A PREVIA | O Ensino busca o desquite nun novo derbi ante un Uni Ferrol que despunta en Europa

Durán Maquinaria Ensino Lugo e Baxi Uni Ferrol vense as caras nun novo derbi galego na elite do baloncesto estatal. O primeiro enfrontamento da segunda volta entre dous conxuntos galegos disputarase este sábado (19.15 horas, Pazo dos Deportes de Lugo), unha cita chave para o devir da tempada. Na primeira volta, o conxunto ferrolán levou a vitoria nun partido moi axustado que non se decidiu até os últimos segundos, cando o Uni Ferrol conseguiu, primeiro, empatar o partido a falta de 32 segundos para o final, e, despois, levar o triunfo (61-59). A situación de ambos os conxuntos na táboa é totalmente distinta. O equipo lugués atópase nunha situación delicada, con só sete triunfos no que vai de curso, un máis que o IDK Ibaeta de Donostia, que marca o descenso. A loita na parte baixa da clasificación é especialmente apertada, con tres equipos con seis triunfos -entre eles o Celta-, un con catro e o Ensino con sete. Unha soa xornada pode alterar por completo a clasificación. As ferrolás, pola súa parte, son novenas coas mesmas vitorias que o sétimo e o oitavo, que dan acceso ao play-off polo título. O Baxi Ferrol segue facendo historia e vence o Sassari por 19 puntos na ida dos cuartos da Copa Europea Sede de vinganza... e de afastarse do descenso Garfella chegou este ano ao Ensino procedente do Celta, onde xogou dúas tempadas, polo que sabe ben o que é, e o significado que ten, un derbi galego: “Sei a importancia que teñen estes partidos para o club. Doulle a relevancia que creo que ten, que é bastante, polo que estou moi emocionada e con moitas ganas de xogalo”. Ademais de que o partido deste sábado teña unha relevancia maior por ser un derbi galego, o Ensino busca con este encontro na casa atopar unha certa regularidade que aínda non conseguiu. Sobre isto, a valenciana destaca: “Creo que nos custou moito encaixar o xogo entre todas e poder conectarnos, xogar colectivamente, entendernos entre nós e comprender o que quería o corpo técnico. Pero creo que agora estamos nunha boa dinámica e as sensacións son outras”. De cara ao encontro deste sábado, a ala-pivote do conxunto lugués apunta que as chaves pasan por manter a súa identidade propia de “xogo rápido”, as transicións e saber aproveitar as súas virtudes para despois “explotar as súas debilidades e tratar de frear o que mellor saben facer [as xogadoras do Uni Ferrol”, engade. O Ensino afronta o final da campaña nunha situación complicada, a tan só unha vitoria dos postos de descenso, onde se atopan até cinco equipos pelexando por evitar ese penúltimo posto. “Empézase a notar a presión dos últimos partidos da tempada”, comenta Elba Garfella, mais matiza: “Isto é o bonito desta Liga, que sempre dicimos que é tola. Os resultados son imprevisíbeis, e é o que a fai tan competitiva. Pode ser que agora haxa máis presión, pero estamos a enfocalo ben, concentradas en nós, en conseguir o obxectivo principal de salvarnos. E, se logo chega algo máis grande, benvido sexa”. Esther Castedo, xogadora do Ensino Lugo CB: "A tempada non comezou como queriamos, pero xa estamos atopando o noso xogo" Aínda hai tarefas pendentes no vestiario do Ensino, tal e como recoñecía a base Esther Castedo nunha entrevista recente a este xornal: "Hai momentos nos partidos nos que conseguimos escaparnos a 'x' puntos de vantaxe, pero temos que intentar non deixar de pisar o acelerador para mantela". Segundo partido en 48 horas tras unha nova xesta O Baxi Uni Ferrol afronta unha das semanas máis complicadas da tempada, co segundo encontro en apenas 48 horas, logo de derrotar o Dinamo Sassari en Sardeña (Italia) na ida dos cuartos de final da Copa Europea. As de Lino López deixaron encarreirada a eliminatoria malia empezar por debaixo no marcador, remontando finalmente (76-95) grazas a un maxistral último cuarto comandadas por Noa Morro –con 22 puntos anotados en apenas 17 minutos de xogo–, que afirma a este diario: “Estamos afeitas á dobre competición e a que nos regulen as cargas, pero, aínda que o esteamos afrontando ben, iso non quita que acabemos cansas polos desprazamentos. Aínda así, creo que as ganas de seguir remando son máis fortes que o cansazo”. O partido de volta disputarase no pavillón da Malata a vindeira quinta feira, día 27, ás 20 horas, e as de López confían en certificar o pase a semifinais para meterse na loita polo título continental. O club informou esta sexta feira de que quedaban dispoñíbeis menos de 1.000 entradas, polo que confía en encher o pavillón para o que será, até o momento, o partido máis importante de toda a súa historia. A pesar da exixente carga que supón xogar dous encontros en pouco máis de dous días, este triunfo foi un xute de enerxía de cara ao derbi. “Ademais, pola forma na que gañamos, que foi por case 20 puntos, imos coas pilas ben cargadas para o partido contra o Ensino”, apunta a ala-pivote balear. Morro viviu este ano o seu primeiro derbi galego, do que destaca que “hai moita rivalidade”. “Por exemplo, na casa a afección nótase moito, e é moi divertido xogar este tipo de partidos, gózanse moito”, prosegue. O Uni Ferrol, o equipo que sorprende a Europa e deleita a Ferrol e a Galiza Con tan só nove xornadas por diante para rematar a Liga e cunha gran situación e moitas expectativas na Copa Europea, o Uni Ferrol afronta o final de tempada con moita ilusión e ganas de facer historia. Ademais, a ala-pivote da escuadra de Lino López destaca: “Estamos no noso mellor momento agora, nunha gran dinámica. E, se a podemos manter traballando, creo que podemos chegar perfectamente aos play-off polo título [na competición ligueira]”. O Celta desprazase até Euskadi para medirse ao Ibaeta nun partido chave Matea Tadic conducindo o balón ante o Perfumerías Avenida de Salamanca no pavillón de Navia. (Foto: Celta Baloncesto) O Real Club Celta Femxa Zorka afronta este sábado un partido fundamental na loita pola salvación. As de Cristina Cantero visitan o IDK Ibaeta de Donostia (18 horas, José Antonio Gasca), o actual décimo quinto clasificado e quen marca os postos de descenso. Viguesas e guipuscoanas suman até o momento as mesmas vitorias en Liga, seis -igual que o Araski-, polo que o resultado deste encontro podería mandar directamente o Celta aos postos de descenso ou ben servir para empezar a marcar distancia coa zona vermella da clasificación. Cantero, consciente da relevancia deste enfrontamento, subliña: “Por como está a clasificación, podemos dicir que é un partido moi importante, pero estano a ser todos. O que quero transmitir ao equipo é que todos os partidos que nos quedan son finais, hai que tentar sacar vitorias onde sexa e cando sexa, pero é certo que, cando xogas contra un rival directo, colle unha maior dimensión polo ‘basket-average’, pero creo que temos que estar tranquilas, pensar en nós e mellorar con respecto aos partidos anteriores”. Na primeira volta, o Celta impúxose ao conxunto vasco por 66 a 60, pero de cara a este encontro a adestradora celeste precisa: “Elas foron cambiando de xogadoras, buscaron novas incorporacións, son un equipo con moitas máis posibilidades, teñen moitísima calidade... pero é certo que non atoparon unha dinámica positiva. Sendo un equipo que aspiraba a estar moito máis arriba, agora está metido de cheo na loita pola permanencia”.