis importante é manter a calma nese momento, porque sabes que te estás xogando un Campionato de España e que os nervios poden xogar unha mala pasada. —No seu horizonte próximo ten unha nova competición moi importante que será, este vindeiro domingo, a Copa do Mundo de Ciclocrós de Benidorm. Como diría que chega a este campionato internacional? O Campionato do Mundo é dúas semanas despois da Copa do Mundo; agora estou agardando a que me digan se vou a ese campionato ou non. Na Copa do Mundo, o meu obxectivo é facelo o mellor posíbel. É certo que non corrín ningún campionato internacional este ano, así que non sei moi ben como estou a respecto das miñas rivais. Pero se puidese alcanzar un 'top 15' na miña categoría sería fantástico, creo que é unha meta realista. O soño de "poder vivir do ciclismo" Lorena Patiño reflexiona con Nós Diario sobre as súas expectativas de cara á súa aínda incipiente carreira profesional e ten claro que máis que campionatos ou títulos quere "gañar a vida enriba da bicicleta", aínda que para iso, no panorama actual, seguramente tería que ser noutra disciplina distinta ao ciclocrós, como o ciclismo de montaña, "que é olímpico e é onde hai máis oportunidades", salienta. A marinense ten moi presente que é un camiño complicado e sempre trata de manter os pés no chan e non esquecer os estudos, que hoxe compaxina co deporte de elite, onde ten como grande obxectivo "seguir mellorando e crecendo". Ten moi presentes referentes da súa disciplina, en concreto Lucía González ciclista profesional de Lointek e cuxos pasos lle gustaría seguir, así como "continuar competindo con 30 anos a un gran nivel", confía a ciclista.