A demanda de "máis transparencia" centra o debate na Federación de Automobilismo

En decembro coñecíase que o grupo impulsado por Alfonso García Eiriz, denominado FGA Evolución, presentábase como alternativa á actual Presidencia da Federación Galega de Automobilismo, dirixida por Antonio RodríguezTroitiño. Aínda se descoñece se será o propio García Eiriz quen se presente candidato ou se será outro o elixido para representar este grupo. Troitiño, actual presidente da Federación, non ten decidido tampouco se será el quen se presente candidato este ano. O proceso electoral, que adoita durar uns seis meses, aínda non está aberto e Antonio Troitiño non se mostra preocupado ante a situación. Afirma a Nós Diario que desde o seu grupo seguen "traballando a tope sen pensar nas eleccións". O único no que pensan agora é en centrarse na Federación para que o automobilismo galego "sexa un referente a nivel estatal". Agora mesmo, sinala, xa conseguimos ser o número un a nivel estatal, pois somos a federación autonómica con maior número de licenzas desde que estamos no poder, desde hai tres anos", engade o actual presidente da Federación, que espera poder manter esta boa situación actual no sistema. Facendo balance dos seus tres anos a cargo do organismo, Troitiño destaca a Nós Diario que o seu grupo pode sentirse orgulloso e contento polo traballo realizado nesta etapa. "Considero que no tempo que levamos exercendo houbo unha revolución moi positiva e un aumento grandísimo de participación en todas as modalidades de automobilismo. Cremos que a nivel económico a federación tamén está funcionando de marabilla: a nivel de institucións e axudas públicas que recibimos tamén melloramos, multiplicáronse por tres as que viña habendo até que nós chegamos á Presidencia", sostén. Troitiño tamén fai referencia aos subcampionatos, que "están a funcionar moi ben". A Federación, "en xeral, está funcionando moi ben e de cara ao futuro tampouco vemos ningún tipo de problema", engade. O grupo da Presidencia actual está a ofrecer tamén "un montón de becas" para novos pilotos, para "poder sacar profesionais dun alto nivel de cara ao futuro". Christian Costoya corre a toda velocidade cara á elite do automobilismo O principal obxectivo da Federación O obxectivo principal de Troitiño neste ano é "construír, ou polo menos comezar, co proxecto do futuro circuíto de velocidade". "Esperamos que se consiga", indica a Nós Diario. "Levamos tres anos traballando moitísimo. Obviamente hai moitas cousas que non puidemos facer aínda, pois levando tres anos ao mando é inviábel", engade. "Creo que o estamos a facer ben, ou iso é o que percibimos por parte dos federados. Non entro a valorar posíbeis candidaturas". A alternativa de García Eiriz García Eiriz lidera un equipo formado por varias persoas do mundo do motor, incluído Germán Castrillón, seis veces campión galego de ralis; e pilotos como Roberto Torres, que conta con dúas Copas Clío. Tamén forman parte do grupo Jorge Pérez Oliveira, habitual nas carreiras galegas; e José Covela, Fernando Fernández e Manuel Montoto, vinculados á organización de campionatos. O propio García Eiriz expresou que aínda non hai un candidato decidido e incluso lle restou importancia á cara visíbel do proxecto, afirmando que "queremos reunir moita máis xente para que cando toque decidir e escoller quen será o candidato do grupo, se faga cun consenso amplo". O Porriño, listo para a segunda volta Este grupo demanda "maior transparencia nas contas" da Federación e un sistema de administración que funcione de forma máis independente, co obxectivo de ter varios grupos especializados que funcionen con autonomía con respecto ao presidente, "a diferenza dos últimos anos". Ademais, FGA Evolución propón rebaixar os custos pola xestión dos campionatos e insiste na necesidade de implantar licenzas específicas para cada carreira alegando que "outras federacións as teñen".